અમદાવાદની સ્કાયલાઇન હોટલનાં બીજા માળેથી નીચે પટકાતા જાનમાં આવેલા યુવાનનું મોત
અમદાવાદ, અમદાવાદના સૌથી મોંઘા ગણાતા સિંધુભવન રોડ પર આવેલી વૈભવી હોટલમાંથી એક યુવક શનિવારે રાત્રે પડી જવાથી તેનું મોત થયાની ચોંકાવનારી ઘટના સામે આવી છે. રાત્રે બનેલી ઘટના બાદ હોટલમાં તથા આસપાસના વિસ્તારમાં ચર્ચાનો વિષય બની ગયો હતો. બનાવની જાણ થતાં પોલીસનો કાફલો પણ ઘટના સ્થળ પર પહોંચી ગયો હતો. ૨૫ વર્ષનો નરોડાનો રહેવાસી યુવક શુક્રવારે ફાઈવ સ્ટાર હોટલમાંથી પડી જતા તેનું મોત થઈ ગયું હતું.
સિંધુભવન રોડ પર આવેલી વૈભવી હોટલમાં શુક્રવારે રાત્રે લગ્ન પ્રસંગનું આયોજન કરાયું હતું જેમાં આ યુવક બીજા માળેથી નીચે પટકાતા મોત થયું છે. મૃતક યુવકની ઓળખ અમિતકુમાર ઠાકુર તરીકે કરાઈ છે. સરખેજ પોલીસે આ ઘટનામાં અકસ્માતે મોતનો ગુનો દાખલ કર્યો છે.
સરખેજ પોલીસ ઈન્સ્પેક્ટર એસજી દેસાઈએ જણાવ્યું કે સીસીટીવી ફૂટેજ ચકાસ્યા બાદ આ ઘટનાનો અકસ્માતે મોતનો ગુનો નોંધવામાં આવ્યો છે, વિડીયોમાં ઘટના અકસ્માત હોવાનું સ્પષ્ટ થઈ રહ્યું હોવાનું પોલીસને પ્રાથમિક તપાસમાં જાણવા મળ્યું છે.
પીએસઆઈ દેસાઈ જણાવે છે કે, અમે આ કેસમાં વધુ તપાસ કરી રહ્યા છીએ. પીએસઆઈએ વધુમાં જણાવ્યું કે, સીસીટીવીની તપાસ કરતા માલુમ પડ્યું છે કે, ચાર યુવકો સીડીમાં ઉભેલા દેખાય છે, જેઓ સિગરેટ પીતા હોય છે ત્યાં અચાનક એક યુવક બીજા માળેથી નીચે પટકાય છે.
બીજા માળેથી નીચે પડેલા અમિતકુમારને ગંભીર ઈજાઓ થતા તેને હોસ્પિટલ લઈ જવામાં આવ્યો હતો, જાેકે તેનું મોત થઈ ગયું હતું. પોલીસે જણાવ્યું કે, જ્યારે ઘટના બની ત્યારે લગ્નનો કાર્યક્રમ ચાલી રહ્યો હતો અને બનાવ બન્યો ત્યારે કેટલાક લગ્નમાં આવેલા મહેમાનો પણ હાજર હતા.
જે યુવકનું અકસ્માતે મોત થયું તે યુવક પણ લગ્નમાં આવેલો હોવાનું મનાય છે. અમિતકુમાર છોકરાવાળા તરફથી મહેમાન હોવાનું જાણવા મળી રહ્યું છે. જાેકે, આ અંગે હજુ વધુ તપાસ કર્યા બાદ સંપૂર્ણ વિગતો સામે આવશે. આ બનાવ અંગે હોટલે પણ ખેદ વ્યક્ત કર્યો છે. હોટલે જણાવ્યું છે કે તેમના માટે મહેમાનોની સુરક્ષા સૌથી મોટો મુદ્દો છે. આવામાં હોટલ દ્વારા જણાવવામાં આવ્યું છે કે, તપાસ દરમિયાન સંપૂર્ણ સહકાર આપવામાં આવશે.
