“અશ્લીલ સામગ્રી પ્રદર્શિત કરતાં 50 OTT પ્લેટફોર્મ્સ પર સરકારે પ્રતિબંધ મુક્યો”

• લોકસભામાં કેન્દ્રીય મંત્રી અશ્વિની વૈષ્ણવે આ અંગે લેખિત માહિતી આપી. આઈટી એક્ટ અને ભારતીય ન્યાય સંહિતાના ઉલ્લંઘન બદલ કાર્યવાહી થઈ.

• ગેરકાયદેસર સામગ્રી હટાવવા માટે આઈટી એક્ટની કલમ ૭૯(૩)(બી) નો ઉપયોગ.- બાળકો માટે સલામત અને જવાબદાર ડિજિટલ સ્પેસ બનાવવો મુખ્ય ઉદ્દેશ.

નવી દિલ્હી, ૨૨ જુલાઈ: અશ્લીલ સામગ્રી પ્રદર્શિત કરવા તેમજ માહિતી તકનીક (IT) એક્ટ અને અન્ય કાયદાકીય જોગવાઈઓનો ભંગ કરવા બદલ સરકારે છેલ્લા બે વર્ષમાં ભારતમાં ૫૦ ઓવર-ધ-ટોપ (OTT) પ્લેટફોર્મ્સને જાહેર પહોંચ માટે બ્લોક કરી દીધા છે. કેન્દ્રીય ઇલેક્ટ્રોનિક્સ અને ઇન્ફોર્મેશન ટેક્નોલોજી મંત્રી અશ્વિની વૈષ્ણવે બુધવારે લોકસભામાં આ માહિતી આપી હતી. 50 OTT platforms blocked in last 2 years for obscene content: Ashwini Vaishnaw

એક લેખિત જવાબમાં મંત્રીએ જણાવ્યું હતું કે, માહિતી તકનીક અધિનિયમ, ૨૦૦૦ ની કલમ ૬૭ અને ૬૭-એ, ભારતીય ન્યાય સંહિતા (BNS) ની કલમ ૨૯૪, અને સ્ત્રી અસભ્ય નિરૂપણ (પ્રતિબંધ) અધિનિયમ, ૧૯૮૬ ની કલમ ૪ નું ઉલ્લંઘન કરનારા મધ્યસ્થીઓ (Intermediaries) અને OTT પ્લેટફોર્મ્સ સામે આ કાર્યવાહી કરવામાં આવી છે.

મંત્રીએ જણાવ્યું હતું કે, “સરકારે અશ્લીલ સામગ્રી દર્શાવવા અને આઈટી એક્ટની કલમ ૬૭ અને ૬૭-એ, BNS ની કલમ ૨૯૪ અને સ્ત્રી અસભ્ય નિરૂપણ (પ્રતિબંધ) એક્ટ, ૧૯૮૬ ની કલમ ૪ ના ઉલ્લંઘન બદલ છેલ્લા બે વર્ષમાં ભારતમાં ૫૦ OTT પ્લેટફોર્મ્સ પર પ્રતિબંધ મુક્યો છે.”

તેમણે ઉમેર્યું હતું કે, સરકાર ફરિયાદોના આધારે કાર્યવાહી કરે છે અને ગેરકાયદેસર સામગ્રીને દૂર કરવા અથવા તેને બ્લોક કરવા માટે આઈટી એક્ટની કલમ ૭૯(૩)(બી) હેઠળ મળેલી સત્તાનો ઉપયોગ કરીને મધ્યસ્થીઓને સૂચિત કરે છે.

વૈષ્ણવે જણાવ્યું હતું કે, સરકારની ડિજિટલ નીતિઓનો મુખ્ય ઉદ્દેશ બાળકો સહિત તમામ યુઝર્સ માટે એક ઓપન, સુરક્ષિત, વિશ્વસનીય અને જવાબદાર ઇન્ટરનેટ સુનિશ્ચિત કરવાનો છે.

તેમણે નોંધ્યું હતું કે, ઇન્ફોર્મેશન ટેક્નોલોજી એક્ટ, ૨૦૦૦, અને ઇન્ફોર્મેશન ટેક્નોલોજી (ઇન્ટરમીડિયરી ગાઇડલાઇન્સ એન્ડ ડિજિટલ મીડિયા એથિક્સ કોડ) રૂલ્સ, ૨૦૨૧ સાથે મળીને ડિજિટલ સુખાકારી, યુઝર સુરક્ષા અને જવાબદાર ઓનલાઇન સહભાગિતાને પ્રોત્સાહન આપવા માટે કાનૂની માળખું પૂરું પાડે છે.

મંત્રીએ ઉલ્લેખ કર્યો હતો કે, “આઈટી નિયમો અનુસાર, મધ્યસ્થીઓએ પોતાની ફરજો નિભાવતી વખતે યોગ્ય સાવચેતી રાખવી જરૂરી છે અને કમ્પ્યુટર સંસાધનોના યુઝર્સને એવી કોઈ પણ માહિતી હોસ્ટ, ડિસ્પ્લે, અપલોડ, મોડિફાય, પબ્લિશ, ટ્રાન્સમિટ, અપડેટ કે શેર ન કરવા માટે જાણ કરવી પડશે જે બાળકો માટે હાનિકારક હોય અથવા અમલમાં હોય તેવા કોઈ કાયદાનો ભંગ કરતી હોય.”