વોટ્સએપે એક મહિનામાં બે મિલિયન ભારતીય ખાતાઓને અવરોધિત કર્યા
નવીદિલ્હી: મેસેજિંગ સર્વિસ કંપની વોટ્સએપએ આ વર્ષે ૧૫ મેથી ૧૫ જૂન દરમિયાન ૨૦ લાખ ભારતીય ખાતાઓ પર પ્રતિબંધ મુક્યો છે. જ્યારે આ દરમિયાન તેને ૩૪૫ ફરિયાદો મળી છે. કંપનીએ તેના પ્રથમ અનુપાલન અહેવાલમાં આ માહિતી આપી હતી.
નવા ઇન્ફર્મેશન ટેકનોલોજીના નિયમો અંતર્ગત આ રિપોર્ટ રજૂ કરવો ફરજિયાત કરવામાં આવ્યો છે. નવા નિયમો હેઠળ, ૫૦ લાખથી વધુ વપરાશકર્તાઓ ધરાવતા મોટા ડિજિટલ પ્લેટફોર્મ્સે દર મહિને અનુપાલન અહેવાલો પ્રકાશિત કરવા જરૂરી છે.
આ અહેવાલમાં, આ મંચો દ્વારા મળેલી ફરિયાદો અને તેમના પર કરવામાં આવેલી કાર્યવાહીનો ઉલ્લેખ કરવો જરૂરી છે.
વોટ્સએપએ કહ્યું, “અમારું મુખ્ય ધ્યાન એકાઉન્ટ્સને મોટા પાયે નુકસાનકારક અથવા અનિચ્છનીય સંદેશા મોકલતા અટકાવવાનું છે. અમે આ ખાતાઓને ઓળખવા માટે અદ્યતન ક્ષમતાઓ જાળવી રહ્યા છીએ જે ઊંચા અથવા અસામાન્ય દરે સંદેશા મોકલે છે અને એકલા ભારતમાં, ફક્ત ૧૫ મેથી જૂન ૧૫ દરમિયાન આવા દુરૂપયોગનો પ્રયાસ કરી રહેલા ૨૦ લાખ એકાઉન્ટ્સ પર પ્રતિબંધ મૂકવામાં આવ્યો છે. “
કંપનીએ સ્પષ્ટતા કરી હતી કે ૯૫ ટકાથી વધુ પ્રતિબંધો સ્વચાલિત અથવા બલ્ક મેસેજિંગ (સ્પામ) ના અનધિકૃત ઉપયોગને કારણે છે. ફેસબુકની માલિકીની કંપનીએ કહ્યું કે, વર્ષ ૨૦૧૯ થી અવરોધિત થનારા ખાતાઓની સંખ્યામાં વધારો થયો છે કારણ કે તેની સિસ્ટમ વધુ પ્રગતિશીલ બની છે અને આવા વધુ એકાઉન્ટ્સ શોધવામાં મદદ કરે છે.વોટ્સએપ દર મહિને સરેરાશ ૮ મિલિયન એકાઉન્ટ્સને પ્રતિબંધિત અથવા નિષ્ક્રિય કરી રહ્યું છે. ગૂગલ, કુ, ટિ્વટર, ફેસબુક અને ઇન્સ્ટાગ્રામ જેવા અન્ય સોશિયલ મીડિયા પ્લેટફોર્મ એ પણ તેમના અનુપાલન અહેવાલો સબમિટ કર્યા છે.
