કાજોલ- ક્રિતિની મિસ્ટ્રી થ્રિલર ‘દો પત્તી’ની રિલીઝ ડેટ જાહેર
મુંબઈ, ક્રિતિ સેનન અને કાજોલ પહેલી વાર ‘દો પત્તી’માં એક સાથે જોવા મળશે. આ એક મિસ્ટ્રી થ્રિલર ફિલ્મ છે, જેમાં ક્રિતિ ડબલ રોલમાં જોવા મળશે. આ ફિલ્મના મેકર્સ દ્વારા એક ખાસ વીડિયો બનાવવામાં આવ્યો છે, જેના દ્વારા આ ફિલ્મની રિલીઝ ડેટ જાહેર કરવામાં આવી છે.
૨૫ ઓક્ટોબરે ‘દો પત્તી’ નેટફ્લિક્સ પર રિલીઝ થવાની છે. સોમવારે નેટફ્લિક્સ ઇન્ડિયા દ્વારા એક પ્રમોશનલ વીડિયો શેર કરવામાં આવ્યો છે. આ શોર્ટ વીડિયોની શરૂઆત એક એવા સીનથી થાય છે, જ્યાં કાજોલ એક કૅફેમાં બેસેલી હોય છે તે કેપેચિનો માંગે છે અને ત્યાં એને ક્રિતિ સેનન દેખાય છે.
રસપ્રદ વાત એ છે કે આ ફિલ્મમાં કાજોલ એક પોલીસ ઓફિસરનો રોલ કરી રહી છે. તેમજ ક્રિતિ ડબલ રોલ કરી રહી છે. આ વીડિયોમાં ક્રિતિ કાજોલની નજરમાંથી બચતી જોવા મળે છે, પણ કાજોલ ક્રિતિ સામે બંદૂક તાકે છે અને તેને પ્રશ્નો પૂછે છે.તેના જવાબમાં ક્રિતિ જણાવે છે કે તે જીમમાં હતી, પરંતુ કાજોલ તેની ઉલટતપાસ ચાલુ રાખે છે અને તેને યાદ કરાવે છે કે પાપરાઝીએ તેને અઢી વાગે એક સેલોનની બહાર કૅમેરામાં કેદ કરી હતી.
વીડિયોના અંતે આદેશ આપતી હોય એમ ક્રિતિને સાચું રહસ્ય જાહેર કરવા કહે છે, જેના જવાબમાં ક્રિતિ ફિલ્મની રિલીઝ ડેટ એટલે કે ૨૫ ઓક્ટોબર ૨૦૨૪ કહે છે.
આ વીડિયો પોસ્ટ કરતા કૅપ્શનમાં લખવામાં આવ્યું હતું, ‘અબ હોગા ખેલ શુરુ, લેકિન ઇસ કહાની કે હૈ દો પહેલુ, દો પત્તી રિલીઝ થાય છે ૨૫ ઓક્ટોબરે માત્ર નેટફ્લિક્સ પર.’ આ જાહેરાત થતાં જ કાજોલ અને ક્રિતિના ફૅન્સ દ્વારા ઉત્સાહમાં પોસ્ટ પર અનેક કમેન્ટ કરવામાં આવી હતી. બે અલગ-અલગ પેઢીની એક્સ્ટ્રેસના લીડ રોલ ધરાવતી આ ફિલ્મ શશાંક ચતુર્વેદી દ્વારા ડિરેક્ટ કરવામાં આવી છે.
કાજોલ તેની કૅરિઅરમાં પહેલી વખત આ પ્રકારનો રોલ કરતી જોવા મળશે. ક્રિતિ પણ પહેલી વખત ડબલ રોલ કરી રહી છે. તે ઉપરાંત શાહીર શેખ પણ મહત્વના રોલમાં જોવા મળશે.SS1MS
