દિલ્હીમાં બાંધકામ અને ઇમારતો તોડવા પર પ્રતિબંધ

મુંબઈ, દિલ્હીમાં પ્રદૂષણ ચેતવણીજનક સપાટીએ પહોંચ્યું છે ત્યારે કેન્દ્રીય પ્રદૂષણ નિયમનકર્તાએ ગુરુવારથી દિલ્હી-એનસીઆરમાં ગ્રેડેડ રિસ્પોન્સ એક્શન પ્લાન સ્ટેજ-૩ હેઠળ નિયંત્રણ અમલી બનાવ્યા છે, જે શુક્રવારથી લાગુ થશે. દેશની રાજધાનીમાં હવાની ગુણવત્તા સતત બીજા દિવસે ‘ગંભીર’ કેટેગરીમાં રહી હોવાથી કડક પગલાંની ફરજ પડી છે.

નિયંત્રણ લાદવાનો નિર્ણય કમિશન ફોર એર ક્વોલિટી મેનેજમેન્ટ દ્વારા લેવાયો હતો. ગ્રેડેડ રિસ્પોન્સ એક્શન પ્લાનના ત્રીજા તબક્કા હેઠળ ઇલેક્ટ્રિક બસો, સીએનજી વાહનો અને બીએસ-૬ ડિઝલ બસો સિવાય એનસીઆરની તમામ આંતરરાજ્ય બસોના દિલ્હીમાં પ્રવેશ પર પ્રતિબંધ મૂકવામાં આવ્યો છે.

ઉપરાંત, બાંધકામ અને ઇમારતો તોડવાની પ્રવૃત્તિ અટકાવી દેવા આદેશ અપાયો છે. નિયંત્રણોને પગલે માઇનિંગ સંબંધી કામકાજ પણ કરી નહીં શકાય. ધોરણ-૫ સુધીના વિદ્યાર્થીઓને ઓનલાઇન શિક્ષણ આપવા તેમજ મુખ્ય માર્ગાે પર રોજ પાણીના છંટકાવના નિર્દેશ અપાયા છે.

ગ્રેડેડ રિસ્પોન્સ એક્શન પ્લાન સ્ટેજ-૩ અંતર્ગત દિલ્હી તેમજ ગુરુગ્રામ, ફરિદાબાદ, ગાઝિયાબાદ અને ગૌતમ બુદ્ધ નગરમાં બીએસ-૩ પેટ્રોલ અને બીએસ-૪ ડિઝલ વાહનો ચલાવવા પર પ્રતિબંધ રહેશે. દિલ્હી-એનસીઆર માટે ગ્રેડેડ રિસ્પોન્સ એક્શન પ્લાનને હવાની ગુણવત્તાના ચાર તબક્કામાં વહેંચવામાં આવ્યો છે.

જેમાં સ્ટેજ-૧માં ૨૦૧થી ૩૦૦ની રેન્જમાં એર ક્વોલિટી ઇન્ડેક્સ (એક્યુઆઇ)ને ‘ખરાબ’, સ્ટેજ-૨માં ૩૦૧-૪૦૦ના એક્યુઆઇને ‘બહુ ખરાબ’, સ્ટેજ-૩માં ૪૦૧-૪૫૦ના એક્યુઆઇને ‘ગંભીર’ અને ૪૫૦થી વધુના એક્યુઆઇને ‘અતિગંભીર’ ગણવામાં આવ્યો છે.SS1MS