‘ડોન ૩’માં રણવીરનો મુકાબલો કરવા વિક્રાંત મેસ્સીને ઓફર

મુંબઈ, શાહરૂખ ખાનના વારસદાર તરીકે ‘ડોન ૩’માં રણવીર સિંહની પસંદગી થયેલી છે. ડાયરેક્ટર ફરહાન અખ્તર અને રણવીર સિંહ લાંબા સમયથી આ ફિલ્મનું પ્લાનિંગ કરી રહ્યા છે. ‘ડોન ૩’માં જૂની કાસ્ટને રીપિટ કરવાના બદલે નવી પેઢીને તક આપવાના પ્રયાસ થઈ રહ્યા છે. રણવીરના ઓનસ્ક્રિન મુકાબલા માટે વિલન તરીકે અનેક નામો પર વિચારણા બાદ વિક્રાંત મેસ્સીની પસંદગી થયેલી છે.

વિક્રાંતને આ રોલ ઓફર થયો હોવાનું જાણવા મળ્યું છે, પરંતુ વિક્રાંતે હજુ આ ફિલ્મ સાઈન કરી નથી. વિક્રાંત મેસ્સીની કરિયરમાં અત્યાર સુધીની ઉત્તમ ફિલ્મ તરીકે ‘૧૨વીં ફેલ’ની ગણતરી થાય છે. આ ફિલ્મની સફળતા બાદ વિક્રાંતને ઢગલાબંધ ઓફર મળી રહી છે.

વિક્રાંતની ટેલેન્ટનો પરચો જોયા પછી તેને ‘ડોન ૩’માં મુખ્ય વિલનનો રોલ ઓફર થયો હોવાનું ચર્ચાય છે. વિક્રાંત અને ફરહાન અખ્તર તરફથી આ અંગે કોઈ ખુલાસો થયો નથી, પરંતુ વિલન તરીકે વિક્રાંતે પોતાના કાબેલિયત પુરવાર કરેલી છે. અગાઉ ‘સેકટર ૩૬’માં વિક્રાંતે મનોવિકૃત કિલરનો રોલ કર્યાે હતો.

ઓડિયન્સ અને ક્રિટિક્સને વિક્રાંતનો રોલ પસંદ આવ્યો હતો, પરંતુ તે સમયે વિક્રાંતની ખાસ ચર્ચા થઈ ન હતી. વિક્રાંતની આગામી ફિલ્મ સાબરમતી રિપોર્ટ આવી રહી છે. જેમાં તેની સાથે રાશિ ખન્ના અને રિદ્ધિ ડોગરા પણ મહત્ત્વના રોલમાં છે. વિક્રાંતની આ ફિલ્મની રિલીઝ સાથે જ વિવાદો શરૂ થવાની સંભાવના છે અને આ ફિલ્મના કારણે પોતાને ધમકીઓ મળતી હોવાનું પણ વિક્રાંતે સ્વીકારેલું છે.

વિક્રાંતની આ ફિલ્મની સફળતા માટે રાહ જોયા વગર ફરહાને તેને ‘ડોન ૩’માં વિલન બનવા ઓફર આપી છે. વિક્રાંત પોતે આ ઓફરથી ખૂબ ખુશ હોવાનું મનાય છે.SS1MS