આત્મહત્યા માટે ઉશ્કેરવાનો ગુનો પ્રસ્થાપિત કરવા પ્રત્યક્ષ કે પરોક્ષ પુરાવા જરૂરીઃ સુપ્રીમ

નવી દિલ્હી, આત્મહત્યાની ઉશ્કેરણી અંગેના એક કેસમાં મહત્વનો ચુકાદો આપતાં સુપ્રીમ કોર્ટે જણાવ્યું હતું કે, આત્મહત્યા માટે ઉશ્કેરવાનો ગુનો પ્રસ્થાપિત કરવા માટે આરોપી વિરુદ્ધ પ્રત્યક્ષ કે પરોક્ષ પુરાવા હોવા જરૂરી છે.

૨૫ વર્ષની એક પરણિતાની આત્મહત્યાના કેસમાં પતિ અને તેના પરિવારજનોને છોડી મુકતા એક આદેશમાં જસ્ટિસ બી.આર. ગવઈ તથા કે.વી. વિશ્વનાથનની બેન્ચે જણાવ્યું હતું કે, આઈપીસીની કલમ ૩૦૬ હેઠળ કામ ચલાવવા માટે, આરોપી એ પીડિતને પ્રત્યક્ષ કે પરોક્ષ રીતે આત્મહત્યા કરવા માટે દુષ્પ્રેરણા આપી હોય તેના પુરાવાર કરવું જરૂરી છે.

સર્વાેચ્ચ અદાલતે જણાવ્યું હતું કે, આવી ઉશ્કેરણી એ પીડિત દ્વારા કરાયેલી આત્મહત્યાના કારણો સાથે સંલગ્ન હોવી જોઈએ. આ ઉશ્કેરણી એવી હોય કે જેમાં આરોપીનો સામેની વ્યક્તિને આત્મહત્યા કરવા માટે મજબૂર કરવાનો ઈરાદો સ્પષ્ટ થતો હોય અને જેના લીધે પીડિત એવી સ્થિતિમાં મુકાઈ જાય કે તેની પાસે જીવન ટૂંકાવી દેવા સિવાય અન્ય કોઈ વિકલ્પ બાકી ના રહ્યો હોય.

બેન્ચે જણાવ્યું હતું કે, ઉશ્કેરણીમાં માનસિક રીતે ઉશ્કેરવાનો અથવા ઈરાદાપૂર્વક અન્ય કોઈ વ્યક્તિ દ્વારા કોઈ ચોક્કસ કાર્ય કરવા જેવી બાબતો સામેલ છે. જો આરોપીનો આવો ઈરાદો સ્પષ્ટ છતો ના થતો હોય તો ઉપરોક્ત કલમ હેઠળના આરોપો ટકી શકે નહીં.

કોર્ટે જણાવ્યું હતું કે, ૨૫ વર્ષની પરણિતાએ જીવ ગુમાવવો પડ્યો તે અત્યંત દુઃખની વાત છે. જોકે, અરજદારો દ્વારા શાબ્દિક રીતે તેને આત્મહત્યા કરવા મજબૂર કરાઈ હોય તેવા પુરતા પુરાવાના અભાવે અરજદારો વિરુદ્ધ ફોજદારી કાર્યવાહી કાયદાની પ્રક્રિયાના ઉલ્લંઘન સમાન ગણાશે.SS1MS