યુવતી સહિત ૪ લોકોએ મહિલા વકીલના ઘરમાંથી રૂ. ૫.૬૦ લાખની મતા ચોરી

અમદાવાદ, નારોલમાં મહિલા વકીલે ઘરઘાટી રાખવા માટે ઉત્તર પ્રદેશના શખ્સનો સંપર્ક કર્યાે હતો. તે શખ્સે એક યુવતીને ઘરઘાટી તરીકે મોકલી હતી.

ઘરઘાટી યુવતી ઘરે એકલી હોવાથી તકનો લાભ લઇને સોના-ચાંદીના દાગીના અને રોકડ સહિત કુલ રૂ.૫.૬૦ લાખનો મુદ્દામાલ ચોરી ફરાર થઇ ગઇ હતી. આટલું જ નહિ મહિલા વકીલ પાસે શખ્સ સહિત ચાર લોકોએ યુવતીની માતાની તબિયત ખરાબ કહીને રૂપિયા પણ પડાવ્યા હતા. આ અંગે મહિલા વકીલે ચાર લોકો સામે નારોલ પોલીસ સ્ટેશનમાં ફરિયાદ નોંધાવી છે.

નારોલમાં રહેતા અલ્પાબેન છાટબાર સિટી સિવિલ કોર્ટમાં વકીલાત તરીકે પ્રેક્ટિસ કરે છે. તેમના માતા ચંપાબેન વૃદ્ધ હોઇ અને પુત્રી અભ્યાસ કરતી હોવાથી તેમને ઘરઘાટીની જરૂર હતી. તેથી ઓળખીતાને આ અંગે વાત કરતા તેમનો સંપર્ક ઉત્તર પ્રદેશના આસીફખાન સાથે કરાવ્યો હતો.

આસીફે કાનપુરની ખુશ્બૂ નામની છોકરીનો સંપર્ક કરાવ્યો હતો અને તે તમારા ઘરે ઘરઘાટી તરીકે કામ કરશે અને તમારી માતાનું ધ્યાન રાખશે તેમ જણાવ્યુ હતુ. આસીફ અને તેની પત્ની સુનિતાદેવીએ ખુશ્બૂને નોકરી પર રાખવાની ભલામણ કરીને તેની માતાની તબિયત ખરાબ છે કહીને રૂ. ૩ હજાર માગતા અલ્પાબેને આપ્યા હતા.

અલ્પાબેન પરિવાર સાથે ફરવા ગયા હતા ત્યાંથી તેઓ ખુશ્બૂને લેવા ઉત્તર પ્રદેશ કાસગંજ ગયા હતા. ત્યાં ખુશ્બૂના સંબંધીઓએ તેની માતાની તબિયત ખરાબ છે કહીને રૂ. ૮૪ હજાર માગતા આપ્યા હતા. ખુશ્બૂને લઇને તેઓ અમદાવાદ આવ્યા હતા. ગત ૨૦ જાન્યુઆરીએ ચંપાબેનની સારવાર ચાલતી હોવાથી તેઓ પુત્રના ઘરે ગયા હતા અને અલ્પાબેનને પુત્રી ટ્યૂશનમાં ગઇ હતી.

રાત્રે અલ્પાબેને ઘરે આવતા લોક હતું. ઘર ખોલીને જોતા બધો સામાન અસ્તવ્યસ્ત હતો. તપાસ કરતા સોના-ચાંદીના દાગીના અને રોકડ સહિત કુલ રૂ. ૫.૬૦ લાખનો મુદ્દામાલ ચોરીને ખુશ્બૂ ફરાર થઇ ગઇ હતી. ચાવી પાડોશીને આપીને ગઇ હતી. અલ્પાબેને ખુશ્બૂ, આસીફખાન, સુનિતાદેવી અને દિપેશ બાબુ સામે નારોલ પોલીસ સ્ટેશનમાં ફરિયાદ નોંધાવી છે.SS1MS