રાજકોટમાં બે સગીરે ધો.૫ની બાળકી પર બળાત્કાર ગુજારી ગર્ભવતી બનાવી

રાજકોટ, રાજકોટમાં એક અત્યંત દુઃખદ અને ચોંકાવનારી ઘટના સામે આવી છે. ધોરણ-૫માં અભ્યાસ કરતી એક ૧૨ વર્ષની બાળકી પર તેના જ કુટુંબી સગા અને તેના એક મિત્ર દ્વારા બળાત્કાર કરવામાં આવ્યો હતો.

જેના કારણે બાળકી ગર્ભવતી બની જતાં સમગ્ર પંથકમાં ચકચાર મચી ગઈ છે. પોલીસે આ મામલે પોક્સો એક્ટ હેઠળ ગુનો નોંધી બંને સગીર આરોપીઓની અટકાયત કરી છે અને તેમને બાળ અદાલતમાં રજૂ કરવાની કાર્યવાહી હાથ ધરી છે.પીડિત બાળકી થોડા દિવસો પહેલાં તેના માતા-પિતા સાથે મહારાષ્ટ્રમાં રહેતા એક સગાને ત્યાં વેકેશન માટે ગઈ હતી.

ત્યાં અચાનક તેના પેટમાં દુખાવો થતાં પરિવારજનો તેને હોસ્પિટલ લઈ ગયા હતા. તપાસ દરમિયાન ડોક્ટરે જણાવ્યું કે બાળકી પાંચ મહિનાની ગર્ભવતી છે, જે સાંભળીને તેના માતા-પિતા સ્તબ્ધ થઈ ગયા હતા.માતા-પિતાએ પ્રેમથી પૂછપરછ કરતાં બાળકીએ જણાવ્યું હતું કે તેના પડોશમાં રહેતા એક સગીરે તેની સાથે બળાત્કાર ગુજાર્યાે હતો.

આથી તાત્કાલિક તેના માતા-પિતાએ સ્થાનિક પોલીસ સ્ટેશનમાં ફરિયાદ નોંધાવી હતી. મહારાષ્ટ્ર પોલીસે ઝીરો નંબરથી ગુનો નોંધીને ફરિયાદ રાજકોટ બી-ડિવિઝન પોલીસને મોકલી આપી હતી.

બી-ડિવિઝન પીઆઈ એસ. એસ. રાણે અને હીરાભાઈ રબારીએ આ મામલે તાત્કાલિક તપાસ શરૂ કરી હતી. બાળકીની પૂછપરછ દરમિયાન જાણવા મળ્યું કે તેની સાથે એક નહીં પરંતુ બે સગીરોએ બળાત્કાર કર્યાે હતો. આ બે આરોપીઓમાંથી એકની ઉંમર આશરે ૧૬ વર્ષ છે, જ્યારે બીજાની ઉંમર આશરે ૧૩ વર્ષ છે. ચોંકાવનારી વાત એ છે કે ૧૬ વર્ષનો આરોપી પીડિત બાળકીનો નજીકનો સગો થાય છે.

તેણે બાળકીને ધમકી પણ આપી હતી કે જો તે આ વાત કોઈને કહેશે તો તે તેને જાનથી મારી નાખશે, જેના કારણે બાળકીએ શરૂઆતમાં પોતાના સગાનું નામ માતા-પિતાને જણાવ્યું ન હતું.

પોલીસની તપાસમાં એ પણ સામે આવ્યું છે કે ૧૬ વર્ષના સગાએ બાળકીના માતા-પિતા કામ પર ગયા હોય ત્યારે ઘરે આવીને છ થી સાત વખત દુષ્કર્મ આચર્યું હતું. જ્યારે તેના ૧૩ વર્ષના મિત્રએ ગત નવરાત્રિ દરમિયાન એક વખત તેની સાથે દુષ્કર્મ કર્યું હતું.

પીડિત બાળકીની માતાએ બીજા લગ્ન કર્યા છે અને આ બાળકી તેના પહેલા પતિની પુત્રી છે.હાલમાં બી-ડિવિઝન પોલીસે બંને સગીર આરોપીઓની અટકાયત કરી વધુ તપાસ હાથ ધરી છે.SS1MS