કડી અને વિસાવદર વિધાનસભા મતવિસ્તારની આખરી મતદાર યાદી પ્રસિદ્ધ કરવામાં આવી

Ø  કડી વિધાનસભા મતવિસ્તારમાં 376 મતદારોના વધારા સાથે કુલ 2.89 લાખ મતદાર

Ø  વિસાવદર વિધાનસભા મતવિસ્તારમાં 185 મતદારોના વધારા સાથે કુલ 2.61 લાખ મતદાર

Gandhinagar, આગામી સમયમાં યોજાનાર ગુજરાતની 24 – કડી વિધાનસભા (અ.જા.) અને 87 – વિસાવદર વિધાનસભા બેઠકની ચૂંટણીની તૈયારીઓના ભાગરૂપે તા.05 મે, 2025 ના રોજ બંને વિધાનસભા મતવિસ્તારની આખરી મતદાર યાદી પ્રસિદ્ધ કરવામાં આવી છે. જેમાં કડી વિધાનસભા મતવિસ્તારમાં 152 પુરુષ અને 224 મહિલા મતદારોના વધારા સાથે કુલ 376 મતદારોનો વધારો થયો છે. વિસાવદર વિધાનસભા મતવિસ્તારમાં 24 પુરુષ અને 160 મહિલા તથા 01 ત્રીજી જાતિના મતદારના વધારા સાથે કુલ 185 મતદારોનો વધારો થયો છે. બંને મતવિસ્તારના મળી કુલ 561 મતદારોનો વધારો નોંધાયો છે.

ગુજરાત રાજ્યમાં ખાલી પડેલી મહેસાણા જિલ્લાની 24-કડી (અ.જા.) વિધાનસભા મતવિસ્તારમાં આખરી મતદારયાદી પ્રમાણે 1,49,719 પુરુષ, 1,40,023 મહિલા અને ત્રીજી જાતિના 4 મળી કુલ 2,89,746 મતદારો નોંધાયા છે. જ્યારે જુનાગઢ જિલ્લાની 87-વિસાવદર વિધાનસભા મતવિસ્તારમાં આખરી મતદારયાદી પ્રમાણે 1,35,597 પુરુષ, 1,25,451 મહિલા અને ત્રીજી જાતિના 4 મળી કુલ 2,61,052 મતદારો નોંધાયા છે.

ઉલ્લેખનીય છે કે, ભારતના ચૂંટણી પંચ દ્વારા મતદારયાદીની ખાસ સંક્ષિપ્ત સુધારણા કાર્યક્રમ અંતર્ગત તા.01લી એપ્રિલ, 2025ના રોજ 18 વર્ષ પૂર્ણ કરનાર મતદારોનો સમાવેશ કરવા અને ક્ષતિરહિત અદ્યતન મતદાર યાદી તૈયાર કરવા ચૂંટણી પંચ દ્વારા મતદારયાદીની ખાસ સંક્ષિપ્ત સુધારણા ઝુંબેશ શરૂ કરવામાં આવી હતી. જે અંતર્ગત તા.08 એપ્રિલ, 2025 ના રોજ પ્રસિદ્ધ કરવામાં આવેલી મુસદ્દા મતદાર યાદી મુજબ કડી વિધાનસભા મતવિસ્તારમાં કુલ 2,89,370 જ્યારે વિસાવદર વિધાનસભા મતવિસ્તારમાં કુલ 2,60,867 મતદારો નોંધાયા હતા.

મુખ્ય નિર્વાચન અધિકારીશ્રી હારીત શુકલાએ જણાવ્યું હતું કે, ખાસ સંક્ષિપ્ત સુધારણા ઝુંબેશમાં મતદાર નોંધણી અધિકારી દ્વારા કરવામાં આવેલા નિર્ણય સામે કોઈ મતદારને વાંધો હોય તો મતદાર નોંધણી અધિકારીના નિર્ણય વિરૂદ્ધ The Representation of the People Act, 1950ની કલમ-24 તેમજ The Registration of Electors Rules-1960 ના નિયમ-27 મુજબ સંબંધિત જિલ્લા ચૂંટણી અધિકારીશ્રીને અપીલ કરી શકાશે.