આદિત્ય અને સારા પ્રેમ અંગે પોતાને ઓલ્ડ સ્કૂલ ગણે છે

બુધવારે ટી-સિરીઝે અનુરાગ બાસુની આ ફિલ્મનું ટ્રેલર લોંચ કર્યું, તે જોઈને દર્શકોએ ઘણો હકારાત્મક પ્રતિસાદ આપ્યો છે

આદિત્ય રોય કપુર અને સારા અલી ખાને સમજાવી ‘સિચ્યુએશનશિપ’

મુંબઈ,આદિત્ય રોય કપુર અને સારા અલી ખાનની જોડી અનુરાગ બાસુની ‘મેટ્રો ઇન દિનોં’માં પહેલી વખત મોટા પડદે જોવા મળશે.આ ફિલ્મમાં આદિત્ય કમિટમેન્ટ કરવાથી ડરતા એક યુવાનનો રોલ કરી રહ્યો છે. આ ઓનસ્ક્રીન જોડી હાલ ફિલ્મના પ્રમોશનમાં વ્યસ્ત છે, ત્યારે આજના જમાનાનાં પ્રેમના મોડર્ન ઇન્ટરપ્રિટેશન અંગે બંનેએ વાત કરી છે. આ ફિલ્મના ટ્રેલર લોંચની એક ઇવેન્ટ બુધવારે મુંબઈમાં યોજાઈ હતી. જેમાં તેમને જેન ઝીનાં ડેટિંગ માટે વપરાતા કેટલાંક ખાસ શબ્દો વિશે પ્રશ્નો પૂછાયા હતા, જેમકે, સિચ્યુએશનશિપ, બેંન્ચિંગ અને બ્રેડક્રમ્બિંગ.

આ પ્રશ્નના જવાબમાં આદિત્યએ સામો પ્રશ્ન કર્યાે હતો અને પૂછ્યું,“સિચ્યુએશનશિપ એટલે શું? મને તો એનો શું અર્થ થાય એ પણ ખબર નથી. મને લાગે છે આ મામલે હું થોડો ઓલ્ડ સ્કૂલ છું.” ત્યારે સારા આ પ્રશ્નનો જવાબ આપતાં કહ્યું,“બધાના પોતપોતાના વિચાર છે, પણ હું સિચ્યુશનશિપ કે આવી કોઈ વાતમાં માનતી નથી.”જ્યારે આદિત્ય રોય કપુરે રેડ ફ્લેગ અને ગ્રીન ફ્લેગ વિશે કહ્યું,“રેડ ફ્લેગ એટલે એવી વ્યક્તિ થઈ જેને એકાદ વખત જેલમાં જવું પડ્યું હોય. અને ગ્રીન ફ્લેગ એટલે કોઈ એવું જે દયાળુ હોય. કોઈની કરુણા ઘણી મહત્વની બાબત છે.”

બુધવારે ટી-સિરીઝે અનુરાગ બાસુની આ ફિલ્મનું ટ્રેલર લોંચ કર્યું, તે જોઈને દર્શકોએ ઘણો હકારાત્મક પ્રતિસાદ આપ્યો છે. એક સ્પર્ષી જાય એવો રોમાન્સ અને જીવન બદલી નાખે એવા નિર્ણયો, આ ટ્રેલર એવી વાર્તાઓ દર્શાવે છે, જે વિશ્વમાં કોઇને પણ પોતાની લાગે. આ ફિલ્મમાં આદિત્ય કપુર, સારા અલી ખાન સાથે ફાતિમા સના શેખ, અલી ફઝલ, કોંકણા સેન શર્મા, પંકજ ત્રિપાઠી, અનુપમ ખેર અને નીના ગુપ્તા વિવિધ રોલ કરી રહ્યાં છે. આ ફિલ્મ ૪ જુલાઈએ રિલીઝ થશે.