કચરાની ડોલ હટાવવા મુદ્દે પાડોશી બાખડ્યા

એક જ પરિવારના બે સભ્યો વચ્ચે બબાલ થઇ

આ મામલે પોલીસને જાણ કરાતા પોલીસે બંને પક્ષના લોકો સામે ગુનો નોંધી તપાસ હાથ ધરી છે

અમદાવાદ,માધવપુરામાં આવેલા દૂધેશ્વર રોડ પર કચરની ડોલ મૂકવા બાબતે બબાલ થઇ હતી. પાડોશીઓ વચ્ચે થયેલા ઝઘડા બાદ મામલો બિચક્યો હતો. જે બાદ બંને પક્ષે મારામારીનો બનાવ બનવા પામ્યો હતો. ત્યારે એક શખ્સે છોકરીની આબરૂ લેવા માટે તેના કપડાં ફાડી નાખ્યા હતા. આ મામલે પોલીસને જાણ કરાતા પોલીસે બંને પક્ષના લોકો સામે ગુનો નોંધી તપાસ હાથ ધરી છે. દૂધેશ્વર વિસ્તારમાં આવેલી સરકારી સ્કૂલ પાસે પાડોશમાં રહેતા એક જ પરિવારના બે સભ્યો વચ્ચે બબાલ થઇ હતી.

અહીં રહેતી ૪૦ વર્ષીય મહિલા તેના ઘરે હાજર હતી ત્યારે તેના પરિવારજને કચરાની ડોલ ઘર પાસે મૂકી હતી. જે હટાવવા બાબતે બંને પક્ષે બોલાચાલી થઇ હતી. મહિલાના પરિવારજને આ બાબતે ઝઘડો કર્યાે હતો. જે બાદ પાડોશીએ ઉશ્કેરાઇને મારામારી કરી હતી. ત્યારે ત્યાં હાજર મહિલાની દીકરીની આબરૂ લેવાના ઇરાદે શખ્સે તેની પર હુમલો કરીને કપડાં ફાડી નાખ્યા હતા.

આ મામલે પોલીસને જાણ કરાતા પોલીસે સામેના પક્ષના લોકો સામે ગુનો નોંધી તપાસ હાથ ધરી છે. જ્યારે સામેના પક્ષના લોકોએ પણ મહિલા અને તેના પરિવારના સભ્યો પર આક્ષેપ કર્યાે હતો. ૪૦ વર્ષીય મહિલાએ કચરાની ડોલ ફેંકી દીધા બાદ મામલો બિચક્યો હતો. ત્યારે મહિલાના પરિવારના સભ્યોએ પણ મારામારી કરીને લાકડીના ફટકા માર્યા હતા. આ મામલે માધવપુરા પોલીસે બંને પક્ષના લોકો સામે ગુનો નોંધી તપાસ હાથ ધરી છે.SS1