ટ્રમ્પના બેવડાં કાટલાંઃ ચીન પર ટેરિફની મુદ્દત ૯૦ દિવસ લંબાવી

ન્યૂ યોર્ક, ભારત પર ૫૦ ટકાનો જંગી ટેરિફ લાદનાર અમેરિકન પ્રમુખ ડોનાલ્ડ ટ્રમ્પે ચીન પર ટેરિફ લાદવાની મુદ્દત વધુ ૯૦ દિવસ લંબાવી છે તેમ વ્હાઈટ હાઉસના એક પ્રવક્તાએ જણાવ્યું હતું. શું અમેરિકા ચીન પર ટેરિફ લાદવાની ૧૨ ઓગસ્ટની મુદ્દત લંબાવશે તેવા એક પ્રશ્નનો ઉત્તર ટાળ્યાના ગણતરીના કલાકોમાં જ ટ્રમ્પે આ નિર્ણયને મંજૂરી આપતા એક આદેશ પર હસ્તાક્ષર કર્યાં હતાં.

અગાઉ રશિયાનું ઓઈલ ખરીદતા ચીન ઉપર ટેરિફ અંગે ટ્રમ્પે વધુ ટેરિફ લાગુ કરવાનો હાલમાં કોઈ નિર્ણય કર્યાે નથી તેમ અમેરિકાના રાષ્ટ્રપતિ જે ડી વેન્સે જણાવ્યું હતું. ટ્રમ્પ આ મામલે વિચાર કરી રહ્યા છે પરંતુ હજુ સુધી નિર્ણય પર પહોંચ્યા નથી. વોશિંગ્ટન અને બેઇજિંગ વચ્ચેના સંબંધોની અન્ય ઘણી બાબતો પર અસર પડી શકે છે અને તેને રશિયાની પરિસ્થિતિ સાથે ખાસ લેવાદેવા નથી તેમ ઉપરાષ્ટ્રપતિએ ઉમેર્યું હતું.

શું ભારત બાદ રશિયાનું ઓઈલ ખરીદતા ચીન ઉપર પણ અમેરિકા વધુ આકરાં ટેરિફ લાગુ કરશે તેવા પ્રશ્નના જવાબમાં વેન્સે જણાવ્યું કે, દેખીતી રીતે અમેરિકાના સંબંધોને જોતા ચીનનો મુદ્દો થોડો જટિલ છે, અન્ય બાબતોને તે વધુ અસર કરે છે અને રશિયાની સ્થિતિને તેની સાથે ખાસ સંબંધ નથી.

રાષ્ટ્રપતિ ટ્રમ્પ તેમની પાસેના વિકલ્પોની સમીક્ષા કરી રહ્યા છે અને જ્યારે તેઓ નિર્ણય પર આવશે ત્યારે તે લાગુ કરી શકે છે. અમેરિકાએ ભારત પર કુલ ૫૦ ટકા ટેરિફ લાગુ કર્યાે છે જે વિશ્વના અન્ય દેશોની તુલનાએ સૌથી વધુ છે. ભારતે ટ્રમ્પના આ નિર્ણયને વખોડતાં તેને અન્યાયી અને ગેરવાજબી ગણાવ્યો હતો. ભારતે જણાવ્યું હતું કે, રાષ્ટ્રહિતને સુરક્ષિત રાખવા તે તમામ જરૂરી પગલાં લેશે.SS1MS