સસરાની અઘટિત માગણી, પતિના ત્રાસથી કંટાળી પરિણીતાએ ફાંસો ખાધો

અમદાવાદ, અમરાઇવાડીમાં લગ્નના બે મહિના બાદ પતિ, કાકા સસરા અને સસરાએ પરિણીતાને હેરાન કરવાનું શરૂ કર્યુ હતું. સસરા પુત્રવધૂની અવારનવાર છેડતી કરી શારીરિક સંબંધની માગણી કરતા હતા.

પતિ પણ પત્ની પર ખોટી શંકા રાખીને મારઝૂડ કરતો હતો. ત્રણ વખત સમાજના આગેવાનોએ સમાધાન કરાવ્યું છતાં સસરા સુધરવાનું નામ લેતો ન હતો. કંટાળીને પરિણીતાએ ફાંસો ખાઇને આપઘાત કર્યાે હતો. આ અંગે મૃતકની માતાએ ત્રણેય સામે અમરાઇવાડી પોલીસ સ્ટેશનમાં દુષ્પ્રેરણાની ફરિયાદ નોંધાવી છે. અમરાઇવાડીમાં ૪૨ વર્ષીય મહિલા પરિવાર સાથે રહે છે. તેમની ૨૨ વર્ષીય મોટી પુત્રીના લગ્ન મેઘાણીનગરના યુવક સાથે અઢી વર્ષ પહેલાં થયા હતા. લગ્ન બાદ પરિણીતા સંયુક્ત પરિવારમાં રહેવા ગઇ હતી.

બે મહિના બાદ પતિ, સસરા અને કાકા સસરાએ પરિણીતાને ત્રાસ આપવાનું શરૂ કર્યુ હતુ. પરિણીતા પિયરમાં જતી તે સમયે માતાને જણાવતી કે પતિ બરોબર રાખતો નથી. સસરા અવારનવાર છેડતી કરે છે અને ખરાબ નજરથી જોવે છે. માતા-પિતાએ પરિણીતાને સમજાવીને પરત મોકલી હતી તેમ છતાં પતિ અને સસરાની વર્તણૂકમાં ફરક પડ્યો ન હતો.

સસરાએ છેડતી કરવાનું ચાલુ રાખ્યું હતું અને શારીરિક સંબંધ બાંધવાની માગણી કરતો હતો. પરિણીતા ના પાડે તો ટોર્ચર કરી મારઝૂડ કરતા હતા. તેથી પરિણીતા પરત પિયરમાં રહેવા ગઇ હતી.

સસરા પુત્રવધૂના પિયરમાં જઇને ગાળો બોલીને તું પરત નહીં આવે તો પતિને મારી નાખીશ તેવી ધમકી આપી જતા રહ્યા હતા. બાદ સમાજના આગેવાનોએ સમાધાન કરાવતા પરિણીતા સાસરીમાં ગઇ હતી. તેમાં કાકા સસરાએ કોઇ તેને હેરાન નહીં કરે તેવી જવાબદારી લીધી છતાં સસરા સુધરવાનું નામ લેતો ન હતો.

કાકા સસરાને કહેતા તે પણ તેનું ઉપરાણું લઇને પરિણીતાને હેરાન કરતા હતા. બાદ પરિણીતા અને પતિ અમરાઇવાડીમાં ભાડેથી મકાનમાં રહેવા આવ્યા ત્યાં પણ સસરા આવીને છેડતી કરી અભદ્ર માગણી કરતા હતા. પતિને આ અંગે કહેતા પત્ની પર ખોટી શંકા કરીને હું તારાથી કંટાળી ગયો છું, મારે તને નથી રાખવી કહીને હેરાન કરતો હતો. પતિ છેલ્લા ૧૫ દિવસથી વધુ ટોર્ચર કરતો હતો.

કંટાળીને પરિણીતાએ ૨ ઓગસ્ટે રાત્રે ફાંસો ખાઇ આપઘાત કરી લીધો હતો. મૃતકની માતાએ અમરાઇવાડી પોલીસ સ્ટેશનમાં જમાઇ, વેવાઇ અને કાકા સસરા સામે દુષ્પ્રેરણાની ફરિયાદ નોંધાવી છે.SS1MS