કોલકાતા લા કોલેજ ગેંગરેપ કેસમાં ૪ વિરુદ્ધ ચાર્જશીટ દાખલ

કોલકાતા, કોલકાતાના ચકચારી લા કોલેજ ગેંગરેપ કાંડમાં ૫૮ દિવસ બાદ પોલીસે શનિવારે ચાર લોકો સામે ચાર્જશીટ દાખલ કરી હતી. લાની વિદ્યાર્થીની પર કેમ્પસમાં જ આચરવામાં આવેલા દુષ્કર્મના કેસમાં મુખ્ય આરોપીની ધરપકડ કરાઈ હતી.

પીડિતાએ ૨૫ જૂનના રોજ સાંજે અને રાત્રે એમ બે વખત બળાત્કાર ગુજારવામાં આવ્યો હોવાનું ફરિયાદમાં જણાવ્યું હતું. મુખ્ય આરોપી મનોજિત મિશ્રા (૩૧), તેના બે સાથી અને લાના વિદ્યાર્થીઓ પ્રમિત મુખોપાધ્યાય (૨૦) અને ઝૈબ અહેમદ (૧૯) ઉપરાંત પકડાયેલો સિક્યોરિટી ગાર્ડ પિનાકી બેનરજી (૫૧)ના નામનો પણ ચાર્જશીટમાં ઉલ્લેખ કરાયો છે.

આરોપીઓ વિરુદ્ધ બીએનએસ હેઠળ સામુહિક બળાત્કાર, ગોંધી રાખવું, ગંભીર ઈજાઓ પહોંચાડવી, મોતની ધમકી, સમાન ઈરાદા સાથે ગુનો આચરવો તથા ઈન્ફર્મેશન ટેન્કોલોજી કાયદાની કલમો લગાવવામાં આવી છે.

શનિવારે અલિપોર ચીફ જ્યુડિશિયલ મેજિસ્ટ્રેટ કોર્ટમાં વિવિધ દસ્તાવેજો અને પેનડ્રાઈવ સાથે ૬૫૮ પાનાની ચાર્જશીટ દાખલ કરવામાં આવી હતી.SS1MS