આખજમાં પેટ્રોલ છાંટી જમાઈનો સસરાને સળગાવવાનો પ્રયાસ

મહેસાણા, મહેસાણા તાલુકાના આખજ ગામે દીકરીને લેવા ગયેલા સસરા સાથે જમાઈએ તકરાર કરી હતી અને વેવાણે અપશબ્દો બોલ્યા હતા. ઉશ્કેરાઈ ગયેલા જમાઈએ સસરા પર પેટ્રોલ છાંટ્યા બાદ તેના ભાગીદારે દિવાસળી ચાંપી સળગાવતાં ત્રણેય સામે લાંઘણજ પોલીસ મથકે હત્યાના પ્રયાસનો ગુનો નોંધાયો છે.

બનાસકાંઠાના વડગામ તાલુકાના કોદરામ ખાતે રહેતા દિનેશભાઈ મફતલાલ વાઘેલા (ઉં. ૫૫) ડ્રાઈવિંગનો વ્યવસાય કરે છે અને તેમની મોટી પુત્રી સંગીતાબેનને ચારેક વર્ષ અગાઉ મહેસાણા તાલુકાના આખજ ગામે રહેતા દંતાણી સંજયકુમાર પોપટલાલ સાથે પરણાવેલી છે.

ગત મંગળવારે બપોરે ત્રણેક વાગ્યે દિનેશભાઈ તથા તેમનો ભાણો ઉમંગભાઈ તેમની કાર લઈને આખજ રહેતી તેમની પુત્રી સંગીતાને લેવા ગયા હતા. સંગીતાબેનના ખબરઅંતર પૂછીને દિનેશભાઈએ તેને સાથે તેમના ઘરે લઈ જવા બાબતે વેવાણ કસ્તુરીબેનને પૂછતાં તેમણે ના પાડી હતી.

જેથી સંજયકુમારને પૂછતાં તેમણે તમારી પાસે અમારે જે રૂપિયા લેવાના છે તે આપી દો તેમ કહેતાં બંને વચ્ચે બોલાચાલી થઈ હતી. તે વખતે કસ્તુરીબેન અપશબ્દો બોલાવા લાગ્યાં હતાં અને સંજયકુમારે ઉશ્કેરાઈ જઈ ઘરમાં પડેલી બોટલમાંથી દિનેશભાઈ ઉપર પેટ્રોલ છાંદી દીધું હતું.

તે વખતે તેમની પાછળ બેઠેલા સંજયકુમારના ભાગીદાર ચાવડા કરણસિંહે દિવાસળી ચાંપી દેતાં દિનેશભાઈ સળગી ઉઠ્યા હતા અને સળગતા સળગતા ઘરની બાજુમાં પડેલી માટીમાં જઈને પડ્યા હતા.

ઉમંગભાઈ તેમને ૧૦૮ની એમ્બ્યુલન્સમાં સારવાર માટે મહેસાણા સિવિલ હોસ્પિટલમાં લઈ ગયા હતા. જ્યાં પ્રાથમિક સારવાર આપી દિનેશભાઈને વધુ સારવાર માટે અમદાવાદ સિવિલમાં રિફર કરાયા હતા.SS1MS