કપિલ શર્માએ મુંબઇને બોમ્બે કહેતા મનસે દ્વારા વિરોધ કરાયો

મુંબઈ, કોમેડિયન એક્ટર કપિલ શર્મા ફરી એક વખત વિવાદમાં ફસાયો છે. થોડાં વખત પહેલાં કૅનેડામાં તેના કેફેમાં સિખ સમાજની લાગણીઓ દુભાવાના આરોપસર હુમલો કરવામાં આવ્યો હતો. હવે તેને મહારાષ્ટ્ર નવનિર્માણ સેનાએ નિશાન બનાવ્યો છે.

મનસેના ફિલ્મ વિંગના નેતા અમેયા ખોપકરે તેના માટે એક ચેતાવણી જાહેર કરી છે, જેમાં તેને પોતાના નેટફ્લિક્સ પરના શો ધ ગ્રેટ ઇન્ડિયન કપિલ શર્મા શોમાં મુંબઈના બદલે બોમ્બે કે પછી બમ્બઈના કહેવા માટે ચેતવ્યો છે. ખોપકરે નિવેદનમાં કહ્યું કે મનસે દ્વારા કપિલ શર્મા વિરુદ્ધ વિરોધ પ્રદર્શન કરવામાં આવશે.“આ શહેરનું નામ મુંબઇ છે.

કપિલ શર્માના શોમાં અમે લાંબા સમયથી જોતા આવ્યા છીએ કે આ શહેરને તેઓ બોમ્બે કે બમ્બઈ કહે છે. આ માત્ર એક વાંધો નથી, આ ગુસ્સો છે. જો તમે અન્ય શહેરોને તેમના યોગ્ય નામ ચેન્નઈ, બેંગલુરુ અને કોલકાતા કહેતા હોય તો આ શહેરનું આવું અપમાન કેમ? મુંબઈ તમારી કર્મભૂમિ છે. આ શહેરનું અપમાન કરશો નહીં, મુંબઈનાં લોકોનું અપમાન કરશો નહીં.”

આગળ તેમણે કહ્યું, “જો આવું ભૂલથી થયું હોય, તો આ ભૂલ સુધારી લો. તમારા શોમાં જે પણ આવે છે, તેઓ કોઈ સેલેબ્રિટી હોય કે પછી એન્કર્સ, તેમને જણાવો કે બોમ્બે કે બમ્બઈ નહીં, પણ મુંબઈ બોલવાનું. જો આવું નહીં થાય તો ઉગ્ર વિરોધ પ્રદર્શન કરવામાં આવશે.”SS1MS