ગુજરાતમાં ૧૬ હજારથી વધુ સ્ટાર્ટઅપ્સ કાર્યરત છે, જેને સરકાર દ્વારા સસ્ટેનન્સ એલાઉન્સ અને સીડ સપોર્ટ આપવામાં આવે છે*
*રાજ્ય સરકારનું આ બજેટ ગુજરાતને ૨૦૪૭ સુધીમાં વિકસિત ભારતનું પ્રેરક એન્જિન બનાવશે : શ્રી જીતુભાઈ વાઘાણી*
સેમિકન્ડક્ટર ક્ષેત્રે ગુજરાત દેશનું અગ્રેસર રાજ્ય બન્યું, ધોલેરામાં ટાટા ઇલેક્ટ્રોનિક્સ દ્વારા રૂ.૯૧ હજાર કરોડના રોકાણ સાથે દેશનો પ્રથમ સેમિકન્ડક્ટર ફેબ્રિકેશન પ્લાન્ટ આકાર લઈ રહ્યો છે
એક જ વર્ષમાં MSME એકમોમાં રૂ.૩૮ હજાર કરોડથી વધુનું રોકાણ આવ્યું છે અને ૧.૪૦ લાખથી વધુ નવી રોજગારીઓ ઊભી થઈ: મોટા ઉદ્યોગોમાં પણ રૂ.૬૩ હજાર કરોડના રોકાણ સાથે ૨.૫૦ લાખ જેટલી પ્રત્યક્ષ અને પરોક્ષ રોજગારીનું સર્જન થયું
*ગુજરાતના ગૌરવ સમાન કાપડ ઉદ્યોગને વૈશ્વિક કક્ષાએ લઈ જવા ₹૨૭૫૫ કરોડ ફાળવાયા છે, જેના ફળસ્વરૂપે કાપડ ક્ષેત્રે ₹૧૮ હજાર કરોડનું મૂડી રોકાણ અને ૫૦ હજાર યુવાનોને રોજગારી પ્રાપ્ત થઈ*
સ્ટાર્ટઅપ અને કુટિર ઉદ્યોગમાં ગુજરાત સરકારે વિશ્વમાં ડંકો વગાડ્યો: નેશનલ સ્ટાર્ટઅપ રેન્કિંગમાં ગુજરાત સતત પાંચમી વખત દેશમાં ‘બેસ્ટ પર્ફોમર‘ જાહેર થયું- *ઉદ્યોગ વિભાગની માંગણીઓ વિધાનસભા ગૃહમાં પસાર
વિધાનસભા ગૃહમાં આજે ઉદ્યોગ અને ખાણ વિભાગની અંદાજપત્રીય માંગણીઓ પરની ચર્ચાનો જવાબ આપતા, ઉદ્યોગ મંત્રીશ્રી વતી મંત્રી શ્રી જીતુભાઈ વાઘાણીએ જણાવ્યું હતું કે, અગાઉના શાસનમાં યુવાનો પાસે સુવિધાઓ નહોતી અને ઉદ્યોગપતિઓ પાસે ઇન્ફ્રાસ્ટ્રક્ચરનો અભાવ હતો, પરંતુ વડાપ્રધાન શ્રી નરેન્દ્રભાઈ મોદી નેતૃત્વમાં ગુજરાતમાં મુખ્યમંત્રી શ્રી ભૂપેન્દ્રભાઈ પટેલ અને નાયબ મુખ્યમંત્રી શ્રી હર્ષ સંઘવીના માર્ગદર્શન હેઠળ સરકારે ગુજરાતના સર્વાંગી વિકાસ માટે તિજોરીના દ્વાર ખોલી નાખ્યા છે.
તેમણે ગૃહમાં વર્ષ ૨૦૨૬-૨૭ ના બજેટની વિસ્તૃત વિગતો આપતા કહ્યું કે, ઉદ્યોગ અને ખાણ વિભાગ માટે ₹૧૩,૯૪૨ કરોડની ઐતિહાસિક જોગવાઈ કરવામાં આવી છે. આ ઉપરાંત પ્રવાસન, રમતગમત અને યુવક સેવા સાંસ્કૃતિક સહિતના સંલગ્ન વિભાગો માટે કુલ મળીને ₹૨૩,૦૦૦ કરોડથી વધુનું માતબર આયોજન કરવામાં આવ્યું છે, જે ગુજરાતના ભાવિ વિકાસનો મજબૂત રોડમેપ છે.
રાજ્યની આર્થિક કરોડરજ્જુ સમાન MSME એકમો માટે રાજ્ય સરકારે ‘આત્મનિર્ભર ગુજરાત સ્કીમ’ હેઠળ ₹૧૭૭૫ કરોડ ફાળવ્યા છે, જે ઉદ્યોગ સાહસિકોને મૂડી અને વ્યાજ સહાય પૂરી પાડશે તેવો વિશ્વાસ વ્યક્ત કરીને મંત્રીશ્રીએ આંકડાકીય માહિતી આપતા જણાવ્યું કે, વર્ષ ૨૦૨૫-૨૬ માં જ MSME એકમોમાં ₹૩૮,૦૦૦ કરોડથી વધુનું રોકાણ આવ્યું છે અને ૧.૪૦ લાખથી વધુ નવી રોજગારીઓ ઊભી થઈ છે.
તેવી જ રીતે, ગુજરાતના ગૌરવ સમાન કાપડ ઉદ્યોગને વૈશ્વિક કક્ષાએ લઈ જવા ₹૨૭૫૫ કરોડ ફાળવાયા છે, જેના ફળસ્વરૂપે કાપડ ક્ષેત્રે ₹૧૮,૦૦૦ કરોડનું મૂડી રોકાણ અને ૫૦,૦૦૦ યુવાનોને રોજગારી પ્રાપ્ત થઈ છે. મોટા ઉદ્યોગોમાં પણ ₹૬૩,૦૦૦ કરોડના રોકાણ સાથે ૨.૫૦ લાખ જેટલી પ્રત્યક્ષ અને પરોક્ષ રોજગારીનું સર્જન કરીને રાજ્ય સરકારે રોજગારના ક્ષેત્રે વિપક્ષની ટીકાઓનો જડબાતોડ જવાબ આપ્યો છે.
સ્માર્ટ ઇન્ફ્રાસ્ટ્રક્ચર, સેમિકન્ડક્ટર ક્રાંતિ અને ધોલેરા ‘સેમિકોન સિટી’ સંદર્ભે ગૃહમાં મંત્રી શ્રી વાઘાણીએ કહ્યું કે, GIDC વસાહતોને આધુનિક બનાવવાની દિશામાં રાજ્ય સરકારે ૧૨૦ નાની વસાહતોના નવીનીકરણ માટે ₹૫૦ કરોડ અને માંડલ-દહેજ જેવી ૧૦ વસાહતોને ‘સ્માર્ટ અને ગ્રીન ઇન્ડસ્ટ્રિયલ એસ્ટેટ’ માં રૂપાંતરિત કરવા વધુ ₹૫૦ કરોડની જોગવાઈ કરી છે, જ્યાં CCTV અને EV ચાર્જિંગ જેવી સુવિધાઓ હશે.
સેમિકન્ડક્ટર ક્ષેત્રે ગુજરાત દેશનું અગ્રેસર રાજ્ય બન્યું છે અને ધોલેરામાં ટાટા ઇલેક્ટ્રોનિક્સ દ્વારા ₹૯૧,૦૦૦ કરોડના રોકાણ સાથે દેશનો પ્રથમ સેમિકન્ડક્ટર ફેબ્રિકેશન પ્લાન્ટ આકાર લઈ રહ્યો છે. ધોલેરાને ‘સેમિકોન સિટી’ બનાવવા માટે ત્યાં સ્કૂલ, હોસ્પિટલ અને આવાસ જેવી પાયાની સુવિધાઓ પણ વિકસાવવામાં આવી રહી છે. પર્યાવરણની રક્ષા માટે અંકલેશ્વર અને સાયખામાં ડીપ-સી ડિસ્ચાર્જ પ્રોજેક્ટ્સ પણ પૂર્ણતાના આરે છે.
મંત્રીશ્રીએ વધુમાં જણાવ્યું કે, આદિવાસી વિસ્તારોના વિકાસ માટે રાજ્ય સરકાર ૫ નવા ‘ટ્રાઈબલ ઔદ્યોગિક પાર્ક’ સ્થાપવા જઈ રહી છે. વનબંધુ ઇન્ક્યુબેશન અને કૌશલ્ય વર્ધન જેવી યોજનાઓ દ્વારા આદિવાસી યુવાનોને ₹૨ લાખ સુધીની આર્થિક સહાય આપી ઉદ્યોગ સાહસિક બનાવવામાં આવશે. મહિલા કામદારો માટે ઔદ્યોગિક વસાહતોમાં ‘વુમન્સ હોસ્ટેલ’ અને આંગણવાડીની સુવિધાઓ ઊભી કરવા વિશેષ ફંડ ફાળવાયું છે. મંત્રીશ્રીએ ઉમેર્યું કે, ગુજરાતમાં હવે ‘ઇન્સ્પેક્ટર રાજ’ ના અંત આવી ગયો છે. જેને વધુ મક્કમતાથી અમલમાં લાવવા માટે રાજ્ય સરકારે ‘ગુજરાત જન વિશ્વાસ અધિનિયમ ૨૦૨૫’ પસાર કરી ૧૧ કાયદાઓની ૫૧૬ જોગવાઈઓને ગુનારહિત (Decriminalize) કરી છે, જેથી વેપારીઓ ભયમુક્ત રીતે વ્યવસાય કરી શકે.
સ્ટાર્ટઅપ અને કુટિર ઉદ્યોગમાં ગુજરાત સરકારે વિશ્વમાં ડંકો વાગ્યો છે તેમ જણાવતા મંત્રીશ્રીએ ગૌરવભેર જણાવ્યું કે, નેશનલ સ્ટાર્ટઅપ રેન્કિંગમાં ગુજરાત સતત પાંચમી વખત દેશમાં ‘બેસ્ટ પર્ફોમર’ જાહેર થયું છે. રાજ્યમાં ૧૬,૦૦૦ થી વધુ સ્ટાર્ટઅપ્સ કાર્યરત છે, જેને સરકાર દ્વારા માસિક સસ્ટેનન્સ એલાઉન્સ અને સીડ સપોર્ટ આપવામાં આવે છે. છેવાડાના માનવી અને કારીગરો માટે કુટિર ઉદ્યોગ પ્રભાગમાં ₹૯૭૯ કરોડની ફાળવણી કરાઈ છે, જેમાં વાજપાઈ બેંકેબલ યોજના હેઠળ ₹૪૯૪ કરોડની સબસિડીનો સમાવેશ થાય છે. હવે ગુજરાતના પરંપરાગત કારીગરોનો માલ ઇ-કોમર્સના માધ્યમથી વિશ્વના બજારો સુધી પહોંચશે.
મંત્રીશ્રીએ ‘ગુજરાત સ્ટેટ એક્ષ્પોર્ટ પ્રમોશન કાઉન્સિલ’ની સ્થાપનાની માહિતી આપીને વિશ્વાસ વ્યક્ત કર્યો હતો કે આ બજેટ ગુજરાતને ૨૦૪૭ સુધીમાં વિકસિત ભારતનું પ્રેરક એન્જિન બનાવશે. ઉદ્યોગ વિભાગની માંગણીઓ વિધાનસભા ગૃહમાં પસાર કરવામાં આવી હતી.
