ભથવાડા ટોલનાકા પર વિદેશી દારૂનો જથ્થો ઝડપાયો

બોલેરો ગાડી, બે મોબાઈલ ફોન સહિત રૂ. ૪.૩૭ લાખના મુદ્દામાલ સાથે ચાલક સહિત બેની અટકાયત

(પ્રતિનિધિ)દેવગઢ બારીયા,  પેટ્રોલિંગમાં નીકળેલ પિપલોદ પોલીસે ભથવાડા ટોલનાકા પરથી રૂપિયા ૨.૫૩ લાખ ઉપરાંત ની કિંમતના વિદેશી દારૂ સાથે બોલેરો કેમ્પર ગાડી પકડી પાડી, રૂપિયા ૪૦૦૦/-ની કુલ કિંમતમાં બે મોબાઈલ ફોન તથા રૂપિયા ૧.૮૦ લાખની કિંમતની બોલેરો કેમ્પર ગાડી મળી કુલ રૂપિયા ૪,૩૭,૧૧૬/-ના મુદ્દામાલ સાથે ગાડીના ચાલક સહિત બે જણાની અટકાયત કરી હોવાનું પોલીસ સૂત્રો દ્વારા સત્તાવાર જાણવા મળ્યું છે.

પ્રાપ્ત વિગત અનુસાર ગઈકાલે બપોરે પીપલોદ પોલીસ સ્ટેશનના પી.એસ.આઇ જી.બી. રાઠવા, એ.એસ.આઇ અનિલ કુમાર બળવંતસિંહ, પોલીસ કોન્સ્ટેબલ વસંતકુમાર માનાભાઈ, અલ્કેશ કુમાર રમણભાઈ તથા રાજેશભાઈ ભગવાનભાઈ વગેરે સરકારી ગાડીમાં પોતાના પોલીસ સ્ટેશનના હદ વિસ્તારમાં પેટ્રોલિંગમાં નીકળ્યા હતા.

તે દરમિયાન પોલીસ કોન્સ્ટેબલ વસંતકુમાર માનાભાઈને બાતમી મળી હતી કે, એક સફેદ કલરની જીજે ૧૨ એફ.બી-૨૨૫૭ નંબરની મહિન્દ્રા કંપનીની બોલેરો કેમ્પર ગાડી વિદેશી દારૂનો જથ્થો ભરી ભથવાડા ટોલનાકા પરથી પસાર થનાર છે. જે બાતમીને આધારે પિપલોદ પોલીસની ઉપરોક્ત ટીમ મારતી મોટરે તાત્કાલિક ભથવાડા ટોલનાકા ખાતે પહોંચી ગઈ હતી.

તેવામાં બાતમીમાં દર્શાવેલ નંબર વાળી સફેદ કલરની બોલેરો કેમ્પર ગાડી ત્યાં આવતા જ પોલીસે હાથનો ઇશારો કરી તે ગાડી રોડની સાઈડમાં ઉભી રખાવી હતી અને ગાડીમાં તપાસ કરતા કેમ્પર ગાડીના ડાલાના નીચેના ભાગે તેમજ કેબીનના ઉપરના ભાગે બનાવેલ ચોરખાનામાં સંતાડી રાખેલ રૂપિયા ૨,૫૩,૧૧૬/-ની કુલ કિંમતની ભારતીય બનાવટના વિદેશી દારૂની કાચની

તથા પ્લાસ્ટિકની નાની-મોટી બોટલ નંગ-૪૯૧ પકડી પાડી કેમ્પર ગાડી ના ચાલક મધ્યપ્રદેશના ઝાબુઆ જિલ્લાના રાણાપુર તાલુકાના સોતીયા જાલમ ગામના મુકેશભાઈ કિલણભાઈ પરમાર તથા મધ્યપ્રદેશના ઝાબુઆ જિલ્લાના રાણાપુર તાલુકાના રૂપાખેડા ગામના નિશાળ ફળિયામાં રહેતા વિજય કુમાર ગુલાબસિંહ પરમાર એમ બંનેની અટકાયત કરી બંનેની અંગ ઝડતી લઈ

રૂપિયા ૪૦૦૦/-ની કુલ કિંમતના મોબાઈલ ફોન નંગ-૨ પકડી પાડી સદર દારૂમાં જથ્થાની હેરાફેરીમાં ઉપયોગમાં લેવાયેલ રૂપિયા ૧,૮૦,૦૦૦/-ની કિંમતની સફેદ કલરની મહિન્દ્રા કંપનીની બોલેરો કેમ્પર ગાડી મળી કુલ રૂપિયા ૪,૩૭,૧૧૬/-નો મુદ્દામાલ કબજે લઈ પકડાયેલા ગાડીના ચાલક સહિત બે જણા વિરુદ્ધ પ્રોહિબિશનનો ગુનો નોંધી આગળની કાર્યવાહી હાથ ધરી છે.