બેંગકોકના પબમાં ભીષણ આગ લાગતાં 27 લોકોના મોત: પાવર કટ થતાં લોકો ઇમરજન્સી એક્ઝિટ શોધી શક્યા નહીં

• દુર્ઘટનામાં ૬૩ લોકો ઘાયલ, જેમાંથી ૨૨ની હાલત ગંભીર છે.-શ્વાસમાં ઝેરી ધુમાડો જવાથી મોટાભાગના લોકોના મોત નીપજ્યા.
• સ્ટેજ નજીક શોર્ટ સર્કિટ અને બ્લાસ્ટથી આગ લાગી હતી.

બેંગકોક, ૧૩ જુલાઈ: બેંગકોકના ચતુચક જિલ્લામાં લાત ફ્રાઓ રોડ નજીક એક પબમાં લાગેલી ભીષણ આગમાં ૨૭ લોકોના મોત થયા છે અને અન્ય ડઝનબંધ લોકો ઘાયલ થયા છે, તેમ થાઈ મીડિયાએ અહેવાલ આપ્યો છે.

સ્થાનિક સમય અનુસાર રાત્રે લગભગ ૧૧:૫૭ વાગ્યે આગ ફાટી નીકળી હતી, જેને પાછળથી કાબૂમાં લેવામાં આવી હતી. ઘાયલોને સારવાર માટે હોસ્પિટલમાં દાખલ કરવામાં આવ્યા છે.

27 dead and 18 injured as tragedy strikes Bangkok nightlife Late last night, a massive fire engulfed the popular entertainment venue “Rong Beer at Ladprao” near the Ladprao Intersection. Emergency services responded around midnight to a fierce blaze, with thick smoke and flames visible from blocks away.

સિન્હુઆ ન્યૂઝ એજન્સીના અહેવાલ મુજબ, થાઈલેન્ડના વડાપ્રધાન અનુતિન ચાર્નવિરાકુલ સોમવારે લગભગ ૧:૪૪ વાગ્યે ઘટનાસ્થળે પહોંચ્યા હતા અને જણાવ્યું હતું કે મોટાભાગના પીડિતોના મોત ધુમાડો શ્વાસમાં જવાને કારણે ગૂંગળામણથી થયા છે. આગ લાગવાના કારણની તપાસ ચાલી રહી છે.

બીજી તરફ, બેંગકોકના ગવર્નર ચડચાર્ટ સિત્તિપંતે સોમવારે જણાવ્યું હતું કે, થાઈલેન્ડની રાજધાની બેંગકોકમાં રવિવારે મોડી રાત્રે પબમાં લાગેલી આ ઘાતક આગમાં ઘાયલ થયેલા ૬૩ લોકોમાંથી ૨૨ લોકોની હાલત હજુ પણ ગંભીર છે.

આગની ઘટનાસ્થળની મુલાકાત લીધા બાદ સ્થાનિક મીડિયા સાથે વાત કરતા ચડચાર્ટે જણાવ્યું કે ઇમરજન્સી કોલ મળ્યાના ટૂંક સમયમાં જ ફાયર ફાઇટરો ઘટનાસ્થળે પહોંચી ગયા હતા, પરંતુ તેઓ પહોંચ્યા ત્યાં સુધીમાં આગ પબની અંદર ખૂબ જ ઝડપથી ફેલાઈ ચૂકી હતી.

ચડચાર્ટે ઉમેર્યું કે ૨૭ મૃતકોમાંથી અત્યાર સુધી માત્ર છ લોકોની જ સત્તાવાર ઓળખ થઈ શકી છે. હાલમાં મૃતકો અને ઘાયલોના પરિવારોનો સંપર્ક કરવો એ તેમની પ્રાથમિકતા છે.

સ્થાનિક મીડિયાના અહેવાલો અનુસાર, બચાવકર્તાઓને ઘટનાસ્થળેથી સંખ્યાબંધ મોબાઈલ ફોન મળી આવ્યા છે. આમાંના ઘણા ફોન પર સંબંધીઓ અને મિત્રોના સતત ફોન આવી રહ્યા હતા, જેના જવાબો બચાવકર્તાઓએ આપ્યા હતા અને પીડિતોની ઓળખ કરવા તથા તેમના પરિવારોને જાણ કરવા માટે તેની નોંધ કરી હતી.

આગ લાગવાના કારણ અંગે બચી ગયેલા લોકોએ સ્થાનિક મીડિયાને જણાવ્યું કે, સૌથી પહેલા સ્ટેજ નજીક આવેલા સર્કિટ બ્રેકરમાંથી ભારે ધુમાડો નીકળતો જોવા મળ્યો હતો. ત્યારબાદ વીજળી ગુલ થઈ ગઈ હતી અને એક જોરદાર બ્લાસ્ટ થયો હતો, જે પછી આગ ઝડપથી ફેલાઈ ગઈ હતી.

ચડચાર્ટે જણાવ્યું કે પ્રાથમિક તપાસમાં બહાર આવ્યું છે કે પબની છત આગમાં સંપૂર્ણપણે નાશ પામી હતી, જ્યારે પ્લાસ્ટિકની મોટાભાગની ખુરશીઓ અકબંધ હતી. આનાથી સંકેત મળે છે કે ઝડપથી ફેલાયેલો ઝેરી ધુમાડો જ મોતના મુખ્ય કારણોમાંનું એક હોઈ શકે છે. તેમણે ઉમેર્યું કે પાવર કટ થયા પછી ઘણા પીડિતો દિશાહીન થઈ ગયા હશે અને ઇમરજન્સી એક્ઝિટ (બહાર નીકળવાનો દરવાજો) સુધી પહોંચી શક્યા નહીં હોય.

થાઈ મીડિયાના અહેવાલ મુજબ, આ સ્થળને લાઈવ મ્યુઝિક પરફોર્મન્સ સાથેની રેસ્ટોરન્ટ તરીકેનું લાયસન્સ મળેલું હતું અને ત્યાં બહાર નીકળવાના બે ઇમરજન્સી ગેટ હતા. આગ લાગી ત્યારે તેમાંથી કોઈ દરવાજો બંધ કે અવરોધાયેલો હતો કે કેમ તેની સત્તાવાર તપાસ કરવામાં આવી રહી છે.

આ અગાઉ થાઈ મીડિયાએ અહેવાલ આપ્યો હતો કે આગમાં ૨૭ લોકોના મોત થયા છે, જેમાં નવ પુરુષો અને ૧૮ મહિલાઓનો સમાવેશ થાય છે. મોટાભાગના પીડિતોના શવ પબના શૌચાલય નજીકથી મળી આવ્યા હતા.