ટ્રમ્પે ૮ ચાઈનીઝ એપ સાથે વ્યવહાર પર પ્રતિબંધ મૂક્યો
ન્યૂયોર્ક: અમેરિકા અને ચીન વચ્ચે ચાલી રહેલા તણાવ વચ્ચે એક મોટા સમાચાર સામે આવ્યા છે. અમેરિકી રાષ્ટ્રપ્રમુખ ડોનાલ્ડ ટ્રમ્પે ચીનના આઠ સોફ્ટવેર સાથે વ્યવહાર પર પ્રતિબંધ મૂકતા એક કાર્યકારી આદેશ પર હસ્તાક્ષર કર્યા છે. જેમાં અલીબાબા એન્ટ ગ્રુપનું અલીપે પણ શામેલ છે.
રોઇટર્સના મુજબ, યુએસ રાષ્ટ્રપ્રમુખ ડોનાલ્ડ ટ્રમ્પે મંગળવારે અલીબાબાના એન્ટ ગ્રુપના અલિપે સહિત આઠ ચીની સોફ્ટવેર સાથે વ્યવહાર પર પ્રતિબંધ મૂકનારા એક કાર્યકારી આદેશ પર હસ્તાક્ષર કર્યા છે.
વહીવટી તંત્રના એક વરિષ્ઠ અધિકારીએ જણાવ્યું હતું કે, ‘આ મહિનામાં નવા ચૂંટાયેલા રાષ્ટ્રપ્રમુખ જાે બાઇડન પદ સંભાળે તે પહેલા બેઇજિંગ સાથે તણાવ વધી ગયો છે. ડોનાલ્ડ ટ્રમ્પે અગાઉ પણ ચાઈનીઝ એપ પર પ્રતિબંધ લગાવી ચૂક્યા છે. ગત વર્ષ ઓગસ્ટમાં ટ્રમ્પે ૪૫ દિવસની અંદર ચીઈનીઝ એપ્લિકેશન ટિકિટોક અને વીચેટ પર પ્રતિબંધ મૂકવાના હુકમ પર હસ્તાક્ષર કર્યા હતા.
આ પહેલા સેનેટે સર્વસંમતિથી યુએસ કર્મચારીઓને ટિકટોકનો ઉપયોગ ન કરવાની મંજૂરી આપી દીધી હતી. પ્રતિબંધના હુકમ પર હસ્તાક્ષર કર્યા પછી ટ્રમ્પે કહ્યું કે, આ પ્રતિબંધ જરૂરી છે કારણ કે, અવિશ્વસનીય એપ દ્વારા ડેટા સંગ્રહ કરવો દેશની રાષ્ટ્રીય સુરક્ષા માટે ખતરો છે.
