વિરાટ કોહલીની પુત્રી વામિકા છ મહિનાની થઈ
નવી દિલ્હી: ભારતીય ક્રિકેટ ટીમના સુકાની વિરાટ કોહલી અને બોલિવૂડ અભિનેત્રી અનુષ્કા શર્માની પુત્રી વામિકા છ મહિનાની થઈ. આ પ્રસંગે અનુષ્કા શર્માએ પોતાના ઈન્સ્ટાગ્રામ પર પોતાની પુત્રી વામિકાની કેટલીક તસ્વીરો પોસ્ટ કરી છે. જાેકે, હજી સુધી બંનેએ વામિકાનો ચહેરો દેખાડ્યો નથી. અનુષ્કાએ તસ્વીરો શેર કરતા લખ્યું છે કે, તેની એક સ્માઈલ અમારું વિશ્વ બદલી શકે છે.
તેણે આગળ લખ્યું હતું કે, હેપ્પી ૬ મન્થ ટુ અસ થ્રી. નોંધનીય છે કે અનુષ્કા શર્મા ઘણી વખત પોતાની પુત્રીની તસ્વીરો સોશિયલ મીડિયા પર શેર કરતી રહે છે. પરંતુ તેણે હજી સુધી તેનો ચહેરો દેખાડ્યો નથી. કોહલી અને અનુષ્કા ૨૦૧૭માં લગ્નના બંધનમાં બંધાયા હતા. અનુષ્કાએ આ વર્ષે જાન્યુઆરીમાં પુત્રીને જન્મ આપ્યો હતો. તેણે તેનું નામ વામિકા પાડ્યું છે.
પોતાના પ્રથમ બાળકના જન્મ સમયે અનુષ્કા સાથે રહેવા માટે કોહલીએ ક્રિકેટમાંથી બ્રેક લીધો હતો. ભારતીય ટીમ ત્યારે ઓસ્ટ્રેલિયાના પ્રવાસે હતી. ભારત અને ઓસ્ટ્રેલિયા વચ્ચે ચાર ટેસ્ટ રમાવાની હતી. જેમાંથી પ્રથમ ટેસ્ટ રમ્યા બાદ કોહલી વતન પરત ફર્યો હતો. હાલમાં કોહલી ભારતીય ટીમ સાથે ઈંગ્લેન્ડના પ્રવાસે છે જ્યાં ટીમ ઈન્ડિયા પાંચ ટેસ્ટ મેચની સિરીઝ રમશે.
તે અગાઉ ભારતે ન્યૂઝીલેન્ડ સામે વર્લ્ડ ટેસ્ટ ચેમ્પિયનશિપની ફાઈનલ રમી હતી. ફાઈનલમાં કેન વિલિયમ્સનની આગેવાનીવાળી ન્યૂઝીલેન્ડની ટીમ સામે ભારતને પરાજયનો સામનો કરવો પડ્યો હતો.
