રસીકરણ શરૂ થતાં ધો.૯થી ૧૨ની એકમ કસોટી મોકૂફ
અમદાવાદ, ધોરણ ૯થી ૧૨ના વિદ્યાર્થીઓ માટેની બીજી એકમ કસોટી આ અઠવાડિયાના અંતમાં યોજાવાની હતી. પરંતુ, હાલમાં ૧૫થી ૧૮ વર્ષની વયજૂથના શાળાના બાળકો માટે ચાલી રહેલી કોવિડ-૧૯ની રસીકરણની ઝુંબેશના કારણે તેને મુલતવી રાખવામાં આવી છે. એકમ કસોટીનો પહેલો તબક્કો ૨૯ ડિસેમ્બર અને ૩૦ ડિસેમ્બરે યોજાયો હતો.
આગામી તબક્કો કે જે ૭ જાન્યુઆરી અને ૮ જાન્યુઆરીએ યોજાવાનો હતો તેને સ્કૂલના બાળકો માટે ચાલી રહેલી રસીકરણની ઝુંબેશના કારણે મોકૂફ રાખવામાં આવી છે’, તેમ સૂત્રોએ જણાવ્યું હતું. એવા સમયે જ્યારે રાજ્યની સ્કૂલોએ વિદ્યાર્થીઓના રસીકરણ માટેની રજિસ્ટ્રેશનની પ્રક્રિયા શરૂ કરી દીધી છે, ત્યારે રાજ્યની ડિપ્લોમા અને આઈટીઆઈ કોલેજાેમાં આ પ્રક્રિયાને લઈને અસમંજસ પ્રવર્તી રહી છે.
અત્યારસુધીમાં આ વય જૂથમાં આવતા ડિપ્લોમા અને આઈટીઆઈ કોલેજના વિદ્યાર્થીઓને રસી આપવા અંગે કોઈ સ્પષ્ટતા કરવામાં આવી નથી, તેમ સૂત્રોએ જણાવ્યું હતું. રાજ્યની ડિપ્લોમા એન્જિનિયરિંગ કોલેજાેમાં આશરે ૧ લાખ વિદ્યાર્થીઓ છે, જેમાંથી ૫૦ હજાર જેટલા વિદ્યાર્થીઓ ગુજરાત ટેકનોલોજીકલ યુનિવર્સિટી સાથે જાેડાયેલી કોલેજાેના છે.
ગુજરાત સહિત દેશભરમાં કોરોના વાયરસના કેસ ઝડપથી વધી રહ્યા છે અને ત્રીજી લહેરના ભણકારા સંભળાઈ રહ્યા છે ત્યારે રસીકરણની પ્રક્રિયા ઝડપી બનાવવામાં આવી છે. ૩ જાન્યુઆરી, સોમવારથી બાળકોને રસી આપવાની કામગીરી શરૂ કરવામાં આવી છે. પહેલા દિવસે દેશભરમાં ૪૦ લાખથી વધુ બાળકોએ રસી લીધી હતી. ગુજરાતમાં કોવિડ-૧૯ના કેસની વાત કરીએ તો, મંગળવારે (છેલ્લા ૨૪ કલાકમાં) ૨,૨૨૬૫ કેસ નોંધાયા હતા.
જેમાં અમદાવાદમાં સૌથી વધારે ૧૨૯૦ હતા. સુરતમાં ૪૧૫, વડોદરામાં ૮૬, રાજકોટમાં ૩૬ કેસ જ્યારે ગાંધીનગરમાં ૨૩ કેસ નોંધાયા હતા. કોરોના વાયરસના કેસ વધતા સરકાર તેમજ ડોક્ટરો પણ લોકોને પૂરતી સાવચેતી રાખવા, માસ્ક પહેરવા અને સોશિયલ ડિસ્ટન્સિંગનું પાલન કરવાની પણ સૂચના આપી રહ્યા છે.SSS
