પતિની હત્યા કર્યા બાદ લાશના ૫ ટુકડા કરી ૨ જગ્યાએ ફેંકી દીધા
ઇન્દોર, મધ્યપ્રદેશના ઈન્દોર જિલ્લામાં એક ભયાનક ઘટના સામે આવી છે. અહીં એક ૪૦ વર્ષની મહિલાએ તેના પતિની હત્યા કરી તેના શરીરના પાંચ ટુકડા કરી નાખ્યા હતા. આ પછી તેને બે અલગ-અલગ જગ્યાએ ફેંકી દેવામાં આવ્યો હતો. આ મામલે પોલીસે મહિલાની ધરપકડ કરી છે.
સુનીતા નામની આરોપી મહિલાએ તેના બે મિત્રો રિઝવાન ખાન અને ભૈયુ સાથે મળીને તેના પતિ બબલુ જાદોનની કથિત રીતે હત્યા કરી હતી. તે ડ્રાઈવર હતો. આ ઘટના ત્યારે પ્રકાશમાં આવી જ્યારે પીડિતાના પુત્ર પ્રશાંતે દારૂના નશામાં તેના મિત્રને આ વિશે જણાવ્યું. આ ઘટના ૫ ફેબ્રુઆરીએ બની હતી.
પોલીસના જણાવ્યા અનુસાર સુનીતાએ કથિત રીતે ભોજનમાં ઝેર ભેળવ્યું હતું. ભાન ગુમાવતાં તેણે તેના મિત્ર રિઝવાન સાથે મળીને તેનું ગળું દબાવી દીધું હતું. બાદમાં શહેરમાં માંસની દુકાન ચલાવતા રિઝવાન અને ભૈયુએ તેના શરીરના પાંચ ટુકડા કરી નાખ્યા હતા. ૬ ફેબ્રુઆરીના રોજ આરોપીઓએ શરીરના ટુકડા અલગ-અલગ જગ્યાએ ફેંકી દીધા હતા.
તેઓએ તેના પગ અને હાથ દેવાસના જંગલમાં ફેંકી દીધા. જ્યારે સુનીતાના ઘરની સેપ્ટિક ટાંકીમાં ધડ અને માથું દટાયું હતું. આ મામલો ગુરુવારે રાત્રે પ્રકાશમાં આવ્યો જ્યારે તેના પુત્ર પ્રશાંત જાદોને નશામાં ધૂત તેના મિત્રને કહ્યું કે તે તેને મારીને દાટી દેશે અને તેની કોઈને ખબર નહીં પડે, જેમ તેની માતાએ તેના પિતાની હત્યા કરી ૨૦ દિવસ પહેલા લાશ ફેંકી દીધી હતી. આ અંગે મિત્રએ પોલીસને જાણ કરી હતી. શુક્રવારે સવારે પોલીસે સુનીતાને કસ્ટડીમાં લઈ પૂછપરછ કરી હતી.
ઘટનાની માહિતી મળ્યા બાદ પોલીસે સુનીતા અને પ્રશાંતની ધરપકડ કરી હતી, જ્યારે રિઝવાન અને ભૈયુ ફરાર છે. પૂછપરછ દરમિયાન સુનીતાએ પોતાનો ગુનો કબૂલી લીધો અને આરોપ લગાવ્યો કે તેનો પતિ તેને હેરાન કરતો હતો અને તેના પર બેવફાઈનો આરોપ લગાવતો હતો.HS
