USA ન્યૂજર્સીમાં વર્ષ ૨૦૨૪થી વધશે મિનિમમ વેજ
મિનિમમ વેજથી ૧ ડોલર વધીને ૧૫.૧૩ ડોલર પ્રતિ કલાક થશે
૧૨ કલાક સુધી કામ કરનારાને દોઢો જ્યારે ૧૨ કલાકથી વધુ કામ કરવા પર બમણો ઓવરટાઈમ મળે છે
ન્યૂજર્સી, અમેરિકાના ન્યૂજર્સી સ્ટેટમાં ૨૦૨૪ના વર્ષના પહેલા જ દિવસથી મિનિમમ વેજમાં વધારો કરવામાં આવશે. ન્યૂજર્સીમાં કામ કરતા તમામ લોકોને મિનિમમ વેજમાં થનારા વધારાનો લાભ મળશે, જે ૦૧ જાન્યુઆરી ૨૦૨૪થી હાલના મિનિમમ વેજથી ૧ ડોલર વધીને ૧૫.૧૩ ડોલર પ્રતિ કલાક થશે.
ન્યૂજર્સીના ગવર્નર ફિલ મર્ફી સત્તા પર આવ્યા ત્યારે તેમણે ૨૦૨૪ સુધીમાં મિનિમમ વેજને તબક્કાવાર વધારીને પ્રતિ કલાક ૧૫ ડોલરથી વધુ કરવા માટેના બિલ પર સહી કરી હતી, જેના ભાગરૂપે ન્યૂજર્સીમાં ૨૦૧૯થી મિનિમમ વેજમાં સતત વધારો કરવામાં આવ્યો છે.
ગવર્નર ફિલ મર્ફી ૨૦૧૮માં સત્તા પર આવ્યા ત્યારે ન્યૂજર્સીનો મિનિમમ વેજ ૮.૬૦ ડોલર પ્રતિ કલાક હતો. ન્યૂજર્સીના લા હેઠળ સીઝનલ અને સ્મોલ બિઝનેસ ધરાવતા લોકોને મિનિમમ વેજ ૧૫ ડોલર સુધી કરવા માટે ૨૦૨૬ સુધીનો સમય આપવામાં આવ્યો છે.મિનિમમ વેજ વધારવા ઉપરાંત ન્યૂજર્સીમાં ૨૦૨૪થી ૨૦ જેટલા અલગ-અલગ ટેક્સમાં પણ કાપ મૂકવામાં આવી શકે છે, જેમાં પ્રોપર્ટી ટેક્સનો પણ સમાવેશ થાય છે જેનો સૌથી વધુ લાભ ભાડાંના મકાનમાં રહેતા તેમજ સિનિયર સિટીઝન્સને મળશે.
અમેરિકામાં ફેડરલ મિનિમમ વેજ ૭.૨૫ ડોલર પ્રતિ કલાક છે, જેમાં છેક ૨૦૦૯ના વર્ષથી કોઈ ફેરફાર નથી થયો. જોકે, અમેરિકાના રાજ્યો તેમજ લોકાલિટીને તેમાં વધારો કરવાની સત્તા અપાયેલી છે અને અમેરિકાના ૩૦ રાજ્યોએ તેમાં વધારો કર્યો પણ છે. ન્યૂજર્સી ઉપરાંત ન્યૂયોર્કમાં પણ ૨૦૨૪થી મિનિમમ વેજમાં વધારો થઈ રહ્યો છે, જેમાં ન્યૂયોર્ક સિટી, લોંગ આયલેન્ડ અને વેસ્ટચેસ્ટરમાં કામ કરતા લોકોને એક કલાકનો ૧૬ ડોલર પગાર મળશે, જ્યારે ન્યૂયોર્ક સ્ટેટના બાકીના ભાગમાં કામ કરતા લોકોનો મિનિમમ વેજ કલાકનો ૧૫ ડોલર રહેશે.
ન્યૂયોર્ક અને ન્યૂજર્સી સિવાય અમેરિકાના કેલિફોર્નિયા, મેસાચ્યુસેટ્સ, વોશિંગ્ટન અને કનેક્ટિકટમાં કલાકનો ઓછામાં ઓછો પગાર ૧૫ ડોલર જેટલો છે જ્યારે ડિસ્ટ્રિક્ટ ઓફ કોલંબિયામાં મિનિમમ વેજ સૌથી વધુ ૧૭ ડોલર પ્રતિ કલાક છે, જ્યારે દસથી તેર ડોલર પ્રતિ કલાકનો મિનિમમ વેજ ધરાવતા સ્ટેટ્સમાં વર્જિનિયા, મિશિગન, મિનેસોટા, મેરીલેન્ડ, ઈલિનોય, એરિઝોના અને ફ્લોરિડાનો સમાવેશ થાય છે.
જોકે, ગુજરાતીઓની જ્યાં વધુ વસ્તી છે તેવા ટેક્સાસ અને જ્યોર્જિયામાં મિનિમમ વેજ ૭.૨૫ ડોલર છે. અમેરિકામાં અલગ-અલગ સ્ટેટ્સમાં જે મિનિમમ વેજ આપવામાં આવે છે તે કલાકના પાંચ દિવસ અને રોજના આઠ કલાકની શિફ્ટ અનુસાર અપાય છે, મતલબ કે એક અઠવાડિયામાં જો કોઈએ ૪૦ કલાક કે તેથી ઓછું કામ કર્યું હોય તો તેને મિનિમમ વેજ અનુસાર સેલેરી મળે છે, પરંતુ જો કોઈ વ્યક્તિ રોજના આઠ કલાકથી વધુ પણ ૧૨ કલાકથી ઓછું કામ કરે તો તેને ઓવર ટાઈમનો દોઢો પગાર ચૂકવવો પડે છે,
જ્યારે ૧૨ કલાકથી વધુ કામ કરવાનો ઓવર ટાઈમ મિનિમમ વેજથી ડબલ હોય છે. મોટાભાગે મોટેલ, રેસ્ટોરાં, ગેસ સ્ટેશન કે પછી સ્ટોર્સ તેમજ નાના-મોટા બિઝનેસમાં કામ કરતા લોકોને મિનિમમ વેજ અનુસાર પગાર મળતો હોય છે. જે સ્ટેટ્સમાં મિનિમમ વેજ વધારે હોય છે ત્યાં કોસ્ટ ઓફ લિવિંગ પણ ઉંચી હોય છે, જ્યારે ઓછો મિનિમમ વેજ ઓફર કરતાં સ્ટેટ્સમાં કોસ્ટ ઓફ લિવિંગ નીચી હોય છે.
અમેરિકામાં સ્ટેટ, લોકાલિટી કે પછી ફેડરલ ગવર્મેન્ટે નક્કી કરેલા મિનિમમ વેજથી ઓછો પગાર આપવો ગંભીર ગુનો છે, આ ઉપરાંત ઓવરટાઈમનો પગાર પણ નિયમ અનુસાર આપવો ફરજિયાત છે. જો કોઈ એમ્પ્લોયર ઓછો પગાર આપીને કર્મચારીનું શોષણ કરે તો તેને કડક કાયદાકીય કાર્યવાહીનો સામનો કરવો પડે છે, જેલની હવા ખાવી પડે છે તેમજ મોટો દંડ પણ ભરવાની નોબત આવે છે.
અમેરિકામાં મિનિમમ વેજના નિયમો ત્યાં કામ કરતા અનડોક્યુમેન્ટેડ ઈમિગ્રન્ટ્સ પર પણ એટલા જ લાગુ પડે છે. જોકે, અમેરિકામાં રહેતા ઘણા ગુજરાતી ઈમિગ્રન્ટ્સને મોટાભાગે મિનિમમ વેજથી ઓછો પગાર મળતો હોય છે, અને તેમને ઓવરટાઈમનો પગાર પણ રૂટિન વર્કિંગ અવર્સ અનુસાર જ અપાતો હોય છે.ss1
