ગૂગલે CEO સુંદર પિચાઈના પગારમાં ધરખમ વધારો કર્યો: 3 વર્ષ માટે ₹58,000 કરોડનું પેકેજ

નવી દિલ્હી, 7 માર્ચ-2026  આલ્ફાબેટની માલિકીની કંપની ગૂગલે તેના સીઈઓ સુંદર પિચાઈના કુલ સંભવિત વળતર (compensation) ને આગામી ત્રણ વર્ષ માટે વધારીને $692 મિલિયન (આશરે ₹58,000 કરોડથી વધુ) કર્યું છે. ફાઇનાન્શિયલ ટાઇમ્સના અહેવાલ મુજબ, આ વધારા સાથે તેઓ વૈશ્વિક સ્તરે સૌથી વધુ પગાર મેળવતા એક્ઝિક્યુટિવ્સમાંના એક બની ગયા છે.

અહેવાલ મુજબ, આ પેકેજનો મોટો હિસ્સો પરફોર્મન્સ સ્ટોક યુનિટ્સ (PSUs) માંથી આવે છે જેની કિંમત $126 મિલિયન છે. આ રકમને બે સરખા ભાગમાં વહેંચવામાં આવી છે.

પગાર અને ઇન્સેન્ટિવની વિગતો:

• શેરબજાર સાથે લિંક: આ PSUs આલ્ફાબેટના શેરના દેખાવ પર આધારિત છે. જો કંપની નિર્ધારિત લક્ષ્યાંકો કરતા વધુ સારું પ્રદર્શન કરે, તો આ રકમ બમણી થઈને $252 મિલિયન થઈ શકે છે.

• ફિક્સ્ડ સેલરી: પિચાઈને વાર્ષિક $2 મિલિયન નો પગાર મળશે.

• રિસ્ટ્રિક્ટેડ સ્ટોક્સ: તેમને $84 મિલિયનના શેર મળશે, જે આગામી ત્રણ વર્ષ દરમિયાન દર મહિને જમા થશે.

• નવા પ્રોજેક્ટ્સ માટે પ્રોત્સાહન: ગૂગલે સ્વાયત્ત સાહસો (autonomous ventures) ના વિકાસ માટે $350 મિલિયન સુધીના નવા સ્ટોક ઇન્સેન્ટિવ્સ પણ રજૂ કર્યા છે. આ અંતર્ગત પિચાઈને Waymo ના $130 મિલિયન અને Wing Aviation ના $45 મિલિયનના શેર મળશે.

આલ્ફાબેટના બોર્ડે જણાવ્યું હતું કે આ પ્રોત્સાહન પિચાઈના નેતૃત્વમાં કંપનીના વિશ્વાસને દર્શાવે છે. 2015માં સીઈઓ બન્યા ત્યારથી, પિચાઈના માર્ગદર્શન હેઠળ ગૂગલનું માર્કેટ કેપિટલાઇઝેશન $535 બિલિયનથી વધીને $3.6 ટ્રિલિયન થયું છે. જાન્યુઆરીમાં તે ટૂંકા ગાળા માટે $4 ટ્રિલિયનને પણ સ્પર્શી ગયું હતું.

• ભારતીય મૂળના 53 વર્ષીય સુંદર પિચાઈ 2004માં ગૂગલમાં જોડાયા હતા.

• હાલમાં પિચાઈ અને તેમના પત્ની પાસે ગૂગલના 1.67 મિલિયન શેર છે, જેની કિંમત આશરે $498 મિલિયન છે.

• સરખામણીમાં, માઇક્રોસોફ્ટના સીઈઓ સત્ય નાડેલાએ નાણાકીય વર્ષ 2025માં $96.5 મિલિયન અને એપલના ટિમ કુકે $74.3 મિલિયન કમાયા હતા.