LPG ગેસ ડીલરોએ ફોન સ્વીચ ઓફ કર્યાઃ કેન્દ્રની પૂરતા સ્ટોકની ખાતરી છતાં હોબાળો

તિરુવનંતપુરમ, ૧૩ માર્ચ: પશ્ચિમ એશિયાના વધતા સંકટ વચ્ચે કેન્દ્ર સરકાર વારંવાર ખાતરી આપી રહી છે કે દેશમાં રાંધણ ગેસ (LPG) નો પૂરતો જથ્થો ઉપલબ્ધ છે અને કોઈ અછત નથી. આમ છતાં, કેરળમાં લોકોમાં ભારે ગભરાટ જોવા મળી રહ્યો છે.

હાલમાં કેરળના લોકો સોશિયલ મીડિયા પર રીલ્સ જોવામાં કે મીમ્સ શેર કરવામાં નહીં, પરંતુ પોતાના ગેસ એજન્સીના ડીલરને ફોન કરીને સપ્લાય વિશે પૃચ્છા કરવામાં વ્યસ્ત છે.

ગ્રાહકોના સતત આવતા ફોનથી કંટાળીને ઘણા ગેસ ડીલરોએ હવે ફોન ઉપાડવાનું બંધ કરી દીધું છે અથવા ફોન સ્વીચ ઓફ કરી દીધા છે. ગ્રાહકો જ્યારે ફોન કરે છે ત્યારે તેમને કાં તો ‘લાઇન બિઝી’ આવે છે અથવા ‘ફોન બંધ’ હોવાનો પ્રતિસાદ મળે છે. ઓફિસ હોય કે ઘર, દરેક જગ્યાએ હવે એક જ ચર્ચા છે: “શું તમારો ગેસ એજન્સી સાથે સંપર્ક થયો?”

ગેસની અછતની સૌથી વધુ અસર હોટલ અને નાની ખાણી-પીણીની દુકાનો પર પડી છે. અંદાજ મુજબ, ગેસના અભાવે મોટા શહેરોની લગભગ ૫,૦૦૦ જેટલી હોટલોએ કામકાજ કામચલાઉ ધોરણે બંધ કરી દીધું છે. ગૃહિણીઓમાં પણ ચિંતા છે કે ઘરમાં રહેલો ગેસ સિલિન્ડર કેટલા દિવસ ચાલશે.

સોશિયલ મીડિયા પર આ સ્થિતિને લઈને જોક્સ પણ શેર થઈ રહ્યા છે. લોકો કહી રહ્યા છે કે, “આજે કોઈ સેલિબ્રિટી સાથે વાત કરવી સરળ છે, પણ ગેસ એજન્સી સાથે સંપર્ક કરવો અશક્ય છે.” શુક્રવારે સવારે એક રાજ્ય મંત્રી પણ જ્યારે પોતાની મનપસંદ ચાની દુકાને પહોંચ્યા ત્યારે તે ગેસના અભાવે બંધ જોવા મળી હતી, અંતે તેમના સ્ટાફે બીજી દુકાનેથી ફ્લાસ્કમાં ચા લાવવી પડી હતી.