“ભારત પાસે સુરક્ષિત પેટ્રોલિયમ ભંડાર, ઉર્જા પુરવઠો ખોરવાવા નહીં દઈએ”: PM મોદી

પહેલા આપણે ૨૭ દેશોમાંથી આયાત કરતા હતા, જે હવે વધીને ૪૧ દેશો થઈ ગઈ છે.

“ભારત પાસે ૫૩ લાખ મેટ્રિક ટનથી વધુનો વ્યૂહાત્મક પેટ્રોલિયમ ભંડાર છે અને અન્ય ૬૫ લાખ મેટ્રિક ટનનો નવો ભંડાર બનાવવાની યોજના પર કામ ચાલી રહ્યું છે.”- PM મોદી

નવી દિલ્હી, ૨૩ માર્ચ: વડાપ્રધાન નરેન્દ્ર મોદીએ સોમવારે લોકસભામાં ખાતરી આપી હતી કે ભારત સરકાર પાસે વ્યૂહાત્મક પેટ્રોલિયમ રિઝર્વ (Strategic Petroleum Reserve) ઉપલબ્ધ છે અને નવા ભંડારો બનાવવાની પ્રક્રિયા ચાલુ છે. તેમણે નોંધ્યું હતું કે છેલ્લા એક દાયકામાં ઉર્જા આયાતના સ્ત્રોતોમાં મોટા પાયે વૈવિધ્યકરણ કરવામાં આવ્યું છે.

પશ્ચિમ એશિયાના સંકટ અને ભારતની પ્રતિક્રિયા અંગે ગૃહને માહિતી આપતા પીએમ મોદીએ કહ્યું, “અમારી પાસે ૫૩ લાખ મેટ્રિક ટનથી વધુનો વ્યૂહાત્મક પેટ્રોલિયમ ભંડાર છે અને અન્ય ૬૫ લાખ મેટ્રિક ટનનો નવો ભંડાર બનાવવાની યોજના પર કામ ચાલી રહ્યું છે.”

અમદાવાદમાં પેટ્રોલ-ડીઝલની અછતની દહેશતઃ પેટ્રોલ પંપો પર લાંબી લાઈનો લાગી

ઉર્જા આયાતમાં મોટું પરિવર્તન

વડાપ્રધાને જણાવ્યું હતું કે છેલ્લા ૧૧ વર્ષમાં દેશની ઉર્જા આયાતનું વૈવિધ્યકરણ કરવામાં આવ્યું છે, જેનાથી કોઈ એક રાષ્ટ્ર પરની નિર્ભરતા ઘટી છે.

• દેશોની સંખ્યામાં વધારો: પહેલા આપણે ૨૭ દેશોમાંથી આયાત કરતા હતા, જે હવે વધીને ૪૧ દેશો થઈ ગઈ છે.

• પુરવઠાની ખાતરી: યુદ્ધની સ્થિતિ વચ્ચે પણ પેટ્રોલ, ગેસ અને ખાતરનો અવિરત પુરવઠો જાળવી રાખવા સરકાર કટિબદ્ધ છે.

• દરિયાઈ માર્ગો પર નજર: સરકાર શિપિંગ લાઇન અને દરિયાઈ કોરિડોર પર સતત નજર રાખી રહી છે. તેમણે ઉમેર્યું કે, “હોર્મુઝની સામુદ્રધુનીમાં ફસાયેલા અનેક જહાજો તાજેતરમાં ભારતીય કિનારે સુરક્ષિત પહોંચ્યા છે.”

પીએમ મોદીએ દેશના ખેડૂતોની પ્રશંસા કરતા કહ્યું કે રાષ્ટ્ર પાસે પૂરતો અન્ન ભંડાર છે. વૈશ્વિક આંચકાઓથી ખેડૂતોને બચાવવા માટે યુરિયા પ્લાન્ટ સ્થાપવામાં આવ્યા છે અને ખાતરની આયાતમાં પણ નવા દેશોનો સમાવેશ કરવામાં આવ્યો છે. ખેતીમાં ખર્ચ ઘટાડવા ૨૨ લાખ સોલર પંપ આપવામાં આવ્યા છે અને જૈવિક ખેતીને પ્રોત્સાહન અપાઈ રહ્યું છે.

દેશના હિતોને સુરક્ષિત કરવા માટે લેવાયેલા અન્ય પગલાંઓ વિશે તેમણે માહિતી આપી:

• ઇથેનોલ બ્લેન્ડિંગ: પેટ્રોલમાં ઇથેનોલનું મિશ્રણ હવે ૨૦ ટકા સુધી પહોંચી ગયું છે.

• રેલ્વે ઇલેક્ટ્રિફિકેશન: જો રેલ્વેનું વીજળીકરણ ન થયું હોત, તો વધારાનું ૧૮૦ કરોડ લિટર પેટ્રોલ વપરાયું હોત.

• મેટ્રો અને ઈ-બસ: એક દાયકા પહેલા ૨૫૦ કિમીનું મેટ્રો નેટવર્ક હતું જે હવે ૧૧૦૦ કિમી થયું છે. ઉપરાંત, રાજ્યોને ૧૫,૦૦૦ ઇલેક્ટ્રિક બસો આપવામાં આવી છે.

વડાપ્રધાને સ્વીકાર્યું હતું કે ઉર્જા એ અર્થતંત્રની કરોડરજ્જુ છે અને પશ્ચિમ એશિયા તેનો મુખ્ય સ્ત્રોત છે. જોકે વૈશ્વિક અર્થતંત્રમાં આંચકા અનુભવાઈ રહ્યા છે, પરંતુ તેમની સરકાર દેશવાસીઓને આ અસરોથી બચાવવા માટે પ્રતિબદ્ધ છે. તેમણે કહ્યું કે સરકાર અને ઉદ્યોગ જગત સામૂહિક પ્રયાસોથી આ સંકટમાંથી પાર ઉતરશે.