૧૪ LPG સિલિન્ડર ચોરનાર આરોપીને HC માંથી જામીન
આરોપી શિક્ષક પર બે લેપટોપ ચોરીનો પણ આક્ષેપ
અરજદારને ૧૦,૦૦૦ના જામીન બોન્ડ અને તે જ રકમની એક જામીનગીરી રજૂ કરવાનો કોર્ટે હુકમ કર્યો
અમદાવાદ,અત્યારે જ્યારે વિશ્વના માથે યુદ્ધનો પડછાયો જોવા મળી રહ્યો છે અને એની ઘેરી અસર LPG પેટ્રોલ, ડીઝલ સહિતના પુરવઠા પર પડી રહી છે. આ તબક્કે હાઇકોર્ટમાં એક એવો રસપ્રદ કેસ આવ્યો છે કે જેમાં આરોપી ઉપર ૧૪ જેટલા LPG સિલિન્ડર ચોરી કરવાનો આક્ષેપ છે. વળી, જામનગર જિલ્લાનો આ આરોપી શિક્ષક છે. જેણે જામીન માટે હાઇકોર્ટમાં અરજી કરતાં સમગ્ર મામલો સામે આવ્યો છે. અલબત્ત, હાઇકોર્ટે તેને રેગ્યુલર જામીન આપ્યા છે. આ કેસમાં હાઇકોર્ટ કાંતિલાલ નામના એક અરજદારની રેગ્યુલર જામીન અરજીની સુનાવણી કરી રહી હતી.
આરોપી સામે જામનગરના સિક્કા પોલીસ સ્ટેશનમાં ૨૦૨૫માં LPG સિલિન્ડર ચોરીના આરોપમાં ફરિયાદ નોંધાવવામાં આવી હતી. તે સિવાય તેણે બે લેપટોપની ચોરી કરી હોવાનું પણ આ કેસમાં સામે આવ્યું હતું. અરજદારને જામીન આપતાં આદેશમાં હાઇકોર્ટે નોંધ્યું હતું કે અરજદાર પ્રાથમિક શિક્ષક છે અને પ્રથમદૃષ્ટિએ એવું જણાય છે કે તેને ચોરી કરવાની આદત છે. ખાસ કરીને અરજદાર જે શાળામાં કામ કરતો હતો તેમાંથી બે લેપટોપ ચોરીના આરોપમાં સસ્પેન્ડ કરાયો હતો. આમ પ્રથમ દૃષ્ટિએ એને કેટલીક માનસિક સમસ્યાઓ હોવાનું પ્રતિબિંબિત થાય છે.
હાઇકોર્ટે અવલોકન કર્યું કે આરોપોની ગંભીરતા અને ભૂતકાળ હોવા છતાં ચાર્જશીટ દાખલ થયા પછી સતત કેદ રાખવાથી કોઈ અર્થપૂર્ણ હેતુ પૂરો થશે નહીં. આ કેસની હકીકત મુજબ અરજદાર પ્રાથમિક શાળાનો શિક્ષક છે. જેને તે જે શાળામાં નોકરી કરતો હતો ત્યાંથી બે લેપટોપ ચોરી કરવાના આરોપસર સસ્પેન્ડ કરવામાં આવ્યો હતો. હાઈકોર્ટે આ પૃષ્ઠભૂમિની કડક શબ્દોમાં નોંધ લીધી હતી અને કોર્ટે તેને આશ્ચર્યજનક ગણાવ્યું કે શિક્ષક કે જે યુવાનોના ઘડતર માટે જવાબદાર હોય છે, તેવી વ્યક્તિ વારંવાર ચોરીઓમાં ફસાય છે.
કોર્ટે અવલોકન કરતાં ઉમેર્યું હતું કે અરજદાર શિક્ષકનું આ પ્રકારનું વર્તન તેની માનસિક સમસ્યાઓ તરફ ઈશારો કરે છે. હાઇકોર્ટે અરજદારને જામીન આપતાં શરતો પણ રાખી છે અને આરોપી તેની સ્વતંત્રતાનો દુરુપયોગ ન કરે તે સુનિશ્ચિત કરવા માટે શરતો લાદી છે. અરજદારને ૧૦,૦૦૦ના જામીન બોન્ડ અને તે જ રકમની એક જામીનગીરી રજૂ કરવાનો નિર્દેશ આપવામાં આવ્યો છે.ss1
