AAP પ્રદેશ પ્રમુખ ઈસુદાન ગઢવીની અટકાયત કરાઇ
ખંભાળિયામાં એક મોટી રાજકીય ઘટના બની-આ ઘટનાને પગલે રાજ્યભરમાં ‘આપ’ના કાર્યકર્તાઓમાં ભારે રોષ જોવા મળી રહ્યો છે
દેવભૂમિ દ્વારકા, ગુજરાતમાં સ્થાનિક સ્વરાજ્યની ચૂંટણીનો માહોલ જામી રહ્યો છે ત્યારે જ દેવભૂમિ દ્વારકાના ખંભાળિયામાં એક મોટી રાજકીય ઘટના બની છે. આમ આદમી પાર્ટીના પ્રદેશ પ્રમુખ ઈસુદાન ગઢવીની પોલીસે અટકાયત કરી છે.
આ ઘટનાને પગલે રાજ્યભરમાં ‘આપ’ના કાર્યકર્તાઓમાં ભારે રોષ જોવા મળી રહ્યો છે.પ્રાપ્ત વિગતો અનુસાર, આમ આદમી પાર્ટીના કેટલાક કાર્યકર્તાઓ સામે થયેલી ફરિયાદના સંદર્ભમાં ઈસુદાન ગઢવી પોતાના સમર્થકો સાથે ખંભાળિયા પોલીસ સ્ટેશન ખાતે રજૂઆત કરવા પહોંચ્યા હતા.
AAP ગુજરાતના નેતાઓ અને કાર્યકરો પર થતી ખોટો ફરિયાદો બાબતે રજૂઆત કરવા ગયેલા AAP ગુજરાત પ્રદેશ પ્રમુખ શ્રી @isudan_gadhvi ની ખંભાળિયા પોલીસ દ્વારા અટકાયત કરવામાં આવી છે તે બાબતે ધારાસભ્ય શ્રી @Gopal_Italia ની પ્રતિક્રિયા.#BJPFearsAAPInGujarat pic.twitter.com/kHoBAOCQVp
— AAP Gujarat (@AAPGujarat) April 1, 2026
પોલીસ સ્ટેશનની અંદર પીએસઆઈ અને અન્ય ઉચ્ચ અધિકારીઓ સાથે તેમની ઉગ્ર ચર્ચા થઈ હોવાનું જાણવા મળ્યું છે. આ વાતચીતનો એક વીડિયો પણ સોશિયલ મીડિયા પર વાયરલ થયો છે, જેમાં પોલીસ અને ઈસુદાન ગઢવી વચ્ચે બોલાચાલી થતી જોવા મળે છે. આ ચર્ચા બાદ પોલીસે કાયદો અને વ્યવસ્થાની સ્થિતિને ધ્યાનમાં રાખી તેમની અટકાયત કરી હતી.
ઈસુદાન ગઢવીની અટકાયત બાદ આમ આદમી પાર્ટીના પ્રદેશ સંગઠન પ્રભારી ગોપાલ રાય અને અન્ય નેતાઓ આક્રમક મૂડમાં જોવા મળી રહ્યા છે. પાર્ટીના સૂત્રોનું કહેવું છે કે ચૂંટણીના માહોલમાં જાણીજોઈને વિરોધ પક્ષના નેતાઓને ટાર્ગેટ કરવામાં આવી રહ્યા છે. પોલીસ સ્ટેશનમાં રજૂઆત કરવા ગયેલા પ્રદેશ પ્રમુખની કયા કાયદા હેઠળ અટકાયત કરવામાં આવી તે અંગે હજુ સુધી પોલીસે સત્તાવાર રીતે કોઈ ખુલાસો કર્યો નથી.
સ્થાનિક સ્વરાજ્યની ચૂંટણીનું બ્યુગલ ફૂંકાઈ રહ્યું છે ત્યારે એક મોટા રાજકીય પક્ષના પ્રદેશ પ્રમુખની અટકાયત અનેક સવાલો ઉભા કરે છે. ‘આપ’ દ્વારા આ મામલે પ્રેસ કોન્ફરન્સ કરી સરકાર અને પોલીસ તંત્ર સામે મોટા ખુલાસા કરવામાં આવે તેવી શક્્યતા છે. આ ઘટના બાદ ખંભાળિયા સહિત રાજ્યના અન્ય ભાગોમાં પણ રાજકીય ગરમાવો વધી ગયો છે અને પોલીસ કેસ અંગે વધુ વિગતોની રાહ જોવાઈ રહી છે.
