રાજકોટમાં નેપાળી યુવકનો પૂરઝડપે આવતી ટ્રક નીચે ઝંપલાવી આપઘાત

રાજકોટ, રાજકોટના મોરબી હાઈવે પર રોજગારીની શોધમાં આવેલા એક યુવાને આર્થિક તંગી અને માનસિક હતાશામાં આવી જઈ ચાલતા ટ્રક નીચે પડતું મૂકી જીવન ટૂંકાવ્યું છે.

છેલ્લા પાંચ દિવસથી કામ માટે ભટકી રહેલા આ યુવાનને સફળતા ન મળતા અંતે આત્મહત્યા જેવું આત્યંતિક પગલું ભર્યું હતું. આ સમગ્ર ઘટના નજીકમાં લાગેલા સીસીટીવી કેમેરામાં કેદ થઈ ગઈ છે.

હાલ સ્થાનિક પોલીસે મૃતદેહને પોસ્ટમોર્ટમ અર્થે ખસેડી કાયદેસરની કાર્યવાહી હાથ ધરી છે.પોલીસ તપાસમાં જાણવા મળતી વિગત અનુસાર, મૂળ નેપાળી અને વડોદરામાં વસવાટ કરતા જગદીશભાઈ રામદૂતપ્રસાદ જોશી (ઉ.૩૯) પાંચ દિવસ પહેલા જ કામની શોધમાં રાજકોટ આવ્યા હતા.

તેઓ મોરબી હાઈવે પર હડાળા પાટીયા પાસે આવેલી વિરાટ હોટલમાં આશરો લઈ રહ્યા હતા. ગઈકાલે બપોરે ૧૨ઃ૩૦ વાગ્યાની આસપાસ તેઓ ચાલીને હાઈવે પર જઈ રહ્યા હતા, ત્યારે અચાનક પૂરઝડપે આવી રહેલા એક અજાણ્યા ટ્રક નીચે તેઓ સૂઈ ગયા હતા. આ અકસ્માતમાં યુવાનના બંને પગ કપાઈ ગયા હતા અને ગંભીર ઈજાઓ પહોંચી હતી.

સ્થાનિકોએ તેમને તાત્કાલિક હોસ્પિટલ ખસેડ્યા હતા, પરંતુ સારવાર દરમિયાન તેમનું મૃત્યુ નીપજ્યું હતું.બનાવ અંગે કુવાડવા પોલીસના જણાવ્યા અનુસાર, મૃતક છેલ્લા કેટલાક સમયથી આર્થિક સંકડામણ અનુભવી રહ્યો હતો અને અનિશ્ચિત ભવિષ્યના ડરને કારણે તેણે આ પગલું ભર્યું હોવાનું પ્રાથમિક તપાસમાં જણાયું છે. પ્રાપ્ત થયેલી માહિતી મુજબ, જગદીશભાઈ સતત કામની શોધમાં ફરતા હતા પરંતુ રોજગારી ન મળતા તેઓ માનસિક રીતે ભાંગી પડ્યા હતા.SS1MS