ડભાણ પાસે આવેલી હોટલના માલિક પર પગારના પૈસા બાબતે બે વ્યક્તિઓએ હુમલો કર્યો
(પ્રતિનિધિ) નડિયાદ, નડીયાદ ના ડભાણ નજીક આવેલ પંજાબ હોટલના માલિક પર બે શખ્સોએ રાત્રિના સમયે લાકડાના ડંડા અને ગડદાપાટુનો માર મારી ગંભીર ઈજાઓ પહોંચાડી હોવાની ઘટના સામે આવી છે. પગારના પૈસા આપવાના મુદ્દે થયેલી આ તકરારમાં હુમલાખોરોએ હોટલ માલિકના જડબાના ભાગે લાકડાનો ડંડો ફટકારતા હાડકામાં ફ્રેક્ચર થયું છે.
આ મામલે નડીયાદ રૂરલ પોલીસ સ્ટેશનમાં મળતી માહિતી મુજબ નડિયાદ નજીક આવેલા ડભાણ પાસેની પંજાબ હોટલના માલિક જશવંતસિંગ કરમજીતસિંગ સરદાર હોટલ પર હાજર હતા તે વખતે ગત તારીખ ૩ એપ્રિલ ૨૦૨૬ના રોજ રાત્રિના આશરે એક વાગ્યે આકાશ ભોઈ અને અલ્પેશ પંજાબ હોટલ પર આવ્યા હતા અને જમવાનું માંગ્યું હતું.
હોટલ માલિકે જમવાનું નથી તેમ કહેતા આરોપીઓએ હોટલ અને ગાડીના વીડિયો ઉતારી ગાળો આપી હતી અને “કાલે પાછો આવીશ અને જોઈ લઈશ” તેવી ધમકી આપી ત્યાંથી ગયા હતા. ત્યારબાદ તારીખ ૪ એપ્રિલના રોજ રાત્રિના સવા એક વાગ્યે આ બંને શખ્સો સફેદ કલરની એક્ટિવા પર લાકડાના ડંડા લઈને ફરી હોટલ પર ત્રાટક્યા હતા.
હુમલાખોરોએ હોટલ બહાર બુમો પાડી માલિકને બહાર બોલાવ્યા હતા. આકાશ ભોઈએ ‘મારા પગારના પૈસા આપી દો’ તેમ કહી ખોટી માંગણી કરી હતી. જ્યારે હોટલ માલિકે કોઈ પૈસા આપવાના નીકળતા નથી તેમ કહેતા જ આરોપીઓ ઉશ્કેરાઈ ગયા હતા અને ગાળાગાળી શરૂ કરી હતી.
આકાશ ભોઈએ તેના હાથમાં રહેલા લાકડાના ડંડાથી ફરિયાદીના જમણા હાથના પંજા પર અને ત્યારબાદ જમણી બાજુના જડબા પર જોરથી ફટકો માર્યો હતો, જેના કારણે હોટલ માલિક નીચે પડી ગયા હતા.
હુમલા બાદ બંને આરોપીઓએ નીચે પડેલા ફરિયાદીને ગડદાપાટુનો માર માર્યો હતો. હોટલમાં કામ કરતા ભારતીબેન અને અન્ય માણસોએ વચ્ચે પડીને માલિકને વધુ માર ખાતા બચાવ્યા હતા. હુમલાખોરો જતી વખતે ‘આજે તો તું બચી ગયો છે, પણ ફરીવાર મોકો મળશે તો તને જીવતો નહીં છોડીએ’ તેવી જાનથી મારી નાખવાની ધમકી આપી ફરાર થઈ ગયા હતા.
ઇજાગ્રસ્ત માલિકને તાત્કાલિક નડીયાદ સિવિલ હોસ્પિટલ ખાતે ખસેડવામાં આવ્યા હતા, જ્યાં એક્સ-રે તપાસમાં તેમના જડબાના નીચેના હાડકામાં ફ્રેક્ચર થયું હોવાનું નિદાન થયું છે. પોલીસે આ મામલે ભારતીય ન્યાય સંહિતાની વિવિધ કલમો હેઠળ ગુનો નોંધી દાખલ કર્યો છે.
