ખેડૂત પર થાર ગાડી ચડાવી જીવલેણ હુમલો કરાયો

રાજકોટ ઉપલેટાના પડવલા ગામની ઘટના

(એજન્સી) રાજકોટ, રાજકોટ જિલ્લાના ઉપલેટા તાલુકાના પડવલા ગામમાં એક ખેડૂત પર જૂની અદાવતમાં ફિલ્મી ઢબે જાનલેવા હુમલો કરવામાં આવ્યો છે. રાતના અંધારામાં કાળા કલરની થાર ગાડીમાં આવેલા શખ્સોએ ખેડૂતને બાઇક પરથી પાડી દઈને લોખંડના પાઇપ અને ધોકાથી ઢોર માર માર્યો હતો. હદ તો ત્યારે થઈ ગઈ જ્યારે હુમલાખોરોએ હત્યાના ઇરાદે ખેડૂતના બંને પગ પર થાર ગાડીના ટાયર ચડાવી દીધા હતા.

આખી ઘટનાની વિગતવાર વાત કરીએ તો, ઉપલેટાના પડવલા ગામમાં માકડીયા શેરીમાં રહેતા અને ખેતી કરતા ૪૪ વર્ષીય દિપેનભાઈ વિનોદભાઈ માકડીયા ગત ૩૦ માર્ચની રાત્રે આશરે ૧૨ વાગ્યાની આસપાસ પોતાનું મોટરસાયકલ લઈને ઘરે જઈ રહ્યા હતા. તે દરમિયાન ગામની પ્રાથમિક શાળા પાસે પહોંચતા જ પાછળથી પૂરપાટ આવતી એક કાળા કલરની થાર ગાડીએ તેમના બાઈકને જોરદાર ટક્કર મારી હતી.

ટક્કર વાગતા જ દિપેનભાઈ નીચે પટકાયા હતા અને તરત જ થાર ગાડીમાંથી પડવલા ગામના જ અલીમામદ તૈયબભાઈ શેઠા, તેનો દીકરો નોમન શેઠા અને અન્ય ત્રણ અજાણ્યા શખ્સો લોખંડના પાઇપ અને બેઝબોલના ધોકા લઈને નીચે ઉતર્યા હતા.

હુમલાખોરોએ દિપેનભાઈ પર તૂટી પડીને જમણી આંખ પાસે અને વાંસાના ભાગે આડેધડ ઘા મારી ગંભીર ઈજાઓ પહોંચાડી હતી. માર મારતી વખતે અલીમામદે ધમકી પણ આપી હતી કે ‘અગાઉની માથાકૂટમાં તું બચી ગયો હતો, આજ તું નહીં બચે.

ટાયર ચડાવી દઈ ત્યાંથી નાસી છૂટ્યા હતા. રાડારાડી સાંભળીને પરિવારજનો દોડી આવ્યા હતા અને ઇજાગ્રસ્ત દિપેનભાઈને તાત્કાલિક ભાયાવદર સરકારી હોસ્પિટલ અને ત્યારબાદ વધુ સારવાર અર્થે ઉપલેટાની ક્રિષ્ના હોસ્પિટલમાં દાખલ કરવામાં આવ્યા છે.

ઇજાગ્રસ્ત ખેડૂત દિપેનભાઈએ હોસ્પિટલના બિછાનેથી એક વિડિયો જાહેર કરીને પ્રશાસન પાસે ન્યાયની માંગ કરી છે. પોલીસ ફરિયાદ મુજબ, આ જીવલેણ હુમલા પાછળનું કારણ આજથી ૬ વર્ષ પહેલાં થયેલો એક ઝઘડો અને મનદુઃખ હોવાનું સામે આવ્યું છે. હાલ ભાયાવદર પોલીસે અલીમામદ શેઠા, નોમન શેઠા અને અન્ય ત્રણ અજાણ્યા શખ્સો વિરુદ્ધ હત્યાનો પ્રયાસ સહિતની આકરી કલમો હેઠળ ગુનો નોંધીને વધુ તપાસ પી.આઈ. આર.એ. જાડેજાએ હાથ ધરી છે. જોવાનું એ રહે છે કે પોલીસ આ માથાભારે શખ્સોને ક્્યારે કાયદાના પાઠ ભણાવે છે.