પત્નીને ભરણપોષણ ન આપનાર પતિને ૬૬૦ દિવસ જેલની સજા
અમદાવાદ ફેમિલી કોર્ટના આદેશને યથાવત રાખતી હાઇકોર્ટ
ફેમિલી કોર્ટ દ્વારા કોઈ અનિયમિતતા કરવામાં આવી નથી અને રિવિઝનલ અધિકારક્ષેત્રમાં દખલગીરી માટે કોઈ કેસ બનાવવામાં આવતો નથી ઃ હાઈકોર્ટ
અમદાવાદ, પત્નીને ભરણપોષણ ન આપવા બદલ પતિને ૬૬૦ દિવસની જેલની સજા અમદાવાદ ફેમિલી કોર્ટ દ્વારા આપવામાં આવી હતી. જેને હાઈકોર્ટે પણ યથાવત્ રાખી છે. એક પતિને તેની પત્ની અને બે બાળકોને ભરણપોષણ પેટે ૩.૯૭ લાખ ચૂકવવામાં નિષ્ફળ રહેવા બદલ ૬૬૦ દિવસની જેલની સજા ફટકારવાના ફેમિલી કોર્ટના આદેશને હાઇકોર્ટે માન્ય રાખ્યો છે.આ મામલે પતિ દ્વારા ફેમિલી કોર્ટના આદેશને પડકારવામાં આવ્યો હતો. જે અરજી હાઇકોર્ટના જસ્ટિસ એચ.ડી. સુથારે રદ કરી છે. હાઇકોર્ટે અવલોકન કર્યું છે કે ફેમિલી કોર્ટે આદેશ પસાર કરતી વખતે યોગ્ય કારણો આપ્યા છે અને તેથી સમવર્તી તારણોમાં દખલગીરી માટે કોઈ કેસ બનતો નથી.
હાઇકોર્ટે વધુમાં અવલોકન કર્યું કે પતિને લાદવામાં આવેલી જેલની સજા અપ્રમાણસર નહોતી. કારણ કે પુરુષે ભરણપોષણનો બાકીનો ખર્ચ ચૂકવવામાં નિષ્ફળ રહેવા બદલ દરેક મહિના માટે દસ દિવસનો સમય હતો. કોર્ટે નોંધ્યું હતું કે,ડિફોલ્ટ ૬૬ મહિનાનો હોવાથી, સેટ-ઓફનો લાભ આપ્યા પછી કુલ ૬૬૦ દિવસની સજા ફટકારવામાં આવી હતી. ઉપરોક્ત હકીકતોને ધ્યાનમાં લેતા ડિફોલ્ટના દરેક મહિના માટે દસ દિવસની સજા અપ્રમાણસર કહી શકાય નહીં. અરજદારે પોતે શરણાગતિ સ્વીકારી હતી અને પોતાની જવાબદારી અને ચૂકવણી કરવામાં અસમર્થતા સ્વીકારી હતી. તેથી ફેમિલી કોર્ટ દ્વારા કોઈ અનિયમિતતા કરવામાં આવી નથી અને રિવિઝનલ અધિકારક્ષેત્રમાં દખલગીરી માટે કોઈ કેસ બનાવવામાં આવતો નથી.
માર્ચ ૨૦૦૨ માં પતિ-પત્નીના લગ્ન થયા હતા. જેનાથી દંપતીને બે બાળકો હતા. પતિના મતે તેમનો સંબંધ ધીમે ધીમે બગડતા ગયા હતા અને પત્ની ઓગસ્ટ ૨૦૦૭ માં ઘર છોડી ગઈ હતી. અલગ થયા પછી પત્નીએ ફોજદારી કાર્યવાહી સંહિતા (CrPC) ની કલમ ૧૨૫ હેઠળ ભરણપોષણ મેળવવા માટે કોર્ટનો સંપર્ક કર્યાે હતો. મે ૨૦૧૩ માં, ફેમિલી કોર્ટે તેની અરજીને આંશિક રીતે મંજૂર કરી અને પતિને પત્નીને દર મહિને ૨,૫૦૦, એક બાળકને ૨,૦૦૦ અને બીજા બાળકને ૧,૫૦૦ ચૂકવવાનો આદેશ આપ્યો હતો. સાથે જ કેસનો ખર્ચ પણ ચૂકવવાનો આદેશ આપ્યો હતો.
ત્યારબાદ પત્ની અને બાળકોએ કલમ ૧૨૫(૩) CrPC હેઠળ વસૂલાતની કાર્યવાહી શરૂ કરી હતી. તે તબક્કે, ભરણપોષણની બાકી રકમ લગભગ ૩.૯૭ લાખ થઈ ગઈ હતી. આ રકમની વસૂલાતની કાર્યવાહી દરમિયાન પતિ સ્વેચ્છાએ ફેમિલી કોર્ટ સમક્ષ હાજર થયો બકો અને સ્વીકાર્યું હતું કે રકમ બાકી છે. તેણે એમ પણ કહ્યું કે તેની પાસે કોઈ મિલકત નથી અને તે જરૂરી રકમ ચૂકવવામાં અસમર્થ છે. તેણે કોર્ટને ઓછી સજા ફટકારવા માટે વિનંતી કરી હતી.SS1
