પ૦ ટકા વોર્ડમાં પેનલના ફાંફાં હોવા છતાં AAPને સત્તાના સપના, ચૂંટણી વાયદા કર્યા

અમદાવાદ, ગુજરાતમાં સ્થાનિક સ્વરાજ્યની ચૂંટણીમાં આમ આદમી પાર્ટીમાં ટિકિટોની સોદાબાજીને લઈ ભડકાની સ્થિતિ છે. ભેંસ ભાગોળે છાશ છાગોળેને ઘરમાં ધમાધમ જેવી સ્થિતિ છે તેમ છતાં શનિવારે અમદાવાદ શહેર માટે આમ આદમી પાર્ટીએ ચૂંટણી ઢંઢેરો જાહેર કર્યો હતો.

અમદાવાદ શહેરના અડધો અડધ કરતા વધારે વોર્ડમાં કામ કરતા વધારે વોર્ડમાં આમ આદમી પાર્ટી ચાર ઉમેદવારોની આખી પેનલ ઊભી રાખી શકી નથી અને હવે મંગૂરી લાલ કે હસીન સપનેની જેમ અલગ અલગ જાતના વાયદાઓ કર્યા છે.

અમદાવાદ શહેર માટે ચૂંટણીનો ઢંઢેરો જાહેર કર્યો તેમાં આમ આદમી પાર્ટીએ એવો દાવો કર્યો હતો કે, અમદાવાદ મ્યુનિસિપલ કોર્પોરેશનમાં ભ્રષ્ટાચાર મુક્ત શાસન આપીશું. આ જાહેરાત વખતે આપના કાર્યકરોએ એવી ટીખળ કરી હતી કે, સ્થાનિક સ્વરાજ્યની ચૂંટણીમાં આમ આદમી પાર્ટીમાં જ ઠેર ઠેર ટિકિટોની વહેંચણીમાં નાણાંની લેતી દેતી થઈ છે.

એટલું જ નહીં પરંતુ અમદાવાદ પૂર્વના એક આગેવાને તાજેતરમાં જ પ્રભારીનો બારોબારનો ઉધડો લીધો હતો જેમાં આપ નેતાઓ સામે શરાબ અને શબાબને લગતા ગંભીર આક્ષેપો કરીને એવો દાવો કર્યો હતો કે આપના ઉમેદવારોની ડિપોઝિટ પણ પાછી મળવાની નથી.

એએમસીને લગતી મોટાભાગની સેવાઓ પહેલેથી જ ઓનલાઈન છે તેમ છતાં આપે જે ચૂંટણી ઢંઢેરો જાહેર કર્યો છે તેમાં શહીરજનોને એવો વાયદો કર્યો છે કે ડિજિટલ અમદાવાદ યોજના અંતર્ગત તમામ સેવાના કામો ઓનલાઈન કરાશે.

ઉલ્લેખનીય છે કે, આમ આદમી પાર્ટીના પ્રદેશ પ્રમુખ ઈસુદાન ગઢવી અને ધારાસભ્ય ગોપાલ ઈટાલિયા વચ્ચે છેલ્લા કેટલાક સમયથી ટકરાવો વધ્યો છે. ધારાસભ્ય ચૈતર વસાવા, સરકારની વાહવાહી કરતા ધારાસભ્ય હેમંત ખવા કૂવાના દેડકા હોય તેમ પોતાના વિસ્તાર પૂરતા જ સિમિત રહ્યા છે. ધારાસભ્ય સુધીર વાઘાણીની ભૂમિકામાં પણ કંઈ ભલીવાર નથી.