જોન ટર્નસ સંભાળશે એપલની કમાનઃ ટિમ કૂકે CEO પદ છોડવાની કરી જાહેરાત

આર્ટિફિશિયલ ઇન્ટેલિજન્સ (AI) અને નવી ટેકનોલોજીના બદલાતા યુગમાં એપલના હાર્ડવેર એન્જીનિયર જોન ટર્નસ એપલને નવી ઊંચાઈઓ પર લઈ જવા માટે સક્ષમ છે.

અમદાવાદ: ટેકનોલોજીની દુનિયામાંથી આજે એક ખૂબ જ મોટા સમાચાર સામે આવ્યા છે. વિશ્વની અગ્રણી ટેક કંપની એપલ (Apple) ના CEO ટિમ કૂકે પોતાના પદ પરથી રાજીનામું આપવાની જાહેરાત કરી છે. 15 વર્ષ સુધી એપલને સફળતાના શિખરો પર લઈ જનાર ટિમ કૂક હવે આ જવાબદારી એપલના હાર્ડવેર એન્જિનિયરિંગના ચીફ એવા જોન ટર્નસને સોંપવા જઈ રહ્યા છે.

1 સપ્ટેમ્બરથી થશે ફેરફાર કંપની દ્વારા સત્તાવાર રીતે જાહેર કરવામાં આવ્યું છે કે, 1 સપ્ટેમ્બર, 2026 થી આ નેતૃત્વ પરિવર્તન અમલમાં આવશે. 65 વર્ષીય ટિમ કૂક ભલે CEO પદ છોડી રહ્યા હોય, પરંતુ તેઓ કંપની સાથે જોડાયેલા રહેશે. ટિમ કૂક હવે એપલના ‘એક્ઝિક્યુટિવ ચેરમેન’ તરીકેની ભૂમિકા ભજવશે અને કંપનીના લાંબા ગાળાના વ્યૂહાત્મક નિર્ણયોમાં માર્ગદર્શન આપતા રહેશે.

ટિમ કૂકની ઐતિહાસિક સફર સ્ટીવ જોબ્સના અવસાન બાદ 2011માં જ્યારે ટિમ કૂકે એપલની કમાન સંભાળી હતી, ત્યારે અનેક લોકોએ કંપનીના ભવિષ્ય અંગે શંકા વ્યક્ત કરી હતી. જોકે, ટિમ કૂકે પોતાના 15 વર્ષના લાંબા અને સફળ કાર્યકાળ દરમિયાન તે તમામ શંકાઓને ખોટી સાબિત કરી દીધી હતી.

• વિક્રમી વૃદ્ધિ: ટિમ કૂકના નેતૃત્વમાં એપલનું બજાર મૂલ્યાંકન (Market Cap) $350 બિલિયનથી વધીને $4 ટ્રિલિયન સુધી પહોંચ્યું છે, જે એપલને વિશ્વની સૌથી મૂલ્યવાન ટેક કંપની બનાવે છે.

• સપ્લાય ચેઈન ક્રાંતિ: 1998માં વર્લ્ડવાઈડ ઓપરેશન્સના સિનિયર વાઈસ પ્રેસિડેન્ટ તરીકે જોડાયેલા ટિમ કૂકે એપલની સપ્લાય ચેઈનને અત્યંત મજબૂત બનાવી હતી. આઈફોન, આઈપેડ અને મેકબુક જેવા ઉત્પાદનોને વૈશ્વિક સ્તરે પહોંચાડવામાં તેમની ઓપરેશનલ કુશળતા નિર્ણાયક રહી છે.

કોણ છે નવા CEO જોન ટર્નસ? જોન ટર્નસ હાલમાં એપલના હાર્ડવેર એન્જિનિયરિંગના વડા તરીકે કાર્યરત છે. તેઓ એપલ સાથે લાંબા સમયથી જોડાયેલા એક વિશ્વસનીય ચહેરો છે. કંપનીના બોર્ડ ઓફ ડિરેક્ટર્સે તેમને આગામી CEO તરીકે પસંદ કરીને એક નવી પેઢીના નેતૃત્વ પર ભરોસો વ્યક્ત કર્યો છે. ટેક નિષ્ણાતોનું માનવું છે કે, આર્ટિફિશિયલ ઇન્ટેલિજન્સ (AI) અને નવી ટેકનોલોજીના બદલાતા યુગમાં ટર્નસ એપલને નવી ઊંચાઈઓ પર લઈ જવા માટે સક્ષમ છે.

એપલનું ભવિષ્ય અને પડકારો ટિમ કૂકનો કાર્યકાળ એ ‘સર્વિસ ઇકોસિસ્ટમ’ અને નવીનતાનો સુવર્ણકાળ રહ્યો છે. હવે જોન ટર્નસ સામે AI ક્ષેત્રે સ્પર્ધા અને નવા હાર્ડવેર ઇનોવેશનનો પડકાર રહેશે. જોકે, ટિમ કૂકનું એક્ઝિક્યુટિવ ચેરમેન તરીકે માર્ગદર્શન કંપનીને સ્થિરતા પ્રદાન કરશે.

આ ફેરફારને ટેક ઉદ્યોગમાં ‘એન્ડ ઓફ એન એરા’ (એક યુગનો અંત) તરીકે જોવામાં આવી રહ્યો છે. વિશ્વભરના એપલ પ્રેમીઓ અને રોકાણકારો હવે જોન ટર્નસના નેતૃત્વમાં એપલ કેવી પ્રગતિ કરે છે તેના પર નજર રાખી રહ્યા છે.