AIની અસર: મેટા અને માઇક્રોસોફ્ટમાં હજારો નોકરીઓ પર સંકટ, કંપનીઓ કરશે મોટું રિસ્ટ્રક્ચરિંગ

નવી દિલ્હી: આર્ટિફિશિયલ ઇન્ટેલિજન્સ (AI) ના યુગમાં ટેક જગતની દિગ્ગજ કંપનીઓ પોતાની કામ કરવાની પદ્ધતિમાં મોટા ફેરફારો કરી રહી છે. પ્રાપ્ત અહેવાલો અનુસાર, સોશિયલ મીડિયા જાયન્ટ ‘મેટા’ (Meta) અને સોફ્ટવેર ક્ષેત્રની દિગ્ગજ કંપની ‘માઇક્રોસોફ્ટ’ (Microsoft) તેમના કાર્યબળમાં મોટો ઘટાડો કરવાની તૈયારીમાં છે. કંપનીઓ AI ક્ષેત્રે જંગી રોકાણ કરી રહી છે, જેનો ખર્ચ કાઢવા માટે તેઓ ઓપરેશનલ કાર્યક્ષમતા વધારવા પર ભાર મૂકી રહી છે.

મેટા (Meta) ની યોજના: ૮,૦૦૦ કર્મચારીઓની છટણી

માર્ક ઝુકરબર્ગની માલિકીની કંપની મેટાએ તેના આંતરિક મેમોમાં સ્પષ્ટ કર્યું છે કે તેઓ તેમના કુલ વર્કફોર્સના આશરે ૧૦ ટકા એટલે કે અંદાજે ૮,૦૦૦ જેટલા કર્મચારીઓને છૂટા કરવાની યોજના ધરાવે છે. આ પ્રક્રિયા ૨૦ મે, ૨૦૨૬થી શરૂ થવાની શક્યતા છે. આ ઉપરાંત, કંપનીએ કંપનીમાં ખાલી પડેલી ૬,૦૦૦ જેટલી જગ્યાઓ પર નવી ભરતી નહીં કરવાનું પણ નક્કી કર્યું છે.

મેટાના ચીફ પીપલ ઓફિસર જેનેલ ગેલે જણાવ્યું હતું કે, “અમે આ પગલું કંપનીને વધુ કાર્યક્ષમ બનાવવા અને AI ક્ષેત્રે કરી રહેલા અન્ય રોકાણોને સંતુલિત કરવા માટે લઈ રહ્યા છીએ.”

માઇક્રોસોફ્ટ (Microsoft) માં વોલન્ટરી બાયઆઉટ

બીજી તરફ, માઇક્રોસોફ્ટ તેના અમેરિકન કર્મચારીઓ માટે ‘વોલન્ટરી બાયઆઉટ’ (સ્વૈચ્છિક રાજીનામું) પ્રોગ્રામ લઈને આવી છે. અહેવાલો મુજબ, આ યોજનાથી કંપનીના આશરે ૮,૭૫૦ કર્મચારીઓ પ્રભાવિત થઈ શકે છે.

માઇક્રોસોફ્ટના ચીફ પીપલ ઓફિસર એમી કોલમેને જણાવ્યું હતું કે, “બદલાતી જતી પ્રાથમિકતાઓને પહોંચી વળવા માટે અમે ખૂબ જ ત્વરિત ગતિએ કામ કરી રહ્યા છીએ. સફળતા ટકાવી રાખવા માટે અમારે મેનેજરોને સશક્ત બનાવવાની અને કાર્યપદ્ધતિને સરળ બનાવવાની જરૂર છે.”

શા માટે થઈ રહી છે છટણી?

આ બંને ટેક જાયન્ટ્સ અત્યારે AI ઇન્ફ્રાસ્ટ્રક્ચર, ખાસ કરીને ડેટા સેન્ટર્સ અને તેનાથી સંબંધિત ટેકનોલોજી પર અબજો ડોલરનું રોકાણ કરી રહ્યા છે.

• ડેટા સેન્ટરનો વ્યાપ: માઇક્રોસોફ્ટ જાપાન અને ઓસ્ટ્રેલિયા જેવા દેશોમાં ડેટા સેન્ટરનો વિસ્તાર કરી રહી છે.

• જંગી મૂડી ખર્ચ (Capex): મેટાએ આ વર્ષે તેના કેપિટલ એક્સપેન્ડિચર (મૂડી ખર્ચ)માં રેકોર્ડબ્રેક વધારાનું અનુમાન લગાવ્યું છે.

છેલ્લા બે વર્ષથી આ કંપનીઓ સતત રિસ્ટ્રક્ચરિંગ કરી રહી છે જેથી AI માં વધતા રોકાણની સામે ખર્ચને નિયંત્રિત કરી શકાય. એપ્રિલ મહિનાના અંતમાં બંને કંપનીઓ તેમના ત્રિમાસિક પરિણામો જાહેર કરવાની તૈયારીમાં છે, જે અગાઉ આ છટણીના સમાચારને મહત્વપૂર્ણ માનવામાં આવી રહ્યા છે.

અન્ય ક્ષેત્રમાં પણ અસર

માત્ર ટેક કંપનીઓ જ નહીં, અન્ય ક્ષેત્રોમાં પણ આ અસર જોવા મળી રહી છે. એક અહેવાલ મુજબ, KPMG પણ તેના અમેરિકન ઓડિટ પાર્ટનર્સની સંખ્યામાં ૧૦ ટકાનો ઘટાડો કરી રહી છે, જેનો ઉદ્દેશ્ય સ્વૈચ્છિક નિવૃત્તિને પ્રોત્સાહન આપવાનો છે.