સ્થાનિક સ્વરાજ્યની ચૂંટણી: કાળઝાળ ગરમી વચ્ચે ઉમેદવાર, કર્મચારી અને વૃદ્ધાનું હાર્ટ એટેકથી મોત
કેટલાંક સ્થળે અપૂરતી વ્યવસ્થાથી મતદારોના પાણી માટે વલખાં
(એજન્સી)ગાંધીનગર, ગુજરાતમાં રવિવારે તા. 26-04-2026ના રોજ એક તરફ સ્થાનિક સ્વરાજ્યની ચૂંટણીનો ગરમાવો હતો, તો બીજી તરફ આકાશમાંથી અગનગોળા વરસી રહ્યા હતા. રાજ્યમાં ગરમીનો પારો ૪૫ ડિગ્રીની નજીક પહોંચતા જનજીવન પ્રભાવિત થયું હતું. આ કાળઝાળ ગરમી અને ચૂંટણીના માહોલ વચ્ચે રાજ્યમાં ત્રણ અલગ-અલગ કરુણ ઘટનાઓ સામે આવી છે.
જામનગરમાં ‘આપ’ના ઉમેદવાર, પેટલાદમાં ચૂંટણી ફરજ પરના કર્મચારી અને પાટણમાં એક વૃદ્ધાનું હાર્ટ એટેકથી નિધન થતા ચૂંટણીના પર્વ વચ્ચે ગમગીની વ્યાપી ગઈ છે. જામનગર મહાનગરપાલિકાની ચૂંટણીના જંગ વચ્ચે આમ આદમી પાર્ટી (આપ) માટે માઠા સમાચાર આવ્યા હતા.
વોર્ડ નંબર-૩ના યુવા ઉમેદવાર નરેન્દ્રસિંહ જાડેજાનું માત્ર ૩૮ વર્ષની વયે હાર્ટ એટેકથી અવસાન થયું હતું. શનિવારે તેમની તબિયત લથડતા તેમને સારવાર આપવામાં આવી હતી. જોકે, આજે રવિવારે ફરીથી છાતીમાં અચાનક દુખાવો ઉપડતા તેમણે અંતિમ શ્વાસ લીધા હતા.
એક સક્રિય અને યુવા ઉમેદવારના આકસ્મિક નિધનથી જામનગરના રાજકીય વર્તુળોમાં શોકની લહેર ફરી વળી છે. આણંદ જિલ્લાના પેટલાદ તાલુકાના સાંસેજ ગામે ચૂંટણી પ્રક્રિયા દરમિયાન એક કરુણ ઘટના ઘટી હતી. અહીં બુથ નંબર-૧ પર ફરજ બજાવતા ચૂંટણી કર્મચારી અમિતભાઈ સોલંકીને કામગીરી દરમિયાન અચાનક હાર્ટ એટેક આવ્યો હતો.
તબિયત બગડતા જ તેમને તાત્કાલિક તારાપુર સરકારી હોસ્પિટલ ખાતે ખસેડવામાં આવ્યા હતા, પરંતુ ફરજ પરના તબીબોએ તેમને મૃત જાહેર કર્યા હતા. લોકશાહીના પર્વમાં પોતાની રાષ્ટ્ર સેવા બજાવતા કર્મચારીના આકસ્મિક નિધનથી સાથી કર્મચારીઓ અને પરિવારજનોમાં ભારે આઘાત સરી પડ્યાં હતા.
પાટણની બી.એમ. સ્કૂલ ખાતે આવેલા મતદાન મથક પરથી પણ એક હૃદયદ્રાવક સમાચાર સામે આવ્યા હતા. ૬૫ વર્ષીય કમળાબેન સોલંકી નામની વૃદ્ધા આજે બપોરે મતદાન કરવા માટે કેન્દ્ર પર પહોંચ્યા હતા. મતદાન મથકમાં પ્રવેશતાની સાથે જ તેઓ અચાનક ઢળી પડ્યા હતા.
ત્યાં હાજર મેડિકલ ટીમે તેમને પ્રાથમિક સારવાર આપી હોસ્પિટલ ખસેડ્યા હતા, પરંતુ ટૂંકી સારવાર બાદ તેમનું મૃત્યુ નીપજ્યું હતું. તબીબોના જણાવ્યા અનુસાર, ગરમી અને અગાઉની નાજુક તબિયત વચ્ચે હાર્ટ એટેક આવવો મોતનું કારણ હોઈ શકે છે. પોતાની નાજુક તબિયત હોવા છતાં મતાધિકારનો ઉપયોગ કરવા આવેલા વૃદ્ધાના મૃત્યુથી સમગ્ર વિસ્તારમાં શોકનું મોજું ફરી વળ્યું છે.
