“ગુજરાતી સિનેમા પ્રોડ્યુસર્સ કાઉન્સિલ: એક સામૂહિક સંવાદ”નું AMA ખાતે આયોજન
AMA દ્રારા ગુજરાતી સિનેમા ઇકોસિસ્ટમને મજબૂત કરવા માટે સામૂહિક સંવાદનું આયોજન કરાયું
Ahmedabad, અમદાવાદ મેનેજમેન્ટ એસોસિએશન (એએમએ) “ગુજરાતી સિનેમા પ્રોડ્યુસર્સ કાઉન્સિલ: એક સામૂહિક સંવાદ”નું એએમએ કેમ્પસ ખાતે સફળતાપૂર્વક આયોજન કરવામાં આવ્યું હતું.
આ કાર્યક્રમમાં ગુજરાતી ફિલ્મ ઉદ્યોગના અગ્રણીઓને એક મંચ પર લાવી ભવિષ્યલક્ષી રાઉન્ડ ટેબલ ચર્ચા કરવામાં આવી હતી. આ સંવાદમાં સક્રિય નિર્માતાઓ અને હિતધારકોની પ્રોત્સાહક સહભાગીતા જોવા મળી હતી, જેમાં પ્રોડક્શન ઇકોનોમિક્સ, પોલિસી સપોર્ટ અને ઉદ્યોગના ઇકોસિસ્ટમને મજબૂત કરવા માટે હિતધારકો વચ્ચેના સહયોગ અંગે અર્થપૂર્ણ ચર્ચાઓ કરવામાં આવી હતી.
શ્રી સંજય ચક્રવર્તી અને શ્રી અભિષેક જૈન દ્રારા પરિકલ્પિત આ પહેલે મુક્ત અને રચનાત્મક સંવાદ માટે પ્લેટફોર્મ પૂરું પાડ્યું હતું, જેમાં એએમએ ટીમ દ્રારા વિચારોના આદાન-પ્રદાન માટે યોગ્ય વાતાવરણ પૂરું પાડવામાં આવ્યું હતું.
આ પ્રસંગે એએમએના એક્ઝિક્યુટિવ ડાયરેક્ટર શ્રી ઉન્મેષ દીક્ષિતે જણાવ્યું હતું કે, “ઉદ્યોગના હિતધારકોને એક સાથે લાવવા માટે આવા પ્લેટફોર્મ આવશ્યક છે, જે સામૂહિક વિચારસરણી અને પ્રાદેશિક સિનેમાના ભવિષ્યને આકાર આપી શકે તેવા મહત્વપૂર્ણ સૂચનો પૂરા પાડે છે.”
સત્રની શરૂઆત શ્રી સંજય ચક્રવર્તીના સ્વાગત પ્રવચનથી થઈ હતી, ત્યારબાદ મોડરેટર શ્રી નૈષધ પુરાણી દ્રારા વિષય અંગે પ્રારંભિક સમજૂતી આપવામાં આવી હતી. આ રાઉન્ડ ટેબલ ચર્ચામાં દરેક સહભાગીએ સક્રિયપણે પોતાનો ફાળો આપ્યો હતો.
એએમએ દ્રારા આ રાઉન્ડ ટેબલને સમજદારીપૂર્વકનું અને અસરકારક બનાવવા માટે તમામ સહભાગીઓનો તેમના ઉત્સાહભર્યા જોડાવવા બદલ અને મૂલ્યવાન સૂચનો આપવા માટે નિષ્ઠાપૂર્વક આભાર વ્યક્ત કરે છે. એએમએ ભવિષ્યમાં પણ આવા વધુ સંલગ્ન કાર્યક્રમોનું આયોજન કરવા માટે આતુર છે.
