સોલા સિવિલ હોસ્પિટલ ‘નમો સ્વચ્છતા અભિયાન’: ૭૯ કિલો ઘન કચરો હટાવી બિનઉપયોગી તબીબી સાધનો ભંગારમાં કાઢ્યા.
File Photo
-
હોસ્પિટલના ચેપને ઘટાડવા યુદ્ધના ધોરણે જંતુનાશક કામગીરી કરાઈ.
-
દર્દીઓની સુવિધા માટે પ૦૮ અગ્નિશામકો અને ઈલેક્ટ્રિક સાધનો રિપેર કરાયા.
-
દર્દીઓના સગાંઓએ હોસ્પિટલની કોર્પોરેટ જેવી સ્વચ્છતાના વખાણ કર્યા.
અમદાવાદ, દર્દીઓની સુરક્ષા અને સ્વચ્છતામાં સુધારો લાવવાના ઉદ્દેશ્ય સાથે રાજ્ય સરકારના ‘નમો સ્વચ્છતા અભિયાન’ અંતર્ગત અમદાવાદની સોલા સિવિલ હોસ્પિટલ દ્વારા ૭૯ કિલો ઘન કચરાનો નિકાલ કરવામાં આવ્યો છે. આ સાથે જ બિનઉપયોગી બનેલા ૧૫૯ તબીબી ઉપકરણોને ભંગાર (સ્ક્રૅપ) કરવાની પ્રક્રિયા શરૂ કરાઈ છે અને ૫૦૮ અગ્નિશામક યંત્રોની સર્વિસિંગ સહિત વ્યાપક જાળવણીની કામગીરી હાથ ધરવામાં આવી છે.
રાજ્ય સરકાર દ્વારા સમગ્ર ગુજરાતમાં અમલી આ અભિયાન અંતર્ગત, માઇક્રો લેવલે સઘન સફાઈ, જંતુનાશક પ્રક્રિયા અને ઈન્ફ્રાસ્ટ્રક્ચરની જાળવણી દ્વારા હોસ્પિટલમાંથી ફેલાતા ચેપ (નોસોકોમિયલ ઇન્ફેક્શન)ને ઘટાડવા પર વિશેષ ધ્યાન કેન્દ્રિત કરવામાં આવ્યું છે.
હોસ્પિટલ વહીવટીતંત્રના જણાવ્યા અનુસાર, વિવિધ વિભાગોમાંથી આશરે ૭૯ કિલો ઘન કચરો સાફ કરવામાં આવ્યો છે, જ્યારે નિર્ધારિત પ્રક્રિયાઓ મુજબ ૧૫૯ બિનઉપયોગી તબીબી ઉપકરણો અને ૧,૩૬૫ નકામી વસ્તુઓને ભંગારમાં કાઢવાની પ્રક્રિયા શરૂ કરવામાં આવી છે.
રેસિડેન્ટ મેડિકલ ઓફિસર (RMO) ડૉ. હેમાંગિની પટેલે જણાવ્યું હતું કે, હોસ્પિટલમાંથી ફેલાતા ચેપનું જોખમ ઘટાડવા માટે હોસ્પિટલ દ્વારા યુદ્ધના ધોરણે સફાઈ, જંતુનાશક પ્રક્રિયા અને બિનજરૂરી સામગ્રી હટાવવાની કામગીરી કરવામાં આવી રહી છે. તેમણે ઉમેર્યું કે, “દર્દીઓ માટે સુરક્ષિત અને સ્વચ્છ વાતાવરણ ઊભું કરવા માટે સમગ્ર હોસ્પિટલમાં સતત દેખરેખ રાખવામાં આવી રહી છે.”
આ ઝુંબેશ હેઠળ ઇન્ડોર અને આઉટડોર વિસ્તારો, હોસ્પિટલ કમ્પાઉન્ડ અને શૌચાલયોને આવરી લેવામાં આવ્યા છે. સ્વચ્છતાની આ કામગીરીની સાથે સાથે, હોસ્પિટલે ૫૦૮ અગ્નિશામક યંત્રો (ફાયર એક્સટિંગ્વિશર) ને ફરીથી ભરવા અથવા નવા ઇન્સ્ટોલ કરવાનું કામ પૂર્ણ કર્યું છે.
આ ઉપરાંત આવશ્યક સુવિધાઓમાં જાળવણીનું કામ પણ કરવામાં આવ્યું છે. તપાસવામાં આવેલા ૩૧૯ પાણીના નળમાંથી ૫૬ નળનું સમારકામ કરવામાં આવ્યું અથવા બદલવામાં આવ્યા. વિદ્યુત વ્યવસ્થામાં, દર્દીઓ અને તેમના સગાં-સંબંધીઓની સુવિધા માટે ૬૩ બલ્બ અને ૨૨ સીલિંગ ફેન રિપેર કરવામાં આવ્યા હતા. હોસ્પિટલના ૫૭૫ ફર્નિચર, તબીબી અને આઇટી સાધનોમાંથી ૧૦૩ વસ્તુઓનું સમારકામ કરીને તેને ફરીથી ઉપયોગમાં લેવા યોગ્ય બનાવવામાં આવી છે.
ડૉ. પટેલે જણાવ્યું કે તબક્કાવાર રીતે આશરે ૩૦૦ જેટલી જૂની બેડશીટ્સ, પિલો કવર (ઓશીકાના કવર) અને ગાદલા બદલવાની કામગીરી પણ શરૂ કરી દેવામાં આવી છે. તેમણે વધુમાં જણાવ્યું કે તમામ મેડિકલ અને પેરામેડિકલ સ્ટાફને નિર્ધારિત કલર-કોડેડ સેગ્રિગેશન સિસ્ટમ (રંગ-આધારિત વર્ગીકરણ) નો ઉપયોગ કરીને બાયોમેડિકલ કચરાના વૈજ્ઞાનિક નિકાલ અંગે વિશેષ તાલીમ આપવામાં આવી છે.
તેમણે કહ્યું કે હોસ્પિટલમાં ફ્લોર, દિવાલો, બારીઓ, કાચની પેનલો અને સીલિંગ ફેનની નિયમિત સફાઈ કરવામાં આવી રહી છે, જ્યારે શૌચાલય, બાથરૂમ અને તૂટેલી ટાઇલ્સના સમારકામ સહિત સિવિલ રિપેરિંગની કામગીરી પણ હાથ ધરવામાં આવી છે. ડૉ. પટેલે ભારપૂર્વક જણાવ્યું કે, “સ્વચ્છતા એ એક દિવસનું અભિયાન નથી પરંતુ વર્ષભર ચાલતી સતત પ્રક્રિયા છે, અને વહીવટીતંત્ર હોસ્પિટલના ચેપના બનાવો ઘટાડવા માટે સંપૂર્ણપણે પ્રતિબદ્ધ છે.”
આ અભિયાન દરમિયાન હોસ્પિટલમાં સારવાર લઈ રહેલા દર્દીઓના સગાંઓએ પણ પોતાના અનુભવો શેર કર્યા હતા. સાણંદના પ્રકાશકુમાર મેનિયાએ જણાવ્યું હતું કે ડોક્ટરો, સફાઈ કામદારો અને અન્ય સ્ટાફે ત્વરિત અને સહયોગી સેવા પૂરી પાડી છે. તેમણે મુલાકાતીઓને હોસ્પિટલ પરિસરમાં સ્વચ્છતા જાળવવામાં મદદ કરવા અપીલ પણ કરી હતી.
બોડકદેવના અમી પટેલે જણાવ્યું હતું કે સોલા સિવિલ હોસ્પિટલની મુલાકાત લીધા બાદ સરકારી હોસ્પિટલો પ્રત્યેની તેમની ધારણા બદલાઈ ગઈ છે. તેમણે કહ્યું, “સોલા સિવિલ હોસ્પિટલની મુલાકાત લીધા પછી સરકારી હોસ્પિટલો અસ્વચ્છ હોય છે તેવી ગેરસમજ સંપૂર્ણપણે દૂર થઈ ગઈ છે. સતત સફાઈ, પીવાનું શુદ્ધ પાણી અને વ્યવસ્થિત વાતાવરણને કારણે આ હોસ્પિટલ કોઈ કોર્પોરેટ હોસ્પિટલથી ઓછી નથી લાગતી.”
કોવિડ-૧૯ મહામારીના સમયથી હોસ્પિટલમાં સેવા આપી રહેલા સફાઈ કામદાર રમિલા મકવાણાએ જણાવ્યું હતું કે દર્દીઓના બેડ, લોકર, વેન્ટિલેટર અને મોનિટર જેવા સંવેદનશીલ ઉપકરણોને દરરોજ સારી રીતે સાફ અને જંતુમુક્ત કરવામાં આવે છે. તેમણે ઉમેર્યું કે, “જ્યારે પણ જરૂર પડે ત્યારે દર્દીઓની બેડશીટ પણ દિવસમાં બે વાર બદલવામાં આવે છે.”
હોસ્પિટલ વહીવટીતંત્રે જણાવ્યું હતું કે આ કવાયત સ્વચ્છતાના ધોરણો સુધારવા, ચેપ નિયંત્રણના પગલાં મજબૂત કરવા અને દર્દીઓ તથા મુલાકાતીઓ માટે સ્વચ્છ અને સુરક્ષિત વાતાવરણ સુનિશ્ચિત કરવા સાથે હેલ્થકેર ઈન્ફ્રાસ્ટ્રક્ચરની જાળવણી માટેના તેના સતત પ્રયાસોનો એક ભાગ છે.
