રાજસ્થાનમાં કોંગો ફીવરની એન્ટ્રી, ૫૧ વર્ષની મહિલાનું મોત

જોધપુર, રાજસ્થાનના જોધપુરમાં રહેતી ૫૧ વર્ષીય મહિલાનું કોંગો ફીવરથી મોત થયું હતું. આ મામલો સામે આવ્યા બાદ રાજ્ય સરકારે નિવારણ અને રક્ષણ માટે રાજ્યભરમાં માર્ગદર્શિકા બહાર પાડી છે. કોંગો તાવ એક જીવલેણ રોગ છે, જે પ્રાણીઓથી માણસોમાં ફેલાય છે.

વહીવટીતંત્રે અસરગ્રસ્ત વિસ્તારમાં ઝડપથી કાર્યવાહી કરવા સૂચના આપી છે, જેથી રોગને ફેલાતો અટકાવી શકાય.એજન્સી અનુસાર, જોધપુરની રહેવાસી ૫૧ વર્ષીય મહિલા અમદાવાદની મ્યુનિસિપલ મેડિકલ કોલેજમાં સારવાર હેઠળ હતી. મહિલા કોંગો ફીવરથી પીડિત હતી.

નેશનલ ઈન્સ્ટીટ્યુટ ઓફ વાયરોલોજી, પુણે દ્વારા હાથ ધરવામાં આવેલી તપાસમાં આ વાતની પુષ્ટિ થઈ છે. બુધવારે સારવાર દરમિયાન તેનું મોત નીપજ્યું હતું.પબ્લિક હેલ્થ ડાયરેક્ટર ડૉ. રવિ પ્રકાશ માથુરે કહ્યું કે જોધપુરના ચીફ મેડિકલ અને હેલ્થ ઓફિસરને અસરગ્રસ્ત વિસ્તારમાં ટીમ મોકલીને નિવારક પગલાં લેવા સૂચના આપવામાં આવી છે.

આ સાથે, શંકાસ્પદ અને લક્ષણોવાળા દર્દીઓને ઓળખવા જોઈએ અને તેમને આઈસોલેશનમાં રાખવા જોઈએ.રાજ્ય સરકારે તમામ સરકારી અને ખાનગી તબીબી સંસ્થાઓને સૂચના આપી છે કે જો કોઈ દર્દીમાં કોંગો ફીવરના લક્ષણો જોવા મળે તો તેના સેમ્પલ તાત્કાલિક લઈ ટેસ્ટિંગ માટે મોકલવામાં આવે અને આ અંગે મેડિકલ વિભાગને પણ જાણ કરવામાં આવે.

આ સિવાય નાગૌરના ૨૦ વર્ષીય યુવકને જયપુરની હોસ્પિટલમાં આઈસોલેશનમાં રાખવામાં આવ્યો હતો, તેનો મંકીપોક્સ ટેસ્ટ રિપોર્ટ નેગેટિવ આવ્યો છે.

આ યુવક દુબઈથી જયપુર આવ્યો હતો અને એરપોર્ટ પર હેલ્થ ચેકઅપ દરમિયાન તેના શરીર પર ફોલ્લીઓ મળી આવી હતી. તપાસમાં તે મંકીપોક્સથી પીડિત હોવાનું જાણવા મળ્યું હતું.રાજ્ય સરકારે લોકોને કોંગો ફીવરના લક્ષણો અંગે સતર્ક રહેવા અપીલ કરી છે અને કોઈપણ શંકાસ્પદ પરિસ્થિતિ જણાય તો તુરંત ડોક્ટરનો સંપર્ક કરવો.SS1MS