મહેસાણાઃ અપરિણીતને આરોગ્ય કર્મીએ ત્રણ સંતાનોનો પિતા દર્શાવ્યો

મહેસાણા, મહેસાણા જિલ્લાના અપરિણીત યુવકની જાણ બહાર અડાલજ ખાતે તેની નસબંધી કરી દેવાની ખળભળાટ મચાવી દેનારી ઘટનાની તપાસમાં વધુ એક ચોંકાવનારો ખુલાસો થયો છે.

અપરિણીત યુવકને નસબંધી કરવા માટે લઈ જનાર આરોગ્ય કર્મચારીએ કાગળો પર તેને પરિણીત અને ત્રણ સંતાનોનો પિતા દર્શાવ્યો હોવાનું ખુલ્યું છે.

આરોગ્ય વિભાગે નસબંધીના અન્ય કેસોની તપાસ પણ હાથ ધરી છે.મહેસાણા જિલ્લાના જોટાણા તાલુકાના સુરજ પ્રાથમિક આરોગ્ય કેન્દ્રની હદમાં આવતા ધનાલી ગામના મલ્ટી પર્પઝ હેલ્થ વર્કર દ્વારા નવી સેઢાવી ગામે રહેતા અપરિણીત યુવકનું તા.૨૯-૧૧-૨૦૨૪ના રોજ અડાલજ સામૂહિક આરોગ્ય કેન્દ્ર ખાતે લઈ જઈ નસબંધીનું ઓપરેશન કરાવી દેવાયું હતું.

વકને જામફળની વાડીમાં મજૂરી કરવા જવાનું કહીંને સરકારી ગાડીમાં લઈ જઈ દારૂ પીવડાવ્યા બાદ તેનું ઓપરેશન કરી દેવાયું હોવાના આક્ષેપ યુવક અને તેના પરિવારજનોએ કર્યા છે.

આ સમગ્ર ઘટના બહાર આવતાં ખળભળાટ મચી જવાની સાથે આરોગ્ય તંત્ર દોડતું થઈ ગયું છે.મુખ્ય જિલ્લા આરોગ્ય અધિકારી ડૉ. મહેશ કાપડિયાએ જણાવ્યું હતું કે, જોટાણા તાલુકા આરોગ્ય અધિકારી સહિતની આરોગ્યની ટીમે કરેલી તપાસમાં યુવકને ભોળવીને નસબંધી કરવા લઈ જનાર મલ્ટી પર્પઝ હેલ્થ વર્કરે કાગળ પર યુવકને પરિણીત તેમજ બે પુત્ર અને પુત્રી મળીને ત્રણ સંતાનોના પિતા તરીકે દર્શાવ્યો હોવાની ચોંકાવનારી વિગતો ખુલી છે.

આ પ્રકરણની ઊંડાણપૂર્વકની તપાસની સાથે સાથે આરોગ્ય તંત્ર દ્વારા નસબંધીના અન્ય કેસોની તપાસ પણ હાથ ધરાઈ છે.ખળભળાટ મચાવી દેનારી આ ઘટનાને ગંભીરતાથી લઈ આરોગ્ય તંત્ર દ્વારા કરાયેલી પ્રાથમિક તપાસમાં દોષિત જણાયેલા ધનાલીના મલ્ટી પર્પઝ હેલ્થ વર્કરને જિલ્લા વિકાસ અધિકારી દ્વારા સસ્પેન્ડ કરીને ખેરાલુ તાલુકા હેલ્થ કચેરીએ મુકી દેવાયો છે અને તેની સામે ખાતાકીય તપાસ પણ હાથ ધરાઈ હોવાનું સૂત્રોએ જણાવ્યું હતું.SS1MS