શાંતિ વાર્તાનો ફિયાસ્કો! ઈરાને કહ્યું- અમે કોઈ બેઠકમાં જવાના નથી
ટ્રમ્પનો દોહામાં મીટિંગનો દાવો-અમેરિકા અને ઈરાનનું પ્રતિનિધિમંડળ દોહામાં મુલાકાત કરવાનું છે.
ઈરાનઃ આ પ્રવાસને દોહામાં અમેરિકાના અધિકારીઓ સાથેની કોઈ બેઠક કે વાર્તાલાપ સાથે કોઈ લેવાદેવા નથી.
નવી દિલ્હી, કતારના પાટનગર દોહામાં અમેરિકા અને ઈરાન વચ્ચે મંગળવારે યોજાનારી સંભવિત વાતચીત અત્યારે સંપૂર્ણપણે અદ્ધરતાલ લટકી ગઈ છે. અમેરિકાના પ્રમુખ ડોનાલ્ડ ટ્રમ્પે જાહેરાત કરી હતી કે અમેરિકા અને ઈરાનનું પ્રતિનિધિમંડળ દોહામાં મુલાકાત કરવાનું છે. પરંતુ, આ જાહેરાતના ગણતરીના કલાકોમાં જ ઈરાને સ્પષ્ટ નકારો ભણી દીધો છે કે આગામી દિવસોમાં અમેરિકા સાથે કોઈ પણ પ્રકારની વાતચીતનો કોઈ કાર્યક્રમ નક્કી નથી.
ઈરાનના આ ચોંકાવનારા નિવેદને બંને દેશો વચ્ચે ચાલી રહેલા નાજુક શાંતિ કરારની લાઈફલાઈનને નબળી પાડી દીધી છે. હોર્મુઝની ખાડીમાંથી જહાજોના પસાર થવા મુદ્દે ચાલી રહેલા મતભેદો ફરી સપાટી પર આવ્યા છે.આ સમગ્ર ઘટનાક્રમ એવા સમયે સામે આવ્યો છે જ્યારે હજુ થોડા દિવસો પહેલા જ બંને દેશો વચ્ચે સ્વિટ્ઝરલેન્ડમાં સૈન્ય સંઘર્ષ સમાપ્ત કરવા માટે એક ડીલ થઈ હતી.
એવું લાગી રહ્યું હતું કે મિડલ ઈસ્ટનું મહાયુદ્ધ હવે શાંતિની દિશામાં આગળ વધી રહ્યું છે. પરંતુ અચાનક હોર્મુઝમાં જહાજોની અવરજવર અંગે નવો વિવાદ શરૂ થયો, જેના જવાબમાં અમેરિકાએ ઈરાનના શહેરો પર ભારે બોમ્બમારો પણ કર્યા હતો.
દોહામાં યોજાનારી આ બેઠક અંગે ઈરાનના વિદેશ મંત્રાલયના પ્રવક્તા ઈસ્માઈલ બગાઈએ જણાવ્યું કે, ઈરાનનું એક પ્રતિનિધિમંડળ આ અઠવાડિયે કતારની મુલાકાતે જશે ખરું, પરંતુ આ પ્રવાસને દોહામાં અમેરિકાના અધિકારીઓ સાથેની કોઈ બેઠક કે વાર્તાલાપ સાથે કોઈ લેવાદેવા નથી. તેહરાન અને અમેરિકા વચ્ચે આગામી દિવસોમાં કોઈ વાતચીત નક્કી થઈ નથી.
અંતિમ કરાર પર હજુ ચર્ચા શરૂ થઈ નથી, કારણ કે ઈરાનની પ્રાથમિકતા હાલમાં ડીલ સંબંધિત એમઓયુની મુખ્ય જોગવાઈઓનો અમલ કરાવવાની છે.આશ્ચર્યની વાત એ છે કે ઈરાનનું આ નિવેદન ડોનાલ્ડ ટ્રમ્પની સોશિયલ મીડિયા પોસ્ટના થોડા જ સમય બાદ આવ્યું છે.
