રિવરફ્રન્ટ નજીક મોપેડ સ્લિપ થઈને થાંભલે ટકરાતા સગા ભાઈ-બહેનના મોત

(એજન્સી)અમદાવાદ, અમદાવાદના સાબરમતી રિવરફ્રન્ટ વેસ્ટ પોલીસ સ્ટેશનથી માત્ર 50 મીટરના અંતરે ૨૭મી જુલાઈ એક ગમખ્વાર અકસ્માત સર્જાયો હતો. પૂરપાટ ઝડપે આવી રહેલું મોપેડ સ્ટ્રીટ લાઈટના થાંભલા સાથે ધડાકાભેર અથડાતાં સગા ભાઈ બહેનના મોત નિપજ્યા હતા.

મળતી માહિતી અનુસાર, ૧૭ વર્ષીય કાવ્ય નિશીથ મહેતા અને તેની બહેન જૈના નિશીથ મહેતા (ઉં. ૧૪) મોપેડ લઈને જતા હતા.

મોપેડ કાવ્ય મહેતા ચલાવતો હતો. આ દરમિયાન રિવરફ્રન્ટ વેસ્ટ પોલીસ સ્ટેશન નજીક પહોંચતાં જ તેણે મોપેડ પરનો કાબૂ ગુમાવી દીધો હતો અને મોપેડ સીધું રોડ પર આવેલા સ્ટ્રીટ લાઈટના થાંભલા સાથે અથડાયું હતું. આ દુર્ઘટનામાં કાવ્ય મહેતાનું ઘટના સ્થળે જ મૃત્યુ થયું હતું, જ્યારે જૈના મહેતાને સારવાર માટે હોસ્પિટલ પહોંચાડાઈ હતી.

અમદાવાદ રિવરફ્રન્ટ પર ગમખ્વાર અકસ્માત

અમદાવાદ રિવરફ્રન્ટ પર એક્ટિવા થાંભલા સાથે ધડાકાભેર અથડાઈ હતી. અકસ્માતમાં સગીર ભાઈ-બહેન ગંભીર રીતે ઇજાગ્રસ્ત થયા હતા, જેમાં ભાઈનું મોત નીપજ્યું છે.

ઘટનાને પગલે પોલીસે તપાસ હાથ ધરી છે.#Ahmedabad #Riverfront #RoadAccident #GujaratNews… pic.twitter.com/5fYQYrNVBZ

— Sudarshan ગુજરાત (@SudarshanNewsGJ) July 27, 2026

આ અકસ્માત સમયે કાવ્ય મહેતાની પાછળ બેઠેલી જૈનાને ભારે ઈજા પહોંચી હતી. જૈનાને સારવાર અર્થે તાત્કાલિક SVP હોસ્પિટલ ખસેડાઈ હતી, જ્યાં તેની સારવાર ચાલી રહી છે.

આ સમગ્ર ઘટનાના સીસીટીવી ફૂટેજ પણ સામે આવ્યા છે, જેમાં વાહનની સ્પીડ વધુ હોવાના કારણે આ ગોઝારો અકસ્માત સર્જાયો હોવાનું સ્પષ્ટ દેખાઈ રહ્યું છે. પોલીસે સીસીટીવી ફૂટેજના આધારે આગળની કાર્યવાહી હાથ ધરી છે.