સીરીયલ કિલર ઝડપાયો : એટીએસનું સફળ ઓપરેશન
(પ્રતિનિધિ) અમદાવાદ: અમદાવાદ સહિત રાજયમાં કેટલીક વ્યક્તિઓની ક્રુરતાપૂર્વક હત્યા કરી તેના હાથપગ બાંધી મૃતદેહોને પાણીમાં ફેંકી દેવાની ઘટનાઓમાં આજે એટીએસને મહત્વપૂર્ણ સફળતા મળી છે અને આ તમામ ઘટનાઓમાં સુરતથી સીરીયલ કિલરને ઝડપી લઈ તેની પુછપરછ કરતા પાંચ હત્યાની ઘટનાઓનો ભેદ ઉકેલાયો છે અને હજુ પણ કેટલીક ચોંકાવનારી વિગતો એટીએસને મળી રહી છે જેના પગલે સાંજ સુધીમાં મહત્વપૂર્ણ ખુલાસાઓ થાય તેવુ મનાઈ રહયું છે.
આ અંગેની વિગત એવી છે કે અમદાવાદ નજીક થોડા સમય પહેલા એક વ્યકિતની ક્રુરતાપૂર્વક હત્યા કરી મૃતદેહને પાણીમાં નાંખી દેવામાં આવ્યો હતો આ ઉપરાંત રાજયમાં પણ આવી ઘટનાઓ ઘટી હતી જેમાં એટીએસ ખાનગી રાહે તપાસ કરી રહી હતી આ દરમિયાનમાં કેટલીક મહત્વપૂર્ણ વિગતો અધિકારીઓને મળી હતી
જેના આધારે ગઈકાલે મોડી સાંજે સુરતમાં વોચ ગોઠવવામાં આવી હતી અને તેમાં એક શખ્સને ઝડપી લેવામાં આવ્યો હતો આ શખ્સની કડકાઈથી પુછપરછ કરવામાં આવતા એક પછી એક મહત્વપૂર્ણ વિગતો બહાર આવવા લાગી હતી પકડાયેલા આરોપીએ રાજયમાં કુલ પ વ્યક્તિઓની હત્યા કર્યાનું પ્રાથમિક પુછપરછમાં કબુલી લીધું છે. જેના પગલે એટીએસના અધિકારીઓ ચોંકી ઉઠયા હતા આરોપીની પુછપરછ ચાલુ રાખવામાં આવી છે અને ઘટનાઓ જે વિસ્તારમાં બની છે તે સ્થાનિક પોલીસ સ્ટેશનને પણ જાણ કરવામાં આવી છે.
