રિયા જેલમાંથી છૂટ્યા પછી પહેલીવાર જાહેરમાં આવી
મુંબઈ: ડ્રગ કેસના કારમે જેલમાં ગયેલી બોલિવૂડ એક્ટ્રેસ રિયા ચક્રવર્તી લગભગ એક મહિના પછી બુધવારે જેલમાંથી બહાર આવી છે. તે ગુરુવારે મુંબઇના સાંતાક્રુઝ પોલીસ સ્ટેશનમાં હાજર થઈ હતી. જેલમાંથી બહાર આવ્યા પછી તે પહેલીવાર જોવા મળી છે. હકીકતમાં, જામીન શરતોમાંની એક મુજબ, રિયા ચક્રવર્તીએ ૧૦ દિવસ માટે સવારે ૧૧ થી સાંજના ૫ વાગ્યા દરમિયાન તેના ઘર નજીક પોલીસ સ્ટેશનમાં હાજરી નોંધાવવી પડશે. રિયાની માતાએ કહ્યું, રિયા પર શું વિત્યું છે, તે કેવી રીતે સ્વસ્થ થશે? પરંતુ તે ફાઇટર છે, તે મજબૂત થશે.
રિયાના મિત્રોએ તેને જેલના દરવાજેથી રીસિવ કરી હતી અને તેણીને સાંતાક્રુઝના ઘરે પહોંચાડી હતી. તેની માતા સંધ્યા ચક્રવર્તીએ કહ્યું હતું કે, હવે તેની દીકરી થોડા સમય બેસીને ‘ખોટી બદનામી’ અને સમગ્ર દેશે જે ‘લિંચિંગ’ કર્યું છે. તે ખોટા સપનાથી બહાર આવશે. તેમણે વધુમાં કહ્યું, મારે તેને આ દુઃખમાંથી બહાર કાઢવા માટે થેરાપી કરાવવી પડશે. રિયાની માતાએ કહ્યું કે રાહતની વાત એ છે કે તે જેલમાંથી બહાર આવી ગઈ છે. પરંતુ દુર્ભાગ્યે, આ બધું હજું સમાપ્ત થયું નથી. મારો દીકરો હજુ જેલમાં છે અને આ બધી વાતો વિચારીને હું પાગલ છું.
રિયાના જામીનથી ખુશ સતીષ માનશીંદેએ એક વેબસાઇટને ઇન્ટરવ્યુમાં જણાવ્યું કે, તે ૨૮ દિવસ દરમિયાન જેલમાં રિયાને મળવા આવ્યો હતો. માનશીંદે કહ્યું કે, તેને એ જોઈને ખુશી છે કે રિયા ડિપ્રેશનને બદલે કેદીઓને યોગ શીખવવા માટે જેલમાં સમય પસાર કરી રહી છે. તે ૨૮ દિવસ જેલમાં સામાન્ય કેદીની જેમ રહી. રિયા ચક્રવર્તીને ૧૦ દિવસ સુધી તેના ઘર નજીક પોલીસ સ્ટેશનમાં હાજરી નોંધાવવાની સાથે અન્ય ઘણી શરતોનું પાલન કરવું પડશે. રિયાને જામીન માટે ૧ લાખ રૂપિયા ચૂકવવાનું કહેવામાં આવ્યું છે. તે પોતાનો પાસપોર્ટ તપાસ એજન્સીને સબમિટ કરી દે. તે મુંબઈના એનડીપીએસના સ્પેશ્યિલ જજની મંજૂરી લીધા વિના દેશ છોડી શકશે નહીં.
જો રિયા ગ્રેટર મુંબઇની બહાર જવાની હોય, તો તેણે તપાસ અધિકારીને જાણ કરવી પડશે અને તેને અગાઉથી પ્રવાસની જાણ કરવી પડશે. તેને ૬ મહિના સુધી દર મહિનાના પહેલા સોમવારે સવારે ૧૦થી ૧૧ દરમિયાન હાજરી દર્શાવવા માટે તપાસ એજન્સીની ઓફિસે પહોંચવું પડશે. જ્યાં સુધી યોગ્ય કારણ ન હોય ત્યાં સુધી રિયાને કોર્ટની તારીખો પર હાજર રહેવું પડશે. તે કેસના પુરાવા અથવા તપાસમાં ગેરરીતિ કરી શકશે નહીં.
