ગાડીના એન્જિનમાં આગ લાગતાં બોનેટમાં છૂપાવેલા 1.74 કરોડમાંથી 1.87 લાખ બળ્યા
પ્રતિકાત્મક
મધ્ય પ્રદેશના સિવનીની ચોંકાવનારી ઘટના-ત્રણની ધરપકડઃ ગાડી ખરાબ થતાં શખ્સો નોટ મૂકી ગયા, -બોનેટમાં છૂપાવેલી ૧.૭૪ કરોડની નોટો જપ્ત
સિવની, એમપી એટલે કે મધ્યપ્રદેશના રસ્તે મહારાષ્ટ્ર અને બીજા રાજ્યોમાં બ્લેક મની સપ્લાય થતું હોવાનું ઘણી વખત ધ્યાને આવ્યું છે. ત્યારે મધ્યપ્રદેશના સિવની જિલ્લામાં સ્થિત એનએચ-૪૪થી પોલીસે એક ગાડીને ઝડપી લીધી કે જેના બોનેટમાં રૂપિયા ૧ કરોડ ૭૪ લાખ છુપાવવામાં આવ્યા હતા. પોલીસે ૩ લોકોની ધરપકડ કરી છે.
સ્થાનિક લોકોએ પોલીસને આ અંગે જાણ કરી હતી. વાત જાણે એમ છે કે સ્થાનિક લોકોએ પોલીસને એ પ્રકારે જાણ કરી હતી કે નેશનલ હાઈવે-૪૪ પર એક ગાડીમાંથી અડધી બળેલી નોટો ઉડતી જાેવા મળી છે. પોલીસે આ વિસ્તારમાં ચેકિંગ શરૂ કરતા તે શંકાસ્પદ ગાડીને રોકતા તેની ઝીણવટપૂર્વકની તપાસ કરવામાં આવી હતી.
તપાસ દરમિયાન પોલીસને ભારે માત્રામાં રૂપિયાની સાથે બળેલી હાલતમાં નોટ મળી આવી હતી. પોલીસે આ ગાડીને જપ્ત કરી લીધી છે. સંદિગ્ધ હરિઓમ યાદવે જણાવ્યું કે તે મુંબઈમાં ડ્રાઈવિંગનું કામ કરે છે અને તેનો ભાઈ હરિનાથ યાદવ બનારસમાં જ્વેલર્સની દુકાનમાં કામ કરે છે. તે ઘણીવખત બનારસથી પોતાની ગાડીમાં રોકડા રૂપિયા લઈ જાય છે અને મુંબઈ અથવા દિલ્હીથી સોનુ-ચાંદી લઈને બનારસ આવે છે. આ કામ માટે તેને સારી રકમ મળે છે.
પોલીસે આ વિશે વાત કરતા જણાવ્યું કે હરિઓમ યાદવ તેની ગાડી ખરાબ થતા મિત્ર સુનીલની કારથી મુંબઈથી રવાના થયો, રસ્તામાં હરિનાથ યાદવ તેના કોઈ માણસની સાથે બાઈક પર આવ્યો અને કારમા નોટનું બંડલ મૂકીને જતો રહ્યો. આ કારનું એન્જિન ગરમ થયું અને વાયર શોર્ટ થતા તેમાં આગ લાગી ગઈ.
આ કારણે ગાડીની બોનેટમાં રાખેલા રૂપિયામાં આગ લાગી અને નોટ બળી ગઈ. આ નોટ બળી ગયા પછી હવામાં ઉડવા લાગી. પોલીસે ૩ સંદિગ્ધ એવા હરિઓમ યાદવ, સુનીલ યાદવ અને ગ્યાસ બાબુની ધરપકડ કરી છે. ગાડીમાંથી ૧ કરોડ ૭૪ લાખની સંદિગ્ધ નોટ, ૧ લાખ ૮૭ હજારની આંશિક બળેલી નોટ અને ૫૦૦ રૂપિયાની ૮૧થી વધુ નોટ બળેલી મળી છે.
