જમાઈની સામે ખોટા કેસ કરીને હેરાનગતિ કરનારા સસરાને દંડ
અમદાવાદ, જમાઈ પર ખોટા કેસો કરી હેરાનગતિ કરનારા સસરાને હાઈકોર્ટે ૧ લાખનો દંડ ફટકાર્યો છે. પ્રાપ્ત માહિતી અનુસાર પિતાએ કોર્ટમાં પરિણીત દીકરીની સલામતીને લઈને ખોટા દાવાઓ ઉભા કરીને દીકરીને પતિ તેમજ સાસરિયાઓથી મુક્ત કરવાની વિનંતી કરી હતી.
જાે કે, જસ્ટિસ સોનિયા ગોકાણી અને જસ્ટિસ મૌના ભટ્ટની ખંડપીઠે શોધી કાઢ્યું હતું કે તે વ્યક્તિ કાયદાની પ્રક્રિયાનો દુરુપયોગ કરીને તેની પુત્રીને હેરાન કરે છે, જેમાં કારણ માત્ર એટલું જ છે કે, દીકરીએ પસંદગીથી કરેલા લગ્ન પિતાને સ્વીકાર્ય નથી. મામલો વડોદરા જિલ્લાના પાદરા તાલુકાનો છે.
અરજદારની ૨૬ વર્ષની પુત્રીએ તેનું ઘર છોડી દીધું અને બે દિવસ પછી ૩ ફેબ્રુઆરી ૨૦૨૦ના રોજ તેની પસંદગીના યુવક સાથે લગ્ન કર્યા. અરજદારે ફેબ્રુઆરી ૨૦૨૨માં હેબિયસ કોર્પસ પિટિશન દાખલ કરી હતી જેમાં દાવો કરવામાં આવ્યો હતો કે તેની પુત્રીને ઊંઝા શહેરમાં તેની ઇચ્છા વિરુદ્ધ અટકાયતમાં લેવામાં આવી હતી અને તેને મળવાની મંજૂરી આપવામાં આવી ન હતી. તેણે કહ્યું કે તેને તેના જીવનો ડર છે અને તેને તેના પતિ અને સાસરિયાઓની કસ્ટડીમાંથી મુક્ત કરવા કોર્ટને વિનંતી કરી હતી.
કોર્ટની સૂચના પર, મહિલા કોર્ટમાં હાજર થઈ અને ખુલાસો કર્યો કે તેણીના લગ્ન બે વર્ષ પહેલા થયા હતા, પરંતુ તેના પિતાનો પ્રતિકાર ચાલુ રહ્યો કારણ કે તેણીએ જે પુરુષ સાથે લગ્ન કર્યા તે માત્ર ધોરણ ૧૦ સુધી જ ભણ્યો છે જ્યારે તે પોતે સાયન્સ ગ્રેજ્યુએટ છે. આ ઉપરાંત તેના પિતાને પણ બંને પરિવારો વચ્ચે આર્થિક અસમાનતાની સમસ્યા હતી.
આ અંગે કોઈ સમાધાન ન હોવાથી તેણે દાવો દાખલ કર્યો હતો. વધુ પૂછપરછ પર હાઈકોર્ટને ખબર પડી કે પિતાને તરત જ પુત્રીના લગ્ન વિશે જાણ કરવામાં આવી હતી અને તેઓ તેને જૂન ૨૦૨૦માં મળ્યા પણ હતા. જાે કે, ૨૦૨૧ માં તેણે સ્થાનિક કોર્ટને તેની પુત્રી માટે સર્ચ વોરંટ જારી કરવા વિનંતી કરી, અને કહ્યું કે તેણીને લગ્ન માટે દબાણ કરવામાં આવ્યું હતું અને તેણીની ઇચ્છા વિરુદ્ધ ફસાવી લેવામાં આવી હતી. તેણે કહ્યું કે તેને ડર હતો કે તે માનવ તસ્કરીનો શિકાર બની શકે છે.
સ્થાનિક અદાલતે એ નિરીક્ષણને પગલે સર્ચ વોરંટની વિનંતીને નકારી કાઢી હતી કે તે વ્યક્તિ સત્ય નથી બોલતો. આ ઉપરાંત, પુત્રીના ગુમ થયાના એક વર્ષથી વધુ સમય પછી કોર્ટનો સંપર્ક કરવાનો કોઈ અર્થ નહોતો. તદુપરાંત તે સમયે પોલીસમાં કોઈ ફરિયાદ કરવામાં આવી ન હતી.
હાઈકોર્ટે માણસને હેબિયસ કોર્પસ પિટિશન દાખલ કરવા માટે પૂછપરછ કરી હતી, જાેકે તે સંપૂર્ણપણે જાણતો હતો કે તેની પુત્રી તેના પતિ સાથે ખુશ છે. તે સમયે જ અરજદારના વકીલે રજૂઆત કરી હતી કે તે તેની પુત્રી સામે ૧.૫ લાખ રૂપિયાના દાગીના અને ૪૫,૦૦૦ રૂપિયા રોકડા લઈ જવા બદલ એફઆઈઆર દાખલ કરવા માગે છે. અરજદારના આ વલણથી કોર્ટ નારાજ થઈ અને ૧ લાખ રૂપિયાનો દંડ ફટકાર્યો હતો.SSS
