કોંગ્રેસની પરિવર્તન યાત્રામાં આમોદના ટીકીટ વાંચ્છુઓનો ધારાસભ્ય ઉપર હુમલાનો પ્રયાસ
પરિવર્તન યાત્રાના રૂટ બાબતે હુમલો કરાયાનો આક્ષેપ : હુમલો થતા ધારાસભ્યએ કાર્યાલયના ઉદ્દઘાટનમાં જવાનું ટાળ્યું
(પ્રતિનિધિ) ભરૂચ, જંબુસરથી આવેલી કોંગ્રેસની પરિવર્તન આમોદમાં પ્રવેશતાં જ રૂટ બાબતે કોંગ્રેસી કાર્યકરો વચ્ચે ડખો થયો હતો.જેમાં આમોદ- જંબુસરના ધારાસભ્યને આમોદ તાલુકા કોંગ્રેસ પ્રમુખ સહિતના લોકોએ ધક્કે ચઢાવ્યા હતા.અને ધારાસભ્ય ઉપર હુમલાનો પ્રયાસ કરાયો હતો.
આમોદમાં પ્રવેશેલી કોંગ્રેસની પરિવર્તન યાત્રામાં શમાં ચોકડી ઉપર રૂટ બાબતે ધારાસભ્ય અને તાલુકા કોંગ્રેસના કાર્યકરો વચ્ચે બોલાચાલી થઈ હતી.જેમાં શહેર કોંગ્રેસ અને તાલુકા કોંગ્રેસ વચ્ચે બોલાચાલી થયા બાદ આમોદ જંબુસરના ધારાસભ્ય સંજયસિંહ સોલંકીને તાલુકા કોંગ્રેસના ટીકીટ વાંચ્છુઓ તેમજ તાલુકા કોંગ્રેસ પ્રમુખે ધારાસભ્યને ધક્કે ચઢાવી હુમલાનો પ્રયાસ કર્યો હતો.તેમજ તાલુકા કોંગ્રેસ પ્રમુખના સમર્થકોએ સંજય સોલંકી હાય હાય ના નારા લગાવ્યા હતા.
ત્યારે હાજર રહેલી પોલીસે પરિસ્થિતિ પારખીને ધારાસભ્યને ટોળાથી અલગ લઈ ગયા હતા.ત્યાર બાદ તાલુકા કોંગ્રેસની હઠ મુજબ પરિવર્તન યાત્રા તેના નિર્ધારિત રૂટ કરતા કોર્ટ વાળા રસ્તે આમોદમાં પ્રવેશી હતી.જ્યાં હાજર કોંગ્રેસના આગેવાનોએ જનતાને ભાષણ આપ્યા બાદ આમોદ તાલુકા કોંગ્રેસ કાર્યાલયનું રીબીન ઉદ્દઘાટન કરાયું હતું.જેમાં ધારાસભ્યએ જવાનું ટાળ્યું હતું અને ધારાસભ્ય સંજયસિંહ
સોલંકી શમાં હોટેલ પાસે જીલ્લા કોંગ્રેસના આગેવાનો તેમજ કાર્યકરો સાથે બેસી રહ્યા હતા. કોંગ્રેસ કાર્યાલયનું ઉદ્દઘાટન કર્યા બાદ પરિવર્તન યાત્રા આમોદથી ચાર રસ્તા ઉપર આવતા ધારાસભ્ય પરિવર્તન યાત્રામાં તેમના કાર્યકરો સાથે જાેડાયા હતાં. આમોદ ચાર રસ્તા ઉપર ધારાસભ્યના સમર્થકોએ ભરૂચ જીલ્લા કોંગ્રેસ પ્રમુખ પરિમલસિંહ મુર્દાબાદના નારા લગાવ્યા હતા તેમજ સંજયસિંહ સોલંકી તુમ આગે બઢો હમ તુમ્હારે સાથ હે ના નારા લગાવ્યા હતા.
શમા હોટેલ પાસે તાલુકા કોંગ્રેસના સમર્થકોએ સંજય સોલંકી હાય હાય ના નારા લગાવ્યા જ્યારે આમોદ ચોકડી ઉપર ધારાસભ્ય સંજયસિંહ સોલંકીના સમર્થકોએ પરિમલસિંહ હાય હાય ના નારા લગાવ્યા અને કોંગ્રેસની પરિવર્તન યાત્રા આગળ નીકળી હતી.
