ટ્રમ્પના ટેરિફથી ખેતી ક્ષેત્રે કટોકટી વકરી, ચીનને ફાયદો થયો: US ડેમોક્રેટ્સ

• ટ્રમ્પના શાસનના પ્રથમ વર્ષમાં અમેરિકન પરિવારોએ કરિયાણા માટે સરેરાશ $૩૧૦ (આશરે ₹૨૫,૦૦૦થી વધુ) વધારે ચૂકવ્યા છે.

વોશિંગ્ટન, ૨૮ ફેબ્રુઆરી: અમેરિકી સેનેટના ડેમોક્રેટ્સે રાષ્ટ્રપતિ ડોનાલ્ડ ટ્રમ્પ પર ખેતી અને ખાદ્ય ચીજોની પરવડતાની કટોકટીને વધુ ગંભીર બનાવવાનો આરોપ લગાવ્યો છે. તેઓએ દલીલ કરી છે કે ટ્રમ્પની ટેરિફ (આયાત શુલ્ક) નીતિઓએ વૈશ્વિક કૃષિ બજારમાં ચીનનું વર્ચસ્વ વધારી દીધું છે, જ્યારે દેશમાં કરિયાણાના ભાવમાં તોતિંગ વધારો થયો છે.

“ટ્રમ્પના તૂટેલા વચનો: અમેરિકાના ખેડૂતો અને શ્રમજીવી પરિવારોની પાયમાલી” શીર્ષક હેઠળ એક નવો રિપોર્ટ જાહેર કરતા ડેમોક્રેટ્સે જણાવ્યું હતું કે, બેઇજિંગ સાથેના ટ્રમ્પના વ્યાપાર યુદ્ધે (Trade War) અમેરિકાના નિકાસ બજારોમાં મોટો ઘટાડો કર્યો છે અને ખેડૂતોને આર્થિક સંકટમાં ધકેલી દીધા છે.

• સોયાબીન નિકાસમાં ઘટાડો: અહેવાલ મુજબ, ચીન જે એક સમયે યુએસ સોયાબીનનું મુખ્ય ખરીદદાર હતું, તેણે ટ્રમ્પના ટેરિફના જવાબમાં ખરીદી બંધ કરી દીધી હતી. ૨૦૨૪માં ચીને યુએસ સોયાબીન પર ૩ અબજ ડોલર ખર્ચ્યા હતા. ૨૦૨૫માં ટ્રમ્પના ટેરિફને કારણે ચીને અમેરિકાને બદલે આર્જેન્ટિના અને બ્રાઝિલ તરફ વલણ અપનાવ્યું. હાલમાં ચીન જે ખરીદી કરી રહ્યું છે તે ૨૦૨૪ની સરખામણીમાં ૩૨ ટકાનો ઘટાડો દર્શાવે છે.

• ખેડૂતોની અનિશ્ચિતતા: ખેડૂતો નવા વાવેતર વર્ષમાં એવી જણસોના વધારા (surplus) સાથે પ્રવેશી રહ્યા છે જેને તેઓ વેચી શકતા નથી. આગામી વર્ષમાં શું વાવવું તે અંગે તેમની પાસે કોઈ સ્પષ્ટતા નથી.

• ખાદ્ય સુરક્ષા પર વિદેશી કબજો: રિપોર્ટમાં અમેરિકાની ખાદ્ય પ્રણાલી પર વિદેશી નિયંત્રણ અંગે ચિંતા વ્યક્ત કરવામાં આવી છે. ચીનના ‘ડબલ્યુએચ ગ્રુપ’ની માલિકીની ‘સ્મિથફિલ્ડ ફૂડ્સ’ અમેરિકાના પોર્ક (ડુક્કરનું માંસ) માર્કેટ પર પ્રભુત્વ ધરાવે છે. તેવી જ રીતે, કૃષિ રસાયણો અને બિયારણની મોટી સપ્લાયર કંપની ‘સિંજેન્ટા ગ્રુપ’ ચીની સરકારી કંપનીની માલિકીની છે.

વધતી મોંઘવારી અને આર્થિક બોજ:

ડેમોક્રેટિક નેતાઓએ આંકડાકીય માહિતી આપતા જણાવ્યું કે છેલ્લા એક વર્ષમાં:

• બીફ (ગૌમાંસ) ના ભાવમાં ૧૬.૪% નો વધારો થયો છે.

• કોફીમાં ૧૯.૮%, લેટીસમાં ૭.૩% અને ફ્રોઝન ફિશમાં ૮.૬% નો વધારો થયો છે.

• ટ્રમ્પના શાસનના પ્રથમ વર્ષમાં અમેરિકન પરિવારોએ કરિયાણા માટે સરેરાશ $૩૧૦ (આશરે ₹૨૫,૦૦૦થી વધુ) વધારે ચૂકવ્યા છે.

“ડોનાલ્ડ ટ્રમ્પના ટેરિફને કારણે અમેરિકન ખેડૂતો અત્યંત નાણાકીય દબાણ હેઠળ છે. ખર્ચ વધી રહ્યો છે અને બજારો બંધ થઈ રહ્યા છે,” તેમ સેનેટર મારિયા કેન્ટવેલે જણાવ્યું હતું.

સેનેટ ડેમોક્રેટિક લીડર ચક શૂમરે કહ્યું કે, ટ્રમ્પે ‘પ્રથમ દિવસ’થી જ ભાવ ઘટાડવાનું વચન આપ્યું હતું, પરંતુ વાસ્તવિકતા એ છે કે તેમણે ખાસ હિત ધરાવતા જૂથો માટે ગ્રાહકોના હિતોનું બલિદાન આપ્યું છે.

ખેડૂતોની દેવાળિયા સ્થિતિ:

અહેવાલમાં ઉલ્લેખ કરવામાં આવ્યો છે કે ખેડૂતોને ખોરાક પર ખર્ચવામાં આવતા દરેક ડોલરના માત્ર ૧૫.૯ સેન્ટ જ મળે છે. ૨૦૨૫માં ૩૧૫ ખેડૂતોએ દેવાળું ફૂંક્યું (Bankruptcy) છે, જે અગાઉના વર્ષ કરતા ૪૬ ટકાનો વધારો દર્શાવે છે.

નેશનલ ફાર્મર્સ યુનિયનના પ્રેસિડેન્ટ રોબ લારેવે જણાવ્યું હતું કે, અણધારી વેપાર નીતિઓ અને કોર્પોરેટ એકાધિકારને કારણે એક તરફ ખેડૂતો અને બીજી તરફ ગ્રાહકો બંને પીસાઈ રહ્યા છે.